ជាតិ
លោក ជា សុផារ៉ា នឹងដឹកនាំក្រុមការងារចុះស្រង់ស្ថិតិ ដើម្បីផ្ដល់វិញ្ញាបនបត្រដល់ម្ចាស់ចំណែកឯកជន នៅអាគារប៊ូឌីង ![](https://image.thmeythmey.com/pictures/2016/11/22/chea_sophara.jpg)
×![]()
ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ បានរៀបចំក្រុមការងាររួចរាល់ហើយ ដើម្បីចុះស្រង់ស្ថិតិពីប្រជាពលរដ្ឋដែលរស់នៅ«អាគារប៊ូឌីង ស» ក្នុងគោលដៅផ្ដល់វិញ្ញាបនបត្រសម្គាល់ដល់ម្ចាស់ចំណែកឯកជននៃអាគារសហកម្មសិទ្ធិនេះ។ ក្រសួងរៀបចំដែនដី នគរូបនីយកម្ម និងសំណង់ និងក្រុមហ៊ុនជប៉ុន Arakawa គ្រោងអភិវឌ្ឍនៅទីតាំងអគារប៊ូឌីង ក្នុងទឹកប្រាក់ពី ៧០លានដុល្លារ ទៅ ៨០លានដុល្លារ។
សេចក្ដីប្រកាសរបស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី២១ វិច្ឆិកា បានឲ្យដឹងថា ក្រសួងបានរៀបចំក្រុមការងារចំនួន១៧១ក្រុម ស្មើនឹង៥៦៩នាក់ ដែលនឹងត្រូវចុះស្រង់ព័ត៌មានរបស់ម្ចាស់ចំណែកឯកជនទាំងអស់នៃអាគារប៊ូឌីង ស នៅថ្ងៃទី០៣ ធ្នូខាងមុខ។ រដ្ឋមន្ត្រីក្រសួងរៀបចំដែនដី លោក ជា សុផារ៉ា ក៏ចុះតាមដានការស្រង់ព័ត៌មានពីប្រជាពលរដ្ឋដែលរស់នៅអាគារប៊ូឌីញនេះដែរ ដើម្បីឃ្លាំមើលការស្រង់ព័ត៌មានដោយតម្លាភាព។ «ខ្ញុំនឹងដឹកនាំក្រុមចុះស្រង់ស្ថិតិជាមួយប្រជាពលរដ្ឋដោយផ្ទាល់ នៅក្នុងពេលឆាប់ៗខាងមុខនេះ »។ នេះបើតាមការសរសេរលើហ្វេសប៊ុករបស់លោក ជា សុផារ៉ា។
ចំពោះការចុះស្រង់ស្ថិតិនេះគឺផ្ដល់ជូនតែពលរដ្ឋដែលរស់នៅពិតប្រាកដ នៅក្នុងអាគារប៊ូឌីងនេះប៉ុណ្ណោះ សម្រាប់អ្នកជួលបន្ទប់ស្នាក់នៅវិញ មិនតម្រូវឲ្យស្រង់ព័ត៌មានឡើយ។ ហើយម្ចាស់ឯកជនចំណែកសហកម្មសិទ្ធិនៃអាគារប៊ូឌីញ ត្រូវផ្ដល់ព័ត៌មានជាក់លាក់ដល់ក្រុមការងារក្រសួង ដោយភ្ជាប់ជាមួយឯកសារថតចម្លងអត្តសញ្ញាណប័ណ្ណ សៀវភៅស្នាក់នៅ, សៀវភៅគ្រួសារ និងឯកសារពាក់ព័ន្ធជាដើម។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់លោក ជា សុផារ៉ា បានបញ្ជាក់ប្រាប់ពលរដ្ឋក្នុងពិធីជួបជជែកស្ដីពីការអភិវឌ្ឍអគារប៊ូឌីងកាលពីថ្ងៃទី០៨ វិច្ឆិកាថា ក្រសួងនិងក្រុមហ៊ុនជប៉ុន Arakawa គ្រោងអភិវឌ្ឍទីតាំងអគារប៊ូឌីងនៅនឹងកន្លែង ក្នុងទឹកប្រាក់ពី ៧០លានដុល្លារ ទៅ ៨០លានដុល្លារ។ ការអភិវឌ្ឍអាគារនេះ ដោយសាងសង់អគារកម្ពស់ ២១ជាន់ ដែលត្រូវការរយៈពេលសាងសង់ជាង ៣ឆ្នាំ។ ហើយបើគ្មានការប្រែប្រួលនោះទេ ការសាងសង់អគារថ្មីលើដីអគារប៊ូឌីងនេះ នឹងចាប់ផ្ដើមនៅដើមឆ្នាំ២០១៧ខាងមុខ ។
បើតាមលោក ជា សុផារ៉ា នៅពេលសាងសង់នោះ ក្រសួងនឹងរៀបចំកន្លែងផ្សេងទៀតសម្រាប់ឲ្យពលរដ្ឋស្នាក់នៅបណ្ដោះអាសន្នដែលមានទីតាំងស្ថិតនៅក្នុងសង្កាត់ទឹកថ្លា ក្រុងភ្នំពេញ ទសម្រាំគម្រោងសាងសង់អគារប៊ូឌីងថ្មីបញ្ចប់។ ប៉ុន្តែសម្រាប់ពលរដ្ឋដែលមិនយល់ស្របនឹងគម្រោងវិនិយោគនេះ ពួកគេអាចមានជម្រើសយកទឹកប្រាក់ប្រមាណ ៦ម៉ឺនដុល្លារ សម្រាប់មួយគ្រួសារ៕
Tag:
ជា សុផារ៉ា
អាគារប៊ូឌីង ស
© រក្សាសិទ្ធិដោយ thmeythmey.com