ពលករខ្មែរ៤នាក់ទៀត ដែលរងគ្រោះនៅប្រទេសក្រៅ ត្រូវបានជួយឲ្យមកកម្ពុជាវិញ

ជាតិ

ពលករខ្មែរ៤នាក់ទៀត ដែលរងគ្រោះនៅប្រទេសក្រៅ ត្រូវបានជួយឲ្យមកកម្ពុជាវិញ

20, Oct 2016 , 8:58 pm

រូបភាព

ដោយ: សារព័ត៌មានថ្មីៗ

ភ្នំពេញ៖ ពលករខ្មែរ៤នាក់ ដែលរងគ្រោះនៅប្រទេសឥណ្ឌូនេស៊ី និងប្រទេសម៉ាឡេស៊ី ត្រូវបានក្រសួងការបរទេស ជួយសង្គ្រោះ និងរៀបចំបញ្ជូនមកកម្ពុជាវិញ។ នេះបើតាមសេចក្តីជូនដំណឹងរបស់ក្រសួងការបរទេស ដែលបានចុះនៅថ្ងៃទី២០ ខែតុលា ឆ្នាំ២០១៦ ។

បើតាមសេចក្តីជូនដំណឹងរបស់ក្រសួងការបរទេស ពលករខ្មែរ៣នាក់ ដែលមានស្រុកកំណើតនៅខេត្តព្រៃវែង ត្រូវបានអាជ្ញាធរនៃប្រទេសឥណ្ឌូនេស៊ី ឃាត់ខ្លួនក្នុងទូកនេសាទមួយគ្រឿង កាលពីខែកក្កដា ឆ្នាំ២០១៦ ហើយបន្ទាប់មកទើបដឹងថា ពួកគេជាជនរងគ្រោះក្នុងអំពើរត់ពន្ធមនុស្ស។ ក្រោយមក អាជ្ញាធរនៃប្រទេសឥណ្ឌូនេស៊ី ក៏បានដោះលែងអ្នកទាំង៣ខាងលើ តាមសំណើរបស់ស្ថានទូតកម្ពុជា។ ស្ថានទូតកម្ពុជាប្រចាំប្រទេសឥណ្ឌូនេស៊ី បានរៀបចំបញ្ជូនពលករខ្មែរទាំងនោះ មកកម្ពុជាវិញ កាលពីថ្ងៃទី១៩ ខែតុលា ឆ្នាំ២០។

ដោយឡែក ពលករខ្មែរ១រូបទៀត ដែលមានស្រុកកំណើតនៅខេត្តតាកែវ ត្រូវបានស្ថានទូតកម្ពុជាប្រចាំទេសម៉ាឡេស៊ី ជួយជ្រោមជ្រែង ដើម្បីឲ្យបានមកកម្ពុជាវិញ។ ដោយសារតែ ជួបភាពលំបាកខ្លាំងក្នុងការងារ ពលកររូបនេះ ក៏បានទៅពឹងពាក់ស្ថានទូតកម្ពុជាប្រឆាំប្រទេសម៉ាឡេស៊ី បានឲ្យមកមាតុភូមិវិញ។ តាមគម្រោង ពលកររូបនេះ ត្រូវមកដល់កម្ពុជា នៅម៉ោង៥ និង១០នាទីរសៀល នាថ្ងៃទី២០ ខែតុលា ឆ្នាំ២០១៦នេះ។

សូមរម្លឺកថា ពលករខ្មែរចំនួន ៥៧៣នាក់ ដែលរងគ្រោះនៅតាមប្រទេសនានា ត្រូវបានក្រសួងការបរទេស និងសហប្រតិបត្តិការអន្តរជាតិបានជួយសង្គ្រោះ និងនាំមកកម្ពុជាវិញ ក្នុងឆ្នាំ២០១៥ ។ ជុំវិញបញ្ហាចំណាកស្រុករបស់ពលករនេះ ក្រសួងការបរទេសនិងសហប្រតិបត្តិការ តែងអំពាវនាវម្តងហើយម្តងទៀតដល់ប្រជាពលរដ្ឋខ្មែរគ្រប់រូប ជាពិសេសស្ត្រីដែលងាយរងគ្រោះគួរស្វែងរកការងារដែលមានស្រាប់ ក្នុងស្រុកជាជាងការចំណាកស្រុកទៅធ្វើការនៅប្រទេសក្រៅដើម្បីចៀសវាង ការឃ្លាតឆ្ងាយពីក្រុមគ្រួសារនិងអាចជួបគ្រោះដោយការចាញ់បោកមេខ្យល់ ឬក្រុមហ៊ុន៕