អន្តរជាតិ
នយោបាយអន្តរជាតិ
លោក លី ក្វាន់យូ ធ្លាប់ប្រមើលឃើញការបរាជ័យរបស់សហភាពអឺរ៉ុប? ![](https://image.thmeythmey.com/pictures/2016/09/28/134086044_14269231034981n.jpg)
×![]()
អង់គ្លេសចាកចេញសហភាពអឺរ៉ុប ជាសុបិនអាក្រក់មួយសម្រាប់សមាហរកម្មតំបន់។ អ្វីដែលគួរឲ្យចាប់អារម្មណ៍ ការដើរដល់ផ្លូវបំបែករបស់ក្រុមសមាជិកសហភាពអឺរ៉ុបនេះត្រូវបានព្យាករណ៍ដោយបុរសរដ្ឋសិង្ហបុរីលោក លី ក្វាន់យូ ក្នុងបទសម្ភាសន៍ជាមួយសារព័ត៌មានអាល្លឺម៉ង់តាំងពីឆ្នាំ ២០១២ និងក្នុងសៀវភៅរបស់លោក « One Man’s View of the World» ។
ក្នុងបទសម្ភាសន៍ជាមួយសារព័ត៌មានអាល្លឺម៉ង់ Die Zeit ក្នុងឆ្នាំ ២០១២ លោក លី ក្វាន់យូ ស្ថានិករដ្ឋសិង្ហបុរី បានវាយតម្លៃជាមុនថា សហភាពអឺរ៉ុបអាចនឹងបរាជ័យក្នុងពេលណាមួយខាងមុខ។ អ្នកសារព័ត៌មានបានចោទសួរលោក លី ក្វាន់យូរ ថា៖« តើលោកយល់ថា សហភាពអឺរ៉ុបដែលយើងមានសព្វថ្ងៃនេះ មិនមែនជាជោគជ័យ និងជាកម្លាំងមួយដែលជំរុញលើកទឹកចិត្តតំបន់ផ្សេងទៀតលើពិភពលោកមែនទេ?»
ក្នុងនាមជាមេដឹកនាំប្រទេសអស់រយៈពេលច្រើនទសវត្សរ៍មកនោះ លោក លី ក្វាន់យូ បានឆ្លើយតបភ្លាមៗថា៖« ទេ! ខ្ញុំមិនមើលឃើញសហភាពអឺរ៉ុបជាកម្លាំងដែលជំរុញឲ្យតំបន់ផ្សេងទៀតលើពិភពលោកធ្វើតាមទេ។ ខ្ញុំមើលឃើញថា វាគ្រាន់តែជាសហគ្រាសមួយដែលផ្តើមឡើងខុស ព្រោះតែវាត្រូវបានគេពង្រីកខ្លួនរហ័សខ្លាំងពេក។ ហើយវានឹងអាចបរាជ័យថែមទៀត»។
ទាក់ទិនបញ្ហានេះ ក្នុងសៀវភៅរបស់លោកដែលមានចំណងជើងថា «One Man’s View of the World» លោក លី ក្វាន់យូរ បានពន្យល់ថាការបន្ថែមសមាជិករហ័សក្នុងដំណើរសមាហរណកម្មនេះក្លាយជាបញ្ហាព្រោះអឺរ៉ុបនឹងមានការបែកខ្ញែកគ្នា និងមិនមានលទ្ធភាពស្វែងរកការសម្រេចជាឯកច្ឆ័ន្ទពេលអនាគតឡើយ។
ក្រៅពីលើកឡើងពីការគ្មានឯកភាពគ្នាក្នុងចំណោមសមាជិក លោក លី ក្វាន់យូ ក៏ទាញបញ្ហាសំខាន់មួយទៀតសម្រាប់តំបន់អឺរ៉ុបផងដែរ។ នោះគឺតំបន់ចាយលុយអឺរ៉ូ ដែលបង្កើតឡើងដោយគ្មានសមាហរណកម្មនយោបាយសារពើពន្ធពិតប្រាកដមួយ។ លោក លី ក្វាន់យូ សង្កត់ធ្ងន់ថា អឺរ៉ុបត្រូវមានសមាហរណកម្មស៊ីជម្រៅជាងបច្ចុប្បន្ន ហើយទម្រង់នៃតំបន់ចាយលុយអឺរ៉ូនឹងមិនអាចសង្គ្រោះបានឡើយ ព្រោះថា អឺរ៉ុបមិនអាចមានសមាហរណកម្មរូបិយប័ណ្ណ ដោយគ្មានសមាហរកម្មនយោបាយសារពើពន្ធ។
ត្រលប់មកវិញ សម្តីលោក លី ក្វាន់យូ ប្រៀបដូចជាការទស្សន៍ទាយពីអនាគតនៃសហភាពអឺរ៉ុបដូច្នេះដែរ។ បញ្ហាការិយាធិបតេយ្យ វិបត្តិបំណុល ការថយចុះនៃកំណើនសេដ្ឋកិច្ច កង្វះការសាមគ្គីនិងរួបរួមគ្នាសុទ្ធតែជាបញ្ហាប្រឈមធំបំផុតរបស់សហភាអឺរ៉ុប។ ចក្រភពអងគ្លេសដែលសម្រេចបោះឆ្នោតចាកចេញពីសហភាពអឺរ៉ុបនោះ តាំងពីដើមមកផ្តោតសំខាន់លើបញ្ហាសេដ្ឋកិច្ច ដោយមានទីផ្សាររួមគ្នាមិនមែនគោលនយោបាយរួមគ្នាទេ។ ហើយអង់គ្លេសក៏មិនចង់បាត់បង់អំណាចសម្រេចដែលផ្ទេរទៅឲ្យស្ថាប័នអឺរ៉ុបដែរ។
ខុសពីចក្រភពអង់គ្លេស អាល្លឺម៉ង់ដែលតាំងខ្លួនជាមេដឹកនាំអឺរ៉ុបយូរមកហើយនោះ តែងតែចង់ឲ្យមានសមាហរណកម្មស៊ីជម្រៅ រហូតក្លាយជាសហភាពនយោបាយមួយ។ អាល្លឺម៉ង់យល់ថា បើអឺរ៉ុបចង់ចេញឲ្យផុតពីវិបត្តិបំណុល ការបន្តលើកស្ទួយដំណើរសមាហរណកម្ម ដោយពង្រឹងប្រព័ន្ធហិរញ្ញវត្ថុ វិស័យធនាគារ និងវិធានការគ្រប់គ្រងគោលនយោបាយសារពើពន្ធជារឿងចាំបំផុតមួយ៕
Tag:
Brexit
លី ក្វាន់យូ
សហភាពអឺរ៉ុប
© រក្សាសិទ្ធិដោយ thmeythmey.com