កីឡាជាតិ
លោក បែរ មករា ថាកម្ពុជាអាចដោះដូរកីឡាករ និងបង្កើតសាលាបាល់ទាត់ជាមួយជប៉ុន ![](https://image.thmeythmey.com/pictures/2016/11/09/be-makara_credit_.jpg)
×![]()
លោក បែរ មករា អ្នកចាត់ការទូទៅក្លិបបឹងកេតអង្គរ បានបញ្ជាក់ថា អាចនឹងមានការដោះដូរកីឡាកររវាងកម្ពុជា ជាមួយជប៉ុន និងបើកសាលាបង្ហាត់បាល់ទាត់រួមគ្នាមួយនៅកម្ពុជា។ ប៉ុន្តែអ្នកចាត់ការទូទៅក្លិបបឹងកេតអង្គរ មិនបញ្ជាក់ថាពេលណាទេ ត្រូវរង់ចាំមើលលទ្ធភាពជាក់ស្តែងនៃតម្រូវការកីឡាករ។
កម្ពុជាអាចនឹងមានការដោះដូរកីឡាករជាមួយជប៉ុនរវាងក្លិបបឹងកេតអង្គរ និងក្លិប Fujieda MYFC ដែលជាក្លិបក្របខណ្ឌលីកលំដាប់ទី៣របស់ជប៉ុនក្នុងពេលឆាប់ៗខាងមុខនេះ។ ប៉ុន្តែគម្រោងនេះ ត្រូវរង់ចាំមើលពីលទ្ធភាពតម្រូវការរបស់ក្លិបជប៉ុនជាមុនសិន ថាតើកីឡាករកម្ពុជាណាខ្លះដែលជប៉ុនត្រូវការ ហើយកីឡាករជប៉ុនណាខ្លះដែលកម្ពុជាត្រូវការ? នេះជាការលើកឡើងរបស់ លោក បែរ មករា អ្នកចាត់ការទូទៅក្លិបបឹងកេតអង្គរ នៅចំពោះមុខអ្នកកាសែត នៅឯព្រលានយន្តហោះ នៅថ្ងៃទី៨ ខែវិច្ឆិកា នៅពេលត្រឡប់មកពីជប៉ុនជាមួយ កីឡាករចាន់ វឌ្ឍនាកា។
លោក បែរ មករា បានឲ្យដឹងទៀតថា ក្រៅពីគម្រោងដោះដូរកីឡាករជាមួយក្លិប Fujieda MYFC (League J3) ក្លិបទាំងពីរក៏មានគម្រោងចង់បង្កើតសាលាបណ្តុះបណ្តាលបាល់ទាត់រួមគ្នាមួយនៅកម្ពុជាទៀតផង។ លើសពីនេះលោកក៏បានពិភាក្សាផងដែរលើបញ្ហាប្រកួតមិត្តភាពអន្តរជាតិរវាងក្រុមទាំងពីរ ប៉ុន្តែត្រូវមើលពីផែនការប្រកួតរបស់សហព័ន្ធកីឡាបាល់ទាត់កម្ពុជាជាមុនសិន។ បើតាម លោក មករា គម្រោងនេះអាចកើតឡើងក្នុងខែមករា ដើមឆ្នាំក្រោយ បើមានការស្រុះស្រួលគ្នា។
អ្នកចាត់ការទូទៅក្លិបបឹងកេតអង្គររូបនេះ បានឲ្យផងដែរថា ក្រៅពីកីឡាករ ចាន់ វឌ្ឍនាកា ក្លិបរបស់លោកនឹងបញ្ជូនកីឡាករវ័យក្មេងផ្សេងៗបន្ថែមទៀតឲ្យទៅហ្វឹកហាត់នៅជប៉ុន ប៉ុន្តែត្រូវរង់ចាំការអញ្ជើញរបស់ភាគីជប៉ុនជាមុនសិន។ លោក គិតថា វាជាឱកាសមួយដ៏ល្អសម្រាប់កីឡាករវ័យក្មេងរបស់បឹងកេងអង្គរក្នុងការអភិវឌ្ឍសមត្ថភាពរបស់ខ្លួន៕
Tag:
បាល់ទាត់
បែរ មករា
ក្លិបបាល់ទាត់
ជប៉ុន
© រក្សាសិទ្ធិដោយ thmeythmey.com