អន្តរជាតិ
នយោបាយអន្តរជាតិ
លោក Duterte ថាភ្នាក់ងារ CIA មានផែនការចង់សម្លាប់លោក ![លោក Duterte ត្រួតពលមុនពេលចេញដំណើរទៅទស្សនកិច្ចនៅវៀតណាម (រូបភាព៖គណនី ហ្វេសប៊ុកលោក Duterte)](https://image.thmeythmey.com/pictures/2016/09/30/_______________________________________________________________________duterte.jpg)
លោក Duterte ត្រួតពលមុនពេលចេញដំណើរទៅទស្សនកិច្ចនៅវៀតណាម (រូបភាព៖គណនី ហ្វេសប៊ុកលោក Duterte)
×![]()
លោក Rodrigo Duterte អះអាងថា លោកបានលឺថាក្រុមភា្នក់ងារចារកម្មមជ្ឈិមអាមេរិក (CIA) មានគម្រោងសម្លាប់លោក។ លោកបានថ្លែងបែបនេះ នៅពេលដែលលោកប្រកាសថា លោកមិនអនុញ្ញាតឲ្យទាហានហ្វីលីពីនចូលរួមល្បាតជាមួយអាមេរិកនៅសមុទ្រចិនខាងត្បូងឡើយ។ ហើយលោកក៏ប្រកាសថា សមយុទ្ធយោធាជាមួយអាមេរិកឆ្នាំ ២០១៧ ជាសមយុទ្ធចុងក្រោយបំផុតដែរ។
ប្រធានាធិបតីហ្វីលីពីន Rodrigo Duterte បានអះអាងប្រាប់សហគមន៍ហ្វីលីពីននៅវៀតណាមនៅថ្ងៃពុធទី ២៨ កញ្ញាថា លោកបានលឺថា ភា្នក់ងារចារកម្មមជ្ឈិមអាមេរិក (CIA)មានគម្រោងសម្លាប់លោក។ បើយោងតាមសារព័ត៌មានហ្វីលីពីន ABS-CBN លោក Duterte បានថ្លែងបែបនេះស្របពេលដែលលោកប្រកាសថា រដ្ឋាភិបាលរបស់លោកនឹងមិនអនុញ្ញាតឲ្យទាហានហ្វីលីពីនចូលរួមក្នុងសកម្មភាពល្បាតនៅសមុទ្រចិនខាងត្បូងជាមួយអាមេរិកឡើយ។ លោកថា លោកមិនប្តូរឲ្យទាហានលោកទៅស្លាប់ឡើយ។
ខណៈដែលលោកកំពុងស្ថិតនៅប្រទេសវៀតណាម លោក Duterte បានបន្តទិតៀនអាមេរិកជាថ្មីដែលបន្តរិះគន់សង្គ្រាមគ្រឿងញៀន និងចោទលោកថាបានរំលោភសិទ្ធិមនុស្ស។ ហើយលោកនិយាយពេញៗមាត់ថា លោកក៏ចង់បង្កើតសម្ព័ន្ធភាពថ្មីជាមួយបណ្តាប្រទេសផ្សេងទៀតដូចជាចិន និងរុស្ស៊ីជាដើម ហើយលោកក៏គំរាមលុបចោលសម្ព័ន្ធភាពយូរអង្វែងដែលបង្កើតតាមសន្ធិសញ្ញាជាមួយអាមេរិកថែមទៀតផង។
អ្វីដែលគួរឲ្យចាប់អារម្មណ៍ កាលពីថ្មីៗនេះ លោក Duterte បានបញ្ជាក់យ៉ាងច្បាស់ថា សមយុទ្ធយោធារវាងអាមេរិកនិងហ្វីលីពីនឆ្នាំ ២០១៧ នេះជាសមយុទ្ធចុងក្រោយបំផុត។ ប៉ុន្តែភ្លាមនោះ រដ្ឋមន្ត្រីការបរទេសហ្វីលីពីន Perfecto Yasay Jr. បានជួយសម្រាលស្ថានការណ៍ដោយបកស្រាយថា សមយុទ្ធរវាងអាមេរិកនិងហ្វីលីពីននឹងបន្តទៅមុខទៀតបន្ទាប់ពីឆ្នាំ២០១៧ ប៉ុន្តែលំហាត់យោធាទាំងនោះត្រូវត្រួតពិនិត្យជាមុនសិនមុនរៀបចំឡើង។ ហើយហ្វីលីពីននៅតែប្រឹងប្រែងរក្សាសម្ព័ន្ធភាពជាមួយអាមេរិកដដែល៕
© រក្សាសិទ្ធិដោយ thmeythmey.com