អន្តរជាតិ
ទស្សនៈរបស់អ្នកកាសែតខ្មែរនៅអាមេរិក ចំពោះការប្រកួតប្រជែងរវាងលោក ត្រាំ និងអ្នកស្រី គ្លីនតុន ![](https://image.thmeythmey.com/pictures/2016/11/01/trum_hilary-1.jpg)
×![]()
អាមេរិក៖យុទ្ធនាការឃោសនាបោះឆ្នោតជ្រើសរើសប្រធានាធិបតីអាមេរិកនៅឆ្នាំ ២០១៦ នេះ ធ្វើឲ្យមានការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋអមេរិក និងប្រជាពលរដ្ឋនៅជុំវិញពិភពលោក ដោយសារបេក្ខជននៃគណបក្សធំៗទាំងពីរចូលចិត្តវាយប្រហារគ្នារឿងផ្ទាល់ខ្លួន។ ការបោះឆ្នោតជ្រើសរើសប្រធានាធិបតី នឹងឈានមកដល់នៅថ្ងៃទី ០៨ ខែវិច្ឆិកា ដ៏ខ្លីខាងមុខនេះ។ សារព័ត៌មានថ្មីៗបានសម្ភាសន៍អ្នកសារព័ត៌មានខ្មែរមួយចំនួន ដែលប្រចាំការនៅរដ្ឋធានីវ៉ាស៊ីនតោន អំពីទស្សនៈរបស់ពួកគេជុំវិញការបោះឆ្នោតលើកនេះ។
លោក សឹង សុផាត អ្នកយកព័ត៌មានរបស់វិទ្យុសំឡេងសហរដ្ឋអាមេរិក VOA បានប្រាប់សារព័ត៌មានថ្មីៗថា មូលហេតុដែលធ្វើឲ្យការបោះឆ្នោតជ្រើសរើសប្រធានាធិបតីអាមេរិកនៅអាណត្តិនេះទទួលការចាប់អារម្មណ៍ច្រើននោះ ដោយសារតែអត្តចរិតប្លែករបស់បេក្ខជនប្រធានាធិបតីនៃគណបក្សសាធារណរដ្ឋ។ ជាងនេះទៅទៀត លោក សុផាត បន្ថែមថា អត្តចរិតប្លែករបស់ លោក ត្រាំ នេះ ក៏ធ្វើឲ្យផ្លាស់ប្តូររបៀបឃោសនាបោះឆ្នោតរើសប្រធានាធិបតីលើកនេះផងដែរ។
«ខ្ញុំធ្លាប់ទាន់ការប្រកួតប្រជែងកាលពីអាណត្តិមុន គឺលោក អូបាម៉ា និងលោក មីត រ៉ូមនី។ ខ្ញុំចាំបានពេលនោះថា ការជជែកពិភាក្សាគ្នារវាងលោកទាំងពីរ ភាគច្រើនផ្តោតសំខាន់ទៅលើគោលនយោបាយរបស់បក្សទាំងពីរ មិនវាយប្រហារគ្នាជាលក្ខណៈបុគ្គលដូចបច្ចុប្បន្ន។ នេះជាការបញ្ជាក់របស់អ្នកកាសែតខាងលើដែលបានមករស់នៅសហរដ្ឋអាមេរិកតាំងពីឆ្នាំ ២០០៨ កាលនៅជានិស្សិត មុននឹងលោកបម្រើការងារនៅវិទ្យុសំឡេងសហរដ្ឋអាមេរិកនៅឆ្នាំ ២០១០ ។
សំឡេង លោក សឹង សុផាត
ទាក់ទងនឹងប្រព័ន្ធផ្សព្វផ្សាយនៅអាមេរិកវិញ លោក សឹង សុផាត ពន្យល់ថា នៅសហរដ្ឋអាមេរិក គេចាត់ទុកប្រព័ន្ធផ្សព្វផ្សាយជាក្រុមសេរីនិយម។ ក៏ប៉ុន្តែលោកថា នៅក្នុងអំឡុងពេលយុទ្ធានាការឃោសនាបោះឆ្នោតជ្រើសរើសប្រធានាធិបតីនៅអាណត្តិនេះ អ្នកគាំទ្របេក្ខជនប្រធានាធិបតីគណបក្សសាធារណរដ្ឋ ភាគច្រើនយល់ថា ប្រព័ន្ធផ្សព្វផ្សាយលម្អៀងទៅរកគណបក្សប្រជាធិបតេយ្យ។
ជាមួយគ្នានេះដែរ លោក ហួត វុទ្ធី ដែលប្រិយមិត្តអ្នកស្តាប់វិទ្យុអាស៊ីសេរីស្គាល់ថា ឈ្មោះ ជុន ចាន់បុត្រ នោះ បាននិយាយថា រូបលោក បានតាមដានការប្រកួតប្រជែងការបោះឆ្នោតរើសប្រធានាធិបតីលើកនេះយ៉ាងជិតដិត។ លោក ចាន់បុត្រ អនុប្រធានវិទ្យុអាស៊ីសេរីប្រចាំកម្ពុជា ដែលប្រចាំការនៅរដ្ឋធានីវ៉ាស៊ីនតោន ដែរនោះ កត់សម្គាល់ថា ទោះបីជាមានការវាយប្រហាររឿងផ្ទាល់ខ្លួនរវាងអ្នកស្រី ហ៊ីឡារី គ្លីនតុន និងលោក ដូណាល់ ត្រាំ ខុសប្លែកពីការប្រកួតប្រជែងបេក្ខជនបោះឆ្នោតរើសប្រធានាធិបតីអាមេរិកកន្លងទៅក្តី តែគ្មាននរណាម្នាក់ជាប់ពន្ធនាគារដោយសាររឿងនេះទេ។ អ្នកកាសែតវិទ្យុអាស៊ីសេរីដ៏ល្បីរូបនេះ លើកឡើងយ៉ាងដូច្នេះថា៖«ទោះមានការវាយប្រហារជាលក្ខណៈបុគ្គលទៅវិញទៅមកបែបណាក្តី ក៏គ្មាននរណា ត្រូវបានគេដាក់ទោស ឬចាប់ដាក់គុកនោះដែរ។ នេះបញ្ជាក់ពីភាពជឿនលឿននៃដំណើរការប្រជាធិបតេយ្យនៅក្នុងប្រទេសនេះ»។
ដោយឡែក លោក សាយ មុនី អ្នកយកព័ត៌មានរបស់វិទ្យុសំឡេងសហរដ្ឋអាមេរិកម្នាក់ទៀត ប្រចាំការនៅរដ្ឋធានី វ៉ាស៊ីនតោន ហាក់មិនភ្ញាក់ផ្អើលប៉ុន្មាននោះឡើយ ចំពោះការប្រកួតប្រជែងរបស់បេក្ខជនប្រធានាធិបតីនៃគណបក្សទាំងពីរ បើទោះបីជាលោកទទួលស្គាល់ថា អ្នកស្រី ហ៊ីឡារី គ្លីនតុន និងលោក ដូណាល់ ត្រាំ វាយប្រហារគ្នារឿងផ្ទាល់ខ្លួន និងប្រើយុទ្ធសាស្ត្រដើម្បីកេញចំណេញប្រជាប្រិយភាពរៀងៗខ្លួនក្តី។ លោក មុនី បានលើកឡើងនូវហេតុផលដូច្នេះថា៖« សម្រាប់ខ្ញុំ នៅពេលដែលខ្ញុំតាមដានការបោះឆ្នោតនៅអាមេរិក រាល់ការបោះឆ្នោតពីអាណត្តិមួយទៅអាណត្តិមួយ តែងតែប្លែកៗគ្នា។ ដូច្នេះ អាមេរិកអត់នៅដដែលទេ គេចេះតែទៅមុខ»។
សំឡេងលោក សាយ មុនី
សូមរម្លឹកថា ក្នុងអំឡុងពេលយុទ្ធនាការឃោសនាការបោះឆ្នោតជ្រើសរើសប្រធានាធិបតីអាមេរិក ជាពិសេសអំឡុងពេលជជែកដេញដោលគ្នា បេក្ខជននៃគណបក្សទាំងពីរ បានវាយប្រហារគ្នារឿងអាស្រូវផ្ទាល់ខ្លួន។ អ្នកស្រី ហ៊ីឡារី គ្លីនតុន បានលើកយករឿងសម្តីអាសគ្រាម និងរឿងអាស្រូវស្នេហារបស់លោក ដូណាល់ត្រាំ បេក្ខជនប្រធានាធិបតីនៃគណបក្សសាធារណរដ្ឋ មកវាយប្រហារ។ ចំណែក លោក ដូណាល់ ត្រាំ បានវាយប្រហាររឿងអាស្រូវស្នេហាស្វាមីរបស់អ្នកស្រី ហ៊ីឡារី គ្លីនតុន គឺលោក ប៊ីល គ្លីនតុន៕
© រក្សាសិទ្ធិដោយ thmeythmey.com