អន្តរជាតិ
×![]()
ដោយ: ថ្មីៗ
ជម្លោះប្រដាប់អាវុធនៅស៊ីរីកាន់តែស្មុគស្មាញទៅៗពីមួយថ្ងៃទៅមួយថ្ងៃ។ មនុស្សបន្តស្លាប់រាល់ថ្ងៃដោយសារការវាយប្រហារនិងទម្លាក់គ្រាប់បែក។ ហើយក្តីសង្ឃឹមថាជម្លោះអាចចប់ហើយសន្តិភាពត្រឡប់មកវិញនោះកាន់តែខិតទៅឆ្ងាយទៅដែរ។ ភាគីជម្លោះ រួមទាំងមហាអំណាចដែលកាងគូភាគីនោះក៏បន្តចោទដាក់គ្នាឥតឈប់រឿងរំលោភបទឈប់បាញ់ដែលបង្កើតឡើងនៅដើមខែកញ្ញាកន្លងទៅ។ ថ្វីបើវាកាន់តែស្មុគស្មាញក្តី ក្រុងវ៉ាស៊ីនតោនលែងហ៊ានប្រើប្រាស់កម្លាំងទ័ពដើម្បីបញ្ចប់ជម្លោះប្រដាប់អាវុធរយៈពេលជាង៥ឆ្នាំនេះហើយ។
តាំងពីយូរមកហើយ បណ្តាអ្នកការទូតអាមេរិកចង់ឲ្យប្រើកម្លាំងទ័ពដើម្បីយកឈ្នះរដ្ឋាភិបាលស៊ីរី ដូចអាមេរិកធ្លាប់ធ្វើនៅអ៊ីរ៉ាក់ និងលីប៊ី។ ចាំឈ្នះហើយ ចាំគិតគូររឿងរៀបចំរដ្ឋាភិបាលនិងស្តារប្រទេសជាតិឡើងវិញតាមក្រោយ ព្រោះអ្នកឈ្នះអាចកំណត់អ្វីគ្រប់យ៉ាងបានស្រួល។ ប៉ុន្តែវាមិនស្រួលដូចគិតទេ បើសិនជាគេត្រឡប់មកមើលបញ្ហាស៊ីរីបច្ចុប្បន្ន។ រដ្ឋាភិបាលស៊ីរី មិនដូចរដ្ឋាភិបាលអ៊ីរ៉ាក់សម័យ សាដាម ហ៊ូសេន ឬលីប៊ីសម័យហ្កាដាហ្វីឡើយ។ ហើយមានហេតុផលច្រើនដែលបន្ទុចបង្អាក់រដ្ឋបាលលោក បារ៉ាក់ អូបាម៉ា មិនឲ្យប្រើប្រាស់យោធាក្នុងប្រឆាំងរដ្ឋាភិបាលស៊ីរីដើម្បីបញ្ចប់សង្គ្រាមបង្ហូឈាមនេះ។
១.អន្តរាគមន៍យោធាអាមេរិកនៅស៊ីរីមិនជួយដោះស្រាយអ្វីទាំងអស់
ជម្លោះកើតឡើងជាង៥ឆ្នាំនឹងមិនចប់ដោយសារការទម្លាក់រដ្ឋាភិបាលរដ្ឋាភិបាលអាសាដឡើយ។ ជម្លោះប្រដាប់អាវុធនេះវាស្មុគស្មាញជាងអ្វីដែលមើលឃើញជាក់ស្តែង។ ភាគីជម្លោះច្រើនមានទាំងក្រុមភេរវជនទៀត ហើយមានការលូកលាន់ពីមហាអំណាចនិងប្រទេសធំច្រើនទៀត។ ដូច្នេះ ក្រៅពីបន្តប្រើដំណោះស្រាយនយោបាយ ការប្រើប្រាស់ទ័ពកម្ចាត់ភាគីម្ខាងមិនមែនជាមធ្យោបាយជួយបញ្ចប់បញ្ហាឡើយ។ លោក អូបាម៉ា បានអះអាងនៅចំពោះមុខមហាសន្និបាតអង្គការសហប្រជាជាតិថា ការប្រើប្រាស់កម្លាំងទ័ពមិនជួយដោះស្រាយបញ្ហានៅស៊ីរីឡើយ។ លោកទទួលស្គាល់ថា វិធីសាស្ត្រការទូតតែម្យ៉ាងប៉ុណ្ណោះដែលអាចបញ្ចប់ជម្លោះបង្ហូរដ៏រ៉ាំរ៉ៃនេះបាន។ ប៉ុន្តែបើសួរថាដំណោះស្រាយការទូតបែបម៉េច និងចាប់ផ្តើមដោយវិធីណានោះ វាស្ថិតក្នុងភាពស្រពេចស្រពិលនៅឡើយ។
២.លោក អូបាម៉ាជិត ផុតអាណត្តិហើយ
រឿងដែលគេមិនអាចប្រកែកបានដែលថា ហេតុផលមួយដែលជំរុញឲ្យរដ្ឋបាលអាមេរិកបច្ចុប្បន្នប្រុងប្រយ័ត្នក្នុងការទម្លាក់លោក អាសាដ គឺ អាណត្តិ លោក បារ៉ាក់ អូបាម៉ា ជិតផុតហើយ ហើយអាមេរិកកំពុងមរមាញឹករឿងបោះឆ្នោតរើសប្រធានាធិបតីផង។ លោកបារ៉ាក់ អូបាម៉ា នៅសល់ពេលប្រហែលមិនដល់៤ខែផងក្នុងកាន់កាប់តំណែងប្រធានាធិបតី។ ដូច្នេះការផ្លាស់ប្តូរគោលនយោបាយនិងយុទ្ធសាស្ត្រយោធានៅក្នុងជម្លោះស៊ីរីវាជារឿងមិនអាចទៅរួចឡើយ ព្រោះវាជាយុទ្ធសាស្ត្ររយៈពេលវែង។ តែវាអាចកើតឡើង ក្នុងករណីអតីតរដ្ឋមន្ត្រីការបរទេសអាមេរិក ហ៊ីឡារី គ្លីនតុន ក្លាយជាប្រធានាធិបតីអាមេរិក។ នេះក៏ដោយសារលោកស្រី ចង់ប្តូររបបនៅស៊ីរី និងសាបព្រួសប្រជាធិបតេយ្យបែបបស្ចិមលោក ដូចលោកស្រីធ្លាប់ធ្វើនៅលីប៊ី។
៣. អាមេរិកត្រឹមខ្ចីដៃក្រុមភេរវជនប្រើប្រាស់កម្ចាត់រដ្ឋាភិបាលអាសាដ?
អាមេរិកបន្តចោទសួរ ពេលនិយាយដល់ការប្រើប្រាស់កម្លាំងកម្ចាត់រដ្ឋាភិបាលលោក អាសាដ ថាតើអ្នកណានឹងកេងចំណេញក្រោយកម្ចាត់កងកម្លាំងអាសាដ។ វាជារឿងពិតដែលថា ទាំងអាមេរិក ទាំងក្រុមឧទ្ទាម និងកងកម្លាំងអាសាដមានសត្រូវរួមគឺក្រុមភេរវជន។ បើបំផ្លាញកម្លាំងអាសាដនៅពេលនេះ មិនខុសពីជួយត្រួសត្រាយផ្លូវឲ្យក្រុមភេរវជនទាញយកប្រយោជន៍ឡើយ។ វិបត្តិលីប៊ី និងអ៊ីរ៉ាក់ នៅតែជាមេរៀនថ្មីៗដែលអាមេរិកមិនអាចបោះបង់បាននៅឡើយ។
ប៉ុន្តែយ៉ាងណាមិញ អាមេរិកមិនបានបោះបង់មហិច្ឆតាកម្ចាត់អាសាដឡើយ។ ក្នុងស្ថានភាពបច្ចុប្បន្ន អាមេរិកហាក់ចង់ទុកក្រុមភេរវជនដូចជាក្រុមរដ្ឋឥស្លាម និងក្រុម Al Nusra ដែល ព្រោះវាជាសន្លឹកបៀរដែលអាចជួយឲ្យខ្លួនឈ្នះរដ្ឋាភិបាលអាសាដ។ ដូច្នេះហើយកន្លងមក អាមេរិកមិនសូវមានឆន្ទៈចាប់ដៃរុស្ស៊ីឬរដ្ឋាភិបាលអាសាដកម្ចាត់ក្រុមភេរវជនទាំងនោះឡើយ ហើយអាមេរិកក៏ហាក់ដូចជាប្រឹងអូសបន្លាយពេលវេលាឲ្យក្រុមភេរវជនទាំងនោះ
៤. បើអន្តរាគមន៍ប៉ះទង្គិចជាមួយទ័ពរុស្ស៊ីនៅទីនោះស្រាប់
បញ្ហាធំមួយទៀតគឺ ការឈានដល់ប៉ះទង្គិចជាមួយទ័ពរុស្សីនៅស៊ីរី។ រុស្ស៊ីទោះក្នុងលក្ខខណ្ឌណាក៏ដោយ មិនអាចឲ្យអាមេរិកធ្វើតាមចិត្តនិងទម្លាក់លោក អាសាដ ពីតំណែងឡើយ។ រុស្ស៊ី ជាគ្រោះថ្នាក់ធំសម្រាប់អន្តរាគមន៍យោធាអាមេរិក ព្រោះរុស្ស៊ីមានមូលដ្ឋានទ័ពអាកាស ដោយមានយន្តហោះចម្បាំងច្រើនគ្រឿង និងមានប្រព័ន្ធការពារអាកាស S-400 ជាច្រើនគ្រឿងនៅស៊ីរីទៀត។ ដូច្នេះហើយបានជា អាមេរិកគិតគូរដោយប្រុងប្រយ័ត្នបំផុត ព្រោះអាមេរិកលែងជាមហាអំណាចតែមួយដែលជាន់មជ្ឈិមបូព៌ាផ្អៀងហើយ ហើយវាក៏គ្រោះថ្នាក់ខ្លាំងសម្រាប់ទ័ពអាមេរិកដែរ។ នេះក៏ដោយសារ រុស្ស៊ីមានប្រៀបជាងអាមេរិកបន្តិចហើយក្នុងការដោះស្រាយក្នុងជម្លោះស៊ីរី ក្រោយលោក វ្ល៉ាឌីមៀ ពូទីន បញ្ជូនទ័ពទៅគាំទ្ររដ្ឋាភិបាលលោក អាសាដ។
រុស្ស៊ីសម្រេចជោគជ័យក្នុងការដាកគំនៀបឲ្យអាមេរិកចាប់ដៃខ្លួនបង្កើតបទឈប់បាញ់ខែកុម្ភៈ និងចុងក្រោយកំណត់ភាគីដែលត្រូវចូលតុចរចានៅហ្សឺណែវ។ ហើយមកទល់បច្ចុប្បន្ន រុស្ស៊ីក៏បន្តដឹកមុខអាមេរិកក្នុងការបង្កើតបទឈប់បាញ់ថ្មីខែកញ្ញានេះដែរ រហូតដល់ធ្វើឲ្យក្រុមឧទ្ទាម និងសម្ព័ន្ធមិត្តអាមេរិកមួយចំនួននៅអឺរ៉ុបលែងទុកចិត្តអាមេរិកទៀត។ ថ្វីបើបច្ចុប្បន្នអាមេរិកនិងរុស្ស៊ីហាក់ប៉ះទង្គិចគ្នារឿងពាក្យសម្តីខ្លាំងក៏ដោយក្រោយ បទឈប់បាញ់ថ្មីត្រូវលោក អាសាដ ប្រកាសបញ្ចប់ការអនុវត្ត ភាគីរុស្ស៊ីនិងអាមេរិកប្តេជ្ញាចិត្តថានឹងបន្តជំរុញការបន្តអនុវត្តបទឈប់បាញ់ និងឈានទៅបង្កើតកិច្ចសហប្រតិបត្តិការយោធាកម្ចាត់ក្រុមភេរវជនថែមទៀត។
រុស្ស៊ីសម្រេចជោគជ័យក្នុងការដាកគំនៀបឲ្យអាមេរិកចាប់ដៃខ្លួនបង្កើតបទឈប់បាញ់ខែកុម្ភៈ និងចុងក្រោយកំណត់ភាគីដែលត្រូវចូលតុចរចានៅហ្សឺណែវ។ ហើយមកទល់បច្ចុប្បន្ន រុស្ស៊ីក៏បន្តដឹកមុខអាមេរិកក្នុងការបង្កើតបទឈប់បាញ់ថ្មីខែកញ្ញានេះដែរ រហូតដល់ធ្វើឲ្យក្រុមឧទ្ទាម និងសម្ព័ន្ធមិត្តអាមេរិកមួយចំនួននៅអឺរ៉ុបលែងទុកចិត្តអាមេរិកទៀត។ ថ្វីបើបច្ចុប្បន្នអាមេរិកនិងរុស្ស៊ីហាក់ប៉ះទង្គិចគ្នារឿងពាក្យសម្តីខ្លាំងក៏ដោយក្រោយ បទឈប់បាញ់ថ្មីត្រូវលោក អាសាដ ប្រកាសបញ្ចប់ការអនុវត្ត ភាគីរុស្ស៊ីនិងអាមេរិកប្តេជ្ញាចិត្តថានឹងបន្តជំរុញការបន្តអនុវត្តបទឈប់បាញ់ និងឈានទៅបង្កើតកិច្ចសហប្រតិបត្តិការយោធាកម្ចាត់ក្រុមភេរវជនថែមទៀត។
Tag:
បាសា អាល់អាសាដ
បារ៉ាក់ អូបាម៉ា
© រក្សាសិទ្ធិដោយ thmeythmey.com
