កីឡាជាតិ
ជាតិ
លោក Lee Tae Hoon៖ យើងត្រូវប្រឈមធំគ្រប់ការប្រកួត ប៉ុន្តែយើងត្រៀមខ្លួនរួចរាល់ហើយ ![លោក Lee Tae Hoon (ស្តាំ) និងគ្រូបង្វឹកម៉ាឡេស៊ី មីយ៉ាន់ម៉ា វៀតណាម នាសន្និសីទសារព័ត៌មានមួយថ្ងៃមុនជំនួបពូល B។ រូបថត FFC](https://image.thmeythmey.com/pictures/2016/11/19/lees.jpg)
លោក Lee Tae Hoon (ស្តាំ) និងគ្រូបង្វឹកម៉ាឡេស៊ី មីយ៉ាន់ម៉ា វៀតណាម នាសន្និសីទសារព័ត៌មានមួយថ្ងៃមុនជំនួបពូល B។ រូបថត FFC
×![]()
មួយថ្ងៃមុនជំនួបបើកឆាកជាមួយម៉ាឡេស៊ីក្នុងពូល B នៃព្រឹត្តិការណ៍ AFF Suzuki Cup នៅក្រុងយ៉ាំងហ្គោន ប្រទេសមីយ៉ាន់ម៉ា លោក Lee Tae Hoon គ្រូបង្វឹកនៃក្រុមកីឡាបាល់ទាត់ជម្រើសជាតិកម្ពុជា ទទួលស្គាល់ថា ក្រុមរបស់លោកស្ថិតក្នុងតំណាក់កាលមួយដ៏តឹងតែង និងដែលត្រូវជម្នះឲ្យបាន។
លោក Lee បានថ្លែងប្រាប់អ្នកសារព័ត៌មាននាសន្និសីទកាសែតនៅទីក្រុងយ៉ាំងហ្គោនថា៖ «គ្រប់ការប្រកួតគឺជាការប្រឈមដ៏ធំរបស់យើង ប៉ុន្តែយើងទាំងអស់គ្នាបានត្រៀមខ្លួនរួចរាល់ហើយ »។
សម្រាប់ជំនួបបើកឆាកពូល B នៃព្រឹត្តិការណ៍ AFF Suzuki Cup ឆ្នាំ២០១៦ ជាមួយម៉ាឡេស៊ី នៅកីឡដ្ឋាន Thuwunna Stadium ក្នុងទីក្រុងយ៉ាំងហ្គោន ប្រទេសមីយ៉ាន់ម៉ា នារសៀលថ្ងៃទី២០ ខែវិច្ឆិកា លោក Lee រំពឹងថា ក្រុមរបស់លោកនឹងធ្វើបានល្អដើម្បីសាងទំនុកចិត្តសម្រាប់ការប្រកួតបន្តបន្ទាប់ទៀតជាមួយម្ចាស់ផ្ទះមីយ៉ាន់ម៉ា និងវៀតណាម។
ការឈានមកដល់វគ្គ Group Stage ត្រូវបានគ្រូបង្វឹកកូរ៉េខាងត្បូងវាយតម្លៃថា ជាដំណាក់កាលមួយដ៏អស្ចារ្យរបស់ក្រុមកម្ពុជា ក្រោយអវត្តមានចាប់តាំងពីឆ្នាំ២០០៨មក។ នាវត្តមានកន្លងមកនៅវគ្គ Group Stage កម្ពុជាមិនដែលទទួលបានលទ្ធផលល្អឡើយ ខណៈគូប្រជែងវៀតណាម និងម៉ាឡេស៊ី ធ្លាប់ឈ្នះជើងឯកម្នាក់១លើក រីឯម្ចាស់ផ្ទះមីយ៉ាន់ម៉ា បានឈានដល់វគ្គពាក់កណ្តាលផ្តាច់ព្រ័ត្រ កាលពីឆ្នាំ២០០៤ ៕
Tag:
បាល់ទាត់
ជម្រើសជាតិកម្ពុជា
AFF Suzuki Cup
© រក្សាសិទ្ធិដោយ thmeythmey.com