ជាតិ
សេដ្ឋកិច្ច
នយោបាយជាតិ
ឯកឧត្តម កឹម សុខា ផ្តល់អនុសាសន៍៤ចំណុច ដើម្បីប្រសិទ្ធភាពថវិកាជាតិឆ្នាំ២០១៧ ![](https://image.thmeythmey.com/pictures/2016/11/22/an-and-kem-soka.jpg)
×![]()
រដ្ឋសភា បានអនុម័តច្បាប់ថវិកាជាតិឆ្នាំ២០១៧ នៅល្ងាចថ្ងៃទី២២ ខែវិច្ឆិកានេះ។ ឯកឧត្តម កឹម សុខា ក៏បានផ្តល់អនុសាសន៍ចំនួន៤ចំណុច ទៅដល់រដ្ឋាភិបាល ដើម្បីបង្កើនគុណភាព និងប្រសិទ្ធភាពនៃកាប្រើប្រាស់ថវិកាជាតិឆ្នាំ២០១៧ ដែលទើបតែអនុម័តនេះ។
ឯកឧត្តមកឹម សុខា បានផ្តល់អនុសាសន៍ចំនួន៤ចំណុច ទៅដល់រដ្ឋាភិបាល ដើម្បីបង្កើនគុណភាព និងប្រសិទ្ធភាពនៃកាប្រើប្រាស់ថវិកាជាតិឆ្នាំ២០១៧ ។ អនុសាសន៍ជិត៣ទំព័រ ដែលមិនបានចុះកាលបរិច្ឆេទនេះ ត្រូវបានបង្ហោះក្នុងទំព័រហ្វេសប៊ុករបស់ឯកឧត្តម កឹម សុខា ក្រោយរដ្ឋសភាបានអនុម័តច្បាប់ថវិកាជាតិឆ្នាំ២០១៧ ដោយមានតែតំណាងគណបក្សប្រជាជនកម្ពុជាលើកដៃនោះ។
អនុសាសន៍ចំនួន៤ចំណុចរបស់អនុប្រធានគណបក្សសង្គ្រោះជាតិ រួមមាន៖ ១. តម្លាភាព និងគណនេយ្យភាព ក្នុងការគ្រប់គ្រង និងប្រើប្រាស់ ២. ការគ្រប់គ្រងបំណុល ៣. ការបែងចែកថវិកាជាតិ និងទី៤ ការគ្រប់គ្រងចំណូលជាតិ។
នៅចំណុចទី១ និយាយពីតម្លាភាព និងគណនេយ្យភាព ក្នុងការគ្រប់គ្រង និងប្រើប្រាស់ថវិកាជាតិ គឺសំដៅដល់ឯករាជ្យភាពនៃអាជ្ញាធរសវនកម្មជាតិពីរាជរដ្ឋាភិបាល និងគណបក្សនយោបាយ ការបើកចំរព័ត៌មាន និងតួលេខផ្សេងៗពាក់ព័ន្ធនឹងថវិកាជាតិ និងការត្រៀមសហការក្នុងការផ្តល់ព័ត៌មាន និងតួលេខក្នុងករណីដែលមានការស្នើសុំពីអ្នកសាព័រមាន អ្នកស្រាវជ្រាវ ក៏ដូចជាប្រជាពលរដ្ឋទូទៅ ពីស្ថាប័នជាតិនីមួយៗ។ នៅចំណុចនេះ អនុប្រធានបក្សសង្គ្រោះជាតិ សំដៅដល់ការបង្កើនតម្លាភាព និងគណនេយ្យភាព ក្នុងការដេញថ្លៃពីក្រុមហ៊ុនឯកជន សម្រាប់គម្រោងនានា ដែលប្រើប្រាស់ថវិកាជាតិ និងការពង្រីកអំណាចវិមជ្ឈការ ក្នុងការគ្រប់គ្រងថវិកាដោយពង្រីកការទទួលខុសត្រូវលើថវិកានៅក្នុងថ្នាក់មូលដ្ឋាន ហើយក៏តម្រូវឲ្យថ្នាក់មូលដ្ឋាន អនុវត្តទៅតាមស្តង់ដារ តម្លាភាព និងគណនេយ្យភាពដូចថ្នាក់ជាតិដែរ។
ជុំវិញការគ្រប់គ្រងបំណុលវិញ គឺសំដៅដល់ការប្រើប្រាស់ថវិកាចំណូលដោយការខ្ចីបំណុល ត្រូវផ្តោតទៅលើ ការវិនិយោគទៅលើប្រព័ន្ធសំខាន់ៗ ដូចជាហេដ្ឋារចនាសម្ព័ន្ធ ប្រព័ន្ធអប់រំ ការស្រាវជ្រាវ និងពង្រឹងវិស័យសេដ្ឋកិច្ច-ល-។ បន្ថែមពីនេះ ថវិកាចំណូលដោយការខ្ចីបំណុលពុំគួរយកមកប្រើប្រាស់ទៅលើការិយាល័យធិបតេយ្យ និងខ្ទង់ចំណាយណាដែលមិនអាចបង្កើតចំណូលជូនជាតិ និងប្រជាពលរដ្ឋ ព្រោះប្រាក់កម្ចីគួរតែប្រើប្រាស់ទៅការវិនិយោគ មិនមែនសម្រាប់បំប៉នការិយាល័យធិបតេយ្យ។ អនុសាសន៍ដដែលបន្តថា ថវិកាសម្រាប់ដំណើរការរបស់ស្ថាប័នរដ្ឋនានា គួរពឹងផ្អែកទៅលើប្រាក់ចំណូលសារពើពន្ធ ឬជំនួយឥតសំណង ដូច្នេះទំហំនៃស្ថាប័នជាតិ គួរតែលៃតម្រូវទៅតាមចំណូលជារៀងរាល់ឆ្នាំ ដោយមិនពឹងផ្អេកទៅចំណូលពីកម្ចី។
ទាក់ទងនឹងការបែងចែកថវិកាជាតិ ត្រូវផ្តោតទៅលើចក្ខុវិស័យវែងឆ្ងាយ ដើម្បីភាពប្រកួតប្រជែងជាតិ និងអភិវឌ្ឍសេដ្ឋកិច្ច ដែលមាននិរន្តរភាព ដែលមានចំណុចសំខាន់ៗដូចជា ការអភិវឌ្ឍន៍លើធនធានមនុស្ស និងបណ្តុះបណ្តាលវិជ្ជាជីវៈ អភិវឌ្ឍន៍ និងវិនិយោគលើហេដ្ឋារចនាសម្ព័ន្ធ និងការពង្រឹងអភិបាលកិច្ច និងសមត្ថភាពនៃស្ថាប័ន។ នេះគឺជាអ្វីដែល ឯកឧត្តម កឹម សុខា បានលើកឡើងនៅក្នុងអនុសាសន៍ចំណុចទី៣ របស់ខ្លួន។ រីឯ អនុសាសន៍ទី៤ អំពីការគ្រប់គ្រងចំណូលជាតិ គឺរួមមានទប់ស្កាត់ការគេចពន្ធ បង្កើនប្រសិទ្ធភាព និងតម្លាភាពក្នុងការប្រមូលពន្ធដារ និងការប្រមូលថវិកាពីសម្បទានធនធានជាតិនានា។
សូមបញ្ជាក់ថា នៅថ្ងៃទី២២វិច្ឆិកា រដ្ឋសភា បានសម្រេចអនុម័តថវិកាជាតិចំនួន២០,១៨៤,៤៥៧លានរៀល ស្មើជាង ៥ពាន់លានដុល្លារ សម្រាប់ចំណាយលើវិស័យនានា ក្នុងឆ្នាំ២០១៧ ។ បើតាមសេចក្តីព្រាងច្បាប់ស្តីពីការគ្រប់គ្រងឆ្នាំ២០១៧ ថវិកានេះ ផ្តោតលើការចំណាយបុគ្គលិក វិស័យការពារជាតិ សន្តិសុខ និងសណ្តាប់ធ្នាប់សាធារណៈ វិស័យសេដ្ឋកិច្ច និងវិស័យសង្គមកិច្ច៕
Tag:
ថវិកាជាតិ
កឹម សុខា
© រក្សាសិទ្ធិដោយ thmeythmey.com