អន្តរជាតិ
នយោបាយអន្តរជាតិ
ប្រធានាធិបតី Duterte ជាមេដឹកនាំមាត់អត់គម្រប?
× នរណាៗក៏ដឹងដែរថា ប្រធានាធិបតីហ្វីលីពីនថ្មី លោក Rodrigo Duterte តែងតែប្រើប្រាស់ពាក្យសម្ដីគ្រោតគ្រាត និងពេលខ្លះថែមទាំងប្រើសម្ដីអសុរោះ ដាក់គេឯងគ្រប់គ្នាមិនរើសមុខឡើយ។ យ៉ាងណាក្ដី បន្ទាប់ពីការប្រើប្រាស់ពាក្យសម្ដីទាំងនោះហើយ ប្រធានាធិបតីដែលមានងារជា «អ្នកដាក់ទណ្ឌកម្ម» រូបនេះ ក៏និយាយសម្រាលស្ថានការណ៍វិញ ដោយពេលខ្លះអះអាងថា ការនិយាយពាក្យមិនសមរម្យនោះ ជាកំហឹងរបស់លោកប៉ុណ្ណោះ។
មេដឹកនាំមហាអំណាចពិភពលោកមួយចំនួនរួមទាំងប្រធានាធិបតីអាមេរិក បារ៉ាក់ អូបាម៉ា ផងនោះ គឺសុទ្ធតែត្រូវបានបុរសខ្លាំងហ្វីលីពីន Rodrigo Duterte ប្រើពាក្យមិនសមរម្យដាក់ទាំងអស់។ ជាញឹកញយ បន្ទាប់ពីនិយាយពាក្យមិនសមរម្យហើយនោះ ប្រធានាធិបតីហ្វីលីពីន តែងបង្ហាញការសោកស្ដាយចំពោះសកម្មភាពរបស់លោក ហើយពេលខ្លះទៀត លោកបែរជាបដិសេធប្រើពាក្យទាំងនោះទៅវិញដែរ។
តាំងតែពីមុនចូលកាន់តំណែងប្រធានាធិបតីហ្វីលីពីន លោក Duterte តែងប្រើពាក្យអសុរោះពិបាកស្ដាប់នៅពេលដែលមិនសប្បាយចិត្ត ឬនៅពេលដែលលោកទើសទាល់សកម្មភាពណាមួយនោះ។ សម្ដេចប៉ាប Francis នៃបុរីវ៉ាទីកង់ ជាបុគ្គលដំបូងដែលត្រូវលោក Duterte ប្រើពាក្យមិនសមរម្យដាក់។ កាលពីថ្ងៃទី៣០ ខែវិច្ឆិកា ២០១៥ លោក Duterte ដែលនៅជាបេក្ខជនប្រធានាធិបតីនៅឡើយ បានហៅសម្ដេចប៉ាបថា «កូនស្រីខួច»ព្រោះលោកខឹងនឹងការស្ទះចរាចរណ៍ ដែលបណ្ដាលមកពីទស្សនកិច្ចរបស់សម្ដេចប៉ាប។
អគ្គរដ្ឋទូតអាមេរិកប្រចាំក្រុងម៉ានីលជាជនរងគ្រោះមួយទៀតពីការប្រើពាក្យគ្រោតគ្រាតរបស់លោកប្រធានាធិបតីហ្វីលីពីន។ លោក Duterte បានហៅលោក Philip Goldberg ថាជា «ខ្ទើយ» អំឡុងពេលសុន្ទរកថាទៅកាន់ទាហានក្នុងក្រុងសេប៊ូ។ លោក Duterte បញ្ជាក់ថា លោក Philip Goldberg បានជ្រៀតជ្រែកចូលកិច្ចការរបស់ហ្វីលីពីន កាលពីពេលបោះឆ្នោត ដែលរឿងនោះហើយទើបធ្វើឲ្យលោកជេរតែម្ដងទៅ។
មិនត្រឹមតែអគ្គរដ្ឋទូតអាមេរិកទេ សូម្បីតែប្រធានាធិបតីអាមេរិក បារ៉ាក់ អូបាម៉ា ក៏គេចមិនផុតពីមាត់អត់គម្របរបស់លោក Duterte ដែរ។ មុនពេលចាកចេញទៅឡាវ ដើម្បីចូលរួមប្រជុំអាស៊ាន លោក Duterte បាននិយាយដៀមដាមដាក់ប្រធានាធិបតីអាមេរិក លោក បារ៉ាក់ អូបាម៉ា ដោយលោកបានចោទសួរថា ប្រធានាធិបតីអាមេរិក អូបាម៉ា ជានរណា ហើយថែមទាំងហៅលោក អូបាម៉ា ជាកូនស្រីខូច ថែមទៀត ដែលរឿងនេះធ្វើឲ្យលោក អូបាម៉ា សម្រេចចិត្តលុបចោលជំនួបទ្វេភាគីជាមួយលោក Duterte ម្ដងទៅ។
«F**k you» ! នេះ គឺជាសារឆ្លើយតបមួយយ៉ាងខ្លីរបស់លោកប្រធានាធិបតីហ្វីលីពីន Duterte ទៅកាន់សហភាពអឺរ៉ុប ដែលបានថ្លែងព្រួយបារម្ភ និងរិះគន់ពីការសម្លាប់ក្រៅប្រព័ន្ធតុលាការក្នុងប្រតិបត្តិការបោសសម្អាតបទល្មើសរបស់លោកនោះ។ នេះក៏ជាការប្រើពាក្យអសុរោះជាថ្មី និងចុងក្រោយបំផុតរបស់លោកប្រធានាធិបតី បន្ទាប់ពីលោកបានធ្វើយ៉ាងដូច្នេះទៅលើប្រធានាធិបតីអាមេរិករួចមក។
ជាការពិត ប្រធានាធិបតីហ្វីលីពីនរូបនេះ ត្រូវគេមើលឃើញថា ជាមេដឹកនាំមាត់ដាច និងចិត្តឆៅ ព្រោះលោកក៏ធា្លប់គំរាមទាត់អគ្គរដ្ឋទូតបរទេសមួយ ដែលហ៊ានសួរនាំលោករឿងការបញ្ចេញឧស្ម័នផ្ទាំងកញ្ចក់ និងថែមទាំងដាក់បញ្ជាបាញ់សម្លាប់ឧក្រិដ្ឋជនគ្រឿងញៀនគ្មានត្រាប្រណីផងដែរ។ មកទល់ពេលនេះ មនុស្សជិតបីពាន់នាក់ ដែលពាក់ព័ន្ធនឹងគ្រឿងញៀនត្រូវបាញ់សម្លាប់យ៉ាងរង្គាលក្រោមប្រតិបត្តិការបោសសម្អាតបទល្មើស និងគ្រឿងញៀនរបស់លោក៕
© រក្សាសិទ្ធិដោយ thmeythmey.com