កសិករនៅខេត្តព្រៃវែង កំពុងរងគ្រោះដោយសារជំនន់ទឹកភ្លៀង

ជាតិ

កសិករនៅខេត្តព្រៃវែង កំពុងរងគ្រោះដោយសារជំនន់ទឹកភ្លៀង

31, Oct 2016 , 9:19 pm

រូបភាព

រូបថតពីហ្វេសប៊ុកក្រសួងធនធានទឹក និងឧតុនិយម

ដោយ:

ភ្នំពេញ៖ ខណៈភ្លៀងនៅតែបន្តធ្លាក់ក្នុងបរិមាណច្រើននោះ បានធ្វើឲ្យស្ទើរគ្រប់ទីកន្លែងក្នុងខេត្តព្រៃវែង រងគ្រោះដោយសារជំនន់ទឹកភ្លៀង។ ជំនន់ទឹកភ្លៀងនេះ បានធ្វើឲ្យលិចស្រូវកសិករនៅស្រុកមួយចំនួនក្នុងខេត្តព្រៃវែង ដូចជា ស្រុកស្វាយអន្ទរ ស្រុកមេសាង និងស្រុកកំចាយមារ។ នេះបើយោងតាមទំព័រហ្វេសប៊ុក របស់ក្រសួងធនធានទឹក និងឧតុនិយម ចេញផ្សាយនៅថ្ងៃទី៣១ តុលានេះ។

ទំព័រហ្វេសប៊ុកខាងលើដដែល ដែលបានចុះផ្សាយពីរថ្ងៃជាប់ៗគ្នាមកនេះ បានឲ្យដឹងថា ភ្លៀងធ្លាក់ក្នុងបរិមាណច្រើនប្រមាណមួយសប្តាហ៍ បានធ្វើឲ្យស្ទើរគ្រប់ទីន្លែងនៅខេត្តព្រៃវែង មានជំនន់ទឹកភ្លៀង។ ជំនន់ទឹកភ្លៀង កំពុងបង្កការលំបាកយ៉ាងខ្លាំងដល់កសិករ ដែលកំពុង ប្រមូលស្រូវ។

បើតាមការចុះផ្សាយរបស់ ក្រសួងធនធានទឹក និងឧតុនិយម កាលពីថ្ងៃម្សិលមិញ បានសរសេរថា ជំនន់ទឹកភ្លៀង បានធ្វើឲ្យលិចស្រូវពលរដ្ឋនៅស្រុកស្វាយអន្ទរ ស្រុកមេសាង និងស្រុកកំចាយមារ។

ជុំវិញបញ្ហានេះ ក្រោយពីរំដោះទឹកចេញពីប្រឡាយវ៉ៃកូ បង្ហូរចូលទន្លេរួចមក លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជាឲ្យក្រុមការងារ កាត់ភ្លឺប្រឡាយមេវ៉ៃកូបន្ថែមទៀត ដើម្បីរំដោះទឹកចេញពីក្នុងស្រែ បង្ហូរចូលមកក្នុងប្រឡាយមេវិញ៕