តម្រូវការ និងតម្លៃចេកហ្វីលីពីនទៅកាន់ចិន កើនស្ទើរតែទ្វេដង ក្រោយចិនប្រកាសដកការរឹតត្បិតពាណិជ្ជកម្ម

អន្តរជាតិ

តម្រូវការ និងតម្លៃចេកហ្វីលីពីនទៅកាន់ចិន កើនស្ទើរតែទ្វេដង ក្រោយចិនប្រកាសដកការរឹតត្បិតពាណិជ្ជកម្ម

17, Oct 2016 , 6:14 pm

រូបភាព

ដោយ:

អ្នកផ្គត់ផ្គង់ចេកហ្វីលីពីន បានអះអាងថាបរិមាណនៃតម្រូវការ និងតម្លៃរបស់ចេកហ្វីលីពីន បានកើនឡើងគួរកត់សម្គាល់ ក្រោយពី រដ្ឋាភិបាលក្រុងប៉េកាំង បានប្រកាសបន្ធូរបន្ថយឡើងវិញចំពោះការនាំចេញទៅកាន់ចិន ដែលត្រូវបានធ្វើឡើងមុនពេលដែលលោកប្រធានាធិបតីហ្វីលីពីនបំពេញទស្សនកិច្ចទៅកាន់ប្រទេសចិននោះ។

អ្នកផ្គត់ផ្គងផ្លែចេក នៃក្រុង Apanabo នៃប្រទេសហ្វីលីពីន លោក Emmanuel Pamisaran បានឲ្យដឹងថា ការបញ្ជាទិញផ្លែចេកទៅកាន់ចិនបានកើនឡើងស្ទើរតែទ្វេដង ក្រោយពីរដ្ឋាភិបាលចិន បានដកចេញនូវការរឹតត្បិតពាណិជ្ជកម្មលើហ្វីលីពីនកាលពីសប្តាហ៍មុននោះ។ នេះបើយោងតាមការចុះផ្សាយរបស់សារព័ត៌មានហ្វីលីពីន ABS-CBN។

នៅថ្ងៃទី០៧ ខែតុលាកន្លងទៅ រដ្ឋមន្ត្រីកសិកម្មហ្វីលីពីន Emmanuel Piñol បានអះអាងថា ចិន បានដកការរិតត្បិតលើការនាំចេញ«ចេក និងម្នាស់»ពីហ្វីលីពីន ដែលធ្លាប់ដាក់តាំងពីប្រទេសទាំងពីរបានមានភាពតានតឹងជាមួយនឹងគ្នានៅបីឬបួនឆ្នាំមុនមកម្ល៉េះ។ ការបន្ធូរបន្ថយនេះ ត្រូវបានធ្វើឡើង ខណៈពេល លោកប្រធានាធិបតីហ្វីលីពីន ក៏គ្រោងនឹងបំពេញទស្សនកិច្ចទៅកាន់ចិនក្នុងខែនេះផងដែរនោះ។ បើតាមក្រសួងការបរទេសចិន លោកប្រធានាធិបតី Rodrigo Duterte នឹងបំពេញទស្សនកិច្ចទៅកាន់ចិននៅថ្ងៃទី១៨-២១ខែតុលា។

ពេលនោះដែរ លោករដ្ឋមន្ត្រីកសិកម្មរូបនោះ ក៏បានបន្ថែមដែរថា ក្រៅពីចេក និងម្នាស់ ដែលជាផលិតផលកសិកម្មចម្បងមកពីខេត្តកំណើតរបស់លោកប្រធានាធិបតីហ្វីលីពីន ចិន ក៏នឹងបើកទីផ្សារសម្រាប់ហ្វីលីពីនលើទំនិញកសិកម្មផ្សេងទៀតដូចជា ស្វាយ ដូង និងស្រកានាគផងដែរ។

សូមរម្លឹកផងដែរថា ចិន បានបិទទីផ្សារនៃការនាំចេញចេក និងម្នាស់លើហ្វីលីពីនតាំងពីមានភាពតានតឹងនៅឆ្នាំ២០១២មកម្ល៉េះ។ ពេលនោះ ហ្វីលីពីន និងចិន បានមានការប៉ះទង្គិចផ្នែកការទូតជាមួយគ្នាលើបញ្ហាសមុទ្រចិនខាងត្បូងខ្លាំង ដែលពេលនោះដែរ ផ្លែឈើហ្វីលីពីនរាប់ពាន់តោន ត្រូវបានបំផ្លាញនៅកំពង់ផែរបស់ចិន។ ចិន គឺជាទីផ្សារធំបំផុតសម្រាប់ផលិតផលចេករបស់ហ្វីលីពីន។ បើយោងតាមការិយាល័យដាំដុះហ្វីលីពីន នៅឆ្នាំ២០១១ ហ្វីលីពីន បាននាំចេញចេកទៅកាន់ចិនក្នុងតម្លៃរហូតដល់៦០លានដុល្លារឯណោះ៕