ជាតិ
សម្ដេច ហ៊ុន សែន ថាទំនប់វារីអគ្គិសនីដនសាហុង មិនប៉ះពាល់ដល់កម្ពុជាឡើយ តែNGO ថា ប៉ះពាល់…
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានលើកឡើងថា ការសាងសងទំនប់វារីអគ្គិសនីដនសាហុង មិនមានអ្វីដែលជាបញ្ហាចោទដល់ប្រទេសកម្ពុជាឡើយ។ សម្ដេច ហ៊ុន សែន ថ្លែងក្នុងជំនួបទ្វេរភាគីជាមួយនាយករដ្ឋមន្ត្រីឡាវ លោក ថោងលូន ស៊ីស៊ូលីត នៅខេត្តសៀមរាប។តែសម្រាប់នាយកប្រតិបត្តិវេទិកាអង្គការក្រៅរដ្ឋាភិបាល (NGOs Forum) ទំបន់វារីអគ្គីសនីនេះមិនមានផលចំណេញដល់កម្ពុជាទេ តែវាធ្វើឲ្យពលរដ្ឋខ្មែរជាច្រើនគ្រួសារដែលរស់នៅតាមដងទន្លេមេគង្គនេះរងផលប៉ះពាល់ដល់ជីវភាពទៅវិញ។
បញ្ហាសំខាន់ៗជាច្រើនត្រូវបានលើកឡើងនៅក្នុងជំនួបរវាងសម្ដេច ហ៊ុន សែន និងនាយរដ្ឋមន្ត្រីឡាវ ដែលក្នុងនោះរួមមានបញ្ហាទំនប់វារីអគ្គិសនីដនសាហុងផងដែរ។ ជុំវិញបញ្ហាទំបន់វារីអគ្គិសនីដនសាហុងនេះ ត្រូវបានសម្ដេច ហ៊ុន សែន បកស្រាយគាំទ្រឡាវថា គម្រោងនៃការសាងសង់ទំនប់វារីនេះ គឺមិនមានបញ្ហាអ្វីចោទធ្ងន់ធ្ងរដល់កម្ពុជាឡើយ ក្រោយពីរដ្ឋាភិបាលបានសិក្សាលើគម្រោងនេះ។ជាមួយគ្នានេះសម្តេច ហ៊ុន សែន សាទរចំពោះភាគីឡាវ ដែលបានសន្យាលក់អគ្គិសនីក្នុងតម្លៃថោក សម្រាប់កម្ពុជាផ្គត់ផ្គងនៅតាមបណ្តាខេត្តដែលជាប់ព្រំដែន នឹងទំបន់វារីអគ្គិសនីនេះផងដែរ។
ក្រោយពីជំនួបជាមួយនាយករដ្ឋមន្ត្រីឡាវលោក ថោងលូន ស៊ីស៊ូលីត លោកសម្ដេចនាយករដ្ឋមន្ត្រី ហ៊ុន សែន បានសរសេរលើហ្វេសប៊ុកខ្លួនយ៉ាងដូច្នេះថា៖«ពាក់ព័ន្ធនឹងតំបន់វារីអគ្គិសនីដនសាហុង គឺក្រោយពីភាគីកម្ពុជាបានពិនិត្យស្ថានភាពនៅទីនោះរួចហើយ គឺមិនមានបញ្ហាលើគម្រោងអភិវឌ្ឍនេះឡើយ។ ចំពោះការព្រួយបារម្ភរបស់កម្ពុជាអំពីកង្វះខាតទឹក ឬចលនារស់រានរបស់ត្រីក៏មិនមានការប៉ះពាល់ដែរ នៅពេលនេះ ឡាវបានចាប់ដំណើរការសាងសង់ គម្រោងវារីអគ្គិសនីនេះហើយ»។
នាយកប្រតិបត្តិវេទិកាអង្គការក្រៅរដ្ឋាភិបាល NGOs Forum លោក តឹក វណ្ណារ៉ា មិនគាំទ្រចំពោះការឡើងរបស់សម្ដេច ហ៊ុន សែន ឡើយ។ លោក តឹក វណ្ណារ៉ា ដែលតែងតែចេញមុខបកស្រាយពីផលប៉ះពាល់នៃទំបន់វារីអគ្គិសនីដនសាហុងនេះ អះអាងថា ទំបន់វារីអគ្គិសនីនេះមិនមានផលចំណេញអ្វីដល់កម្ពុជាច្រើនទេ តែវាធ្វើឲ្យពលរដ្ឋខ្មែរជាច្រើនគ្រួសារដែលរស់នៅតាមដងទន្លេមេគង្គនេះរងផលប៉ះពាល់ដល់ជីវភាពទៅវិញ។ ថ្លែងប្រាប់សារព័ត៌មានថ្មីៗ នាយកប្រតិបត្តិវេទិកាអង្គការក្រៅរដ្ឋាភិបាលរូបនេះ បានបញ្ជាក់ដូច្នេះថា៖«យើងស្នើឲ្យរដ្ឋាភិបាលសិក្សាបែបវិទ្យាសាស្ត្រឲ្យបានស៊ីជម្រៅ និងបកស្រាយឲ្យបានច្បាស់លាស់។ ព្រោះផលប៉ះពាល់នៃទំនប់វារីអគ្គិសនីដនសាហុងនេះ ដែលធ្វើឲ្យបាត់បង់ដល់ធនធានជលផលមច្ឆាជាតិរួម និងប៉ះពាល់ដល់ពលរដ្ឋដែលប្រកបរបរនេសាទត្រី ។ ដូច្នេះរដ្ឋាភិបាលត្រូវធ្វើកិច្ចការដោយបច្ចេកទេស ចៀសវាងដើម្បីតែការដោះដូរសេដ្ឋកិច្ច សង្គមកិច្ច និងនយោបាយខ្លួននោះ ធ្វើឲ្យប៉ះពាល់ដល់ជីវភាពពលរដ្ឋក្រីក្រ…។ ពួកគេអ្នកមាន គេមិនយល់ពីបញ្ហាពលរដ្ឋក្រីក្រឡើយ»។
ទាក់ទងនឹងបញ្ហាជីវភាពពលរដ្ឋនៅតាមដងទន្លេមេគង្គនេះ សារព័ត៌មានថ្មីៗធ្លាប់បានចុះជួបសម្ភាសន៍ផ្ទាល់ជាមួយលោក ឡី លីន អ្នកភូមិអន្លង់ស្វាយ ក្នុងស្រុកថាឡាបរិវ៉ាត់ នៃខេត្តស្ទឹងត្រែង ដែលរងផលប៉ះពាល់នៃការសាងសងទំនប់វារីអគ្គិសនីរបស់រដ្ឋាភិបាលឡាវនេះ។ លោក ឡី លីន ដែលជាអ្នកប្រកបរបរនេសាទត្រីម្នាក់នោះ បានផ្លាស់ប្ដូររបរខ្លួននេះ ហើយមកប្រកបរបរកើបខ្សាច់ ដើម្បីលក់ឲ្យក្រុមអ្នកធ្វើសំណង់នៅក្នុងភូមិវិញ។ សម្រាប់លោក ឡី លីន ទំនប់វារីអគ្គិសនីរបស់ឡាវនេះ បានធ្វើឲ្យផលនេសាទថយចុះខ្លាំង ទើបលោកបង្ខំចិត្តឈប់ប្រកបរបរនេសាទ។ បើតាមបុរសកូន៥រូបនេះ របរកើបខ្សាច់លក់ មិនអាចជួយទ្រទ្រង់ជីវភាពខ្លួនគ្រួសារ ដូចរបរនេសាទត្រីឡើយ។ លោក ឡី លីន បានរៀបរាប់យ៉ាងដូច្នេះថា៖ «ពីរបីឆ្នាំនេះ រកត្រីលែងសូវបាន ទើបខ្ញុំកើបខ្សាច់លក់ ព្រោះខ្ញុំត្រូវចិញ្ចឹមកូន៥នាក់ និងប្រពន្ធ។ អត់ជម្រើសទេ ខ្ញុំអត់ដឹងរកអីផ្សេងក្រៅពីខ្សាច់នេះទេ»។
គួរបញ្ជាក់ថា ទំនប់វារីអគ្គិសនីដន សាហុង មានចំងាយ១៥០០ម៉ែត្រប៉ុណ្ណោះពីព្រំដែនប្រទេសកម្ពុជា។ ហើយការសាងសង់ទំនប់វារីអគ្គិសនីនេះ ត្រូវបានអ្នកសិក្សាស្រាវជ្រាវមើលឃើញថា ប្រទេសកម្ពុជា គឺជាអ្នកទទួលរងផលប៉ះពាល់ធ្ងន់ធ្ងរជាងគេ ជាពិសេសជីវភាពរស់នៅរបស់ប្រជាពលរដ្ឋនៅតំបន់នោះ ការបាត់បង់សត្វផ្សោតដែលជិតផុតពូជ និងជីវចម្រុះក្នុងទឹកផ្សេងៗទៀត៕
Tag:
អគ្គីសនីដនសាហុង
ហ៊ុន សែន
© រក្សាសិទ្ធិដោយ thmeythmey.com