ជាតិ
នយោបាយជាតិ
មេធាវីឯកឧត្តម កឹម សុខា ត្រូវតែប្តឹងឧទ្ធរណ៍ ដើម្បីទប់ស្កាត់សាលក្រមមិនឲ្យចូលជាស្ថាពរ
×
ភ្នំពេញ៖ សាលាដំបូងរាជធានីភ្នំពេញ បានចេញសាលក្រមជាផ្លូវការហើយ នៅព្រឹកថ្ងៃសុក្រនេះ ទាក់ទងនឹងការកាត់ទោសឯកឧត្តម កឹម សុខា អនុប្រធានគណបក្សសង្គ្រោះជាតិ។ កាលពីពេលថ្មីៗនេះ ឯកឧត្តម កឹម សុខា ត្រូវបានផ្តន្ទាទោស ឲ្យជាប់ពន្ធនាគាររយៈពេល៥ខែ និងពិន័យជាប្រាក់ចំនួន៨សែនរៀល ពីបទ «បដិសេធក្នុងការចូលខ្លួន» ដែលតុលាការចាត់ទុកថាជាបទល្មើសជាក់ស្តេង។
សាលាដំបូងរាជធានីភ្នំពេញ បានបញ្ជាកម្លាំងសមត្ថកិច្ចឲ្យយកសាលក្រម ទៅបិទនៅមុខផ្ទះឯកឧត្តម កឹម សុខា នាពេលព្រឹកថ្ងៃទី១៦ ខែកញ្ញា ឆ្នាំ២០១៦នេះ។ បើតាមច្បាប់ ក្រោយរយៈពេល១ខែនៃការជូនដំណឹងនេះ សាលក្រម នឹងចូលជាស្ថាពរ។
លោក ហែម សុជាតិ មេធាវីមួយរូប ក្នុងចំណោមមេធាវីទាំងប្រាំរូប ដែលការពារក្តីឲ្យឯកឧត្តម កឹម សុខា បានប្រាប់សារព័ត៌មានថ្មីៗថា ក្រុមមេធាវី នឹងដាក់បណ្តឹងទៅសាលាឧទ្ធរណ៍ ដើម្បីរារាំងការអនុវត្តសាលក្រមរបស់សាលាដំបូងរាជធានីភ្នំពេញ។ លោក បន្ថែមថា សាលាដំបូងរាជធានីភ្នំពេញ ត្រូវតែផ្អាកការអនុវត្តសាលក្រមរបស់ខ្លួនសិន នៅពេលដែលក្រុមមេធាវីប្តឹងទៅសាលាឧទ្ធរណ៍។
លោក ហែម សុជាតិ បញ្ជាក់ទៀតថា ក្រុមមេធាវី បានពិភាក្សាគ្នារួចរាល់ហើយ ក្នុងការប្តឹងទៅសាលាឧទ្ធរណ៍ ដើម្បីប្រឆាំងនឹងសាលក្រមរបស់សាលាដំបូងរាជធានីភ្នំពេញ។ ប៉ុន្តែ លោក មិនទាន់អាចប្រាប់ពីពេលវេលា នៃការដាក់បណ្តឹងនោះទេ។
លោកមេធាវីរូបនេះ ពន្យល់ថា សាលាដំបូងរាជធានីភ្នំពេញ មិនអាចអនុវត្តសាលក្រមរបស់ខ្លួនបានទេ ប្រសិនបើមេធាវីប្តឹងទៅសាលាឧទ្ធរណ៍ ហើយសាលាឧទ្ធរណ៍ កំពុងតែដំណើរការនីតិវិធីនេះ។ លោក សង្កត់ធ្ងន់ៗថា៖«ដើម្បីប្រយោជន៍កូនក្តី (ឯកឧត្តមកឹម សុខា) របស់ពួកខ្ញុំ ពួកខ្ញុំត្រូវតែប្តឹងឧទ្ធរណ៍»។
ក្រុមមេធាវី របស់ឯកឧត្តម កឹម សុខា បានចាត់ទុកការបើកវសនាការរបស់សាលាដំបូងរាជធានីភ្នំពេញ ដែលសម្រេចឲ្យឯកឧត្តម កឹម សុខា មានទោសកំហុសនេះ ថាខុសនឹងនីតិវិធី៕
Tag:
កឹម សុខា
មេធាវី
តុលាការ
© រក្សាសិទ្ធិដោយ thmeythmey.com