អន្តរជាតិ
លោក អូបាម៉ា នឹងចេញពីតំណែងទាំងមិនស្ងប់ចិត្ត ![](https://image.thmeythmey.com/pictures/2016/12/27/3-dyma.jpg)
×![]()
ប្រធានាធិបតីជិតផុតអាណត្តិ បារ៉ាក់ អូបាម៉ា ត្រៀមខ្លួនហើយក្នុងការចាកចេញពីតំណែងនិងផ្ទេរអំណាច ថ្វីបើលោកមិនស្ងប់ចិត្តក៏ដោយ។ ក្នុងបទសម្ភាសន៍មួយចុងក្រោយ ពាក់ព័ន្ធជីវិតនយោបាយ លោក បារ៉ាក់ អូបាម៉ា បានបញ្ជាក់ថា ក្រោយចេញពីតំណែង លោកត្រូវការភាពស្ងៀមស្ងាត់ផ្លូវអារម្មណ៍មួយរយៈ មុនផ្តើមការងារ។ បន្ទាប់មក លោកនឹងផ្តោតអារម្មណ៍សរសេរសៀវភៅ, ដើរលំហែកាយជាមួយភរិយានិងកូន និងបន្តសកម្មភាពនានាដែលជំរុញក្មេងជំនាន់ក្រោយកសាងភាពជាអ្នកដឹកនាំនិងប្រឡូកក្នុងវិស័យនយោបាយឲ្យកាន់តែជ្រៅនិងសកម្ម។
សូមស្តាប់ការបកស្រាយរបស់លោក សៅ ផលនិស្ស័យ៖
**audio2**
នៅសល់មិនដល់មួយខែឡើយ ប្រធានាធិបតីជិតផុតអាណត្តិលោក បារ៉ាក់ អូបាម៉ា នឹងចាកចេញពីតំណែង។ លោកនិងភរិយាប្រហែលជាត្រៀមខ្លួនរួចរាល់ហើយ ដើម្បីចាកចេញពីសេតវិមានដែលខ្លួនធ្លាប់រស់នៅអស់ពេល ២អាណត្តិដែលស្មើ ៨ឆ្នាំមកនោះ។ លោកមិនស្រួលអារម្មណ៍ និងស្ងប់ចិត្តឡើយ ព្រោះលោកនឹងផ្ទេរអំណាចឲ្យអ្នកស្នងតំណែងប្រធានាធិបតីទើបជាប់ឆ្នោត ដែលលោកធ្លាប់ហៅថាជាមនុស្សដែលមិនស័ក្តិសមជាប្រធានាធិបតីអាមេរិកនោះ។
យ៉ាងណាក៏ដោយ លោកបានរៀបចំផែនការរួចទៅហើយ សម្រាប់អនុវត្តន៍ពេលលោកចេញពីសេតវិមាន ហើយលោកនឹងមានពេលវេលាកាន់តែច្រើន ក្នុងការចែករំលែកបទពិសោធន៍ដែលលោកមានក្នុងនាមជាប្រធានាធិបតី ទៅដល់យុវជនជំនាន់ក្រោយជាដើម។ លោកមិនចង់ធ្វើជាអ្នកនយោបាយដែលធ្លាប់ធ្វើជាប្រធានាធិបតី តែមិនធ្វើអ្វីសោះឲ្យចម្រើនដល់យុវជនជំនាន់ក្រោយឡើយ។
១. មិនស្តាយស្រណោះកៅអីប្រធានាធិបតី តែដើរចេញទាំងខកចិត្ត
ក្នុងបទសម្ភាសន៍មួយជាលើកចុងក្រោយជាមួយលោក David Axelrod ដែលចុះផ្សាយនៅសារព័ត៌មាន CNN លោក បារ៉ាក់ អូបាម៉ា អធិប្បាយថា អ្នកនយោបាយបក្សប្រជាធិបតេយ្យមិនបានប្រាស្រ័យទាក់ទង ជាមួយប្រជាជនអាមេរិកជាអ្នកបោះឆ្នោតបានល្អឡើយ។ ដូច្នេះហើយវាធ្វើឲ្យគណបក្សបរាជ័យធំធេង។ ពាក់ព័ន្ធការបោះឆ្នោតប្រធានាធិបតី លោកអះអាងថា លោកប្រហែលជាយកជ័យជម្នះលើលោក ដូណាល់ ត្រាំ ក្នុងការបោះឆ្នោតកាលពីខែវិច្ឆិកា បើសិនជាលោកអាចឈរឈ្មោះបានសម្រាប់អាណត្តិទី៣ នោះ។ លោកមានទំនុកចិត្តថា លោកអាចផ្ទេរសារនយោបាយដែលសំខាន់ដល់ប្រជាជនអាមេរិក និងទាញឲ្យប្រជាជនអាមេរិកភាគច្រើនគាំទ្រលោកបាន។
ប៉ុន្តែភ្លាមៗនោះលោក ដូណាល់ ត្រាំ បានចេញមុខឆ្លើយតបលោក អូបាម៉ា វិញថា «គ្មានផ្លូវ»ឡើយ។ ប្រធានាធិបតីទើបជាប់ឆ្នោត បានឆ្លៀតទិតៀនលោក បារ៉ាក់ អូបាម៉ា ដោយលោកទាញយកមរតកនយោបាយចម្រូងចម្រាសជាច្រើនរបស់លោក អូបាម៉ា មានក្រុមភេរវជនរដ្ឋឥស្លាម (Daesh),បញ្ហាសេដ្ឋកិច្ច, បញ្ហាប្រព័ន្ធសុខាភិបាលដែរ។
ជារួម មិនមែនលោក អូបាម៉ា អាឡោះអាល័យតំណែង ឬកៅអីដែលលោកធ្លាប់កាន់អស់ ៨ឆ្នាំមកនេះទេ ប៉ុន្តែលោកមិនស្រួលចិត្ត ដែលអ្នកនឹងមកជំនួសតំណែងលោកជាមនុស្សដែលលោកធ្លាប់ចោទថាជា មនុស្សមិនស័ក្តិសមនឹងតំណែងប្រធានាធិបតីនោះ។ លោក អូបាម៉ា ខកចិត្តនៅពេលដែលអាណត្តិរបស់លោកចប់ ស្របពេលដែលគណបក្សរបស់លោកនៅតែចាញ់នោះ។ រឿងទាំងអស់នេះហើយ ដែលធ្វើឲ្យលោកចាកចេញទាំងមិនអស់ចិត្តនោះ។
២.ក្រោយចេញពីតំណែង លោក អូបាម៉ា «មិនធ្វើជាតាចាស់អង្គុយផឹកនៅបា»
លោក បារ៉ាក់ អូបាម៉ា នឹងចាកចេញពីតំណែងនៅវ័យ ៥៥ឆ្នាំ ហើយលោកនឹងក្លាយជាប្រធានាធិបតី ដែលមានវ័យក្មេងបំផុតដែលចាកចេញពីសេតវិមាន។ វាជារឿងល្អសម្រាប់លោកព្រោះលោកចង់មានពេលវេលាច្រើនសម្រាប់ធ្វើការងារសង្គម និងប្រើប្រាស់ពេលវេលាដែលលោកសល់ក្រោយចេញពីសេតវិមាននេះ ជួយយុវជនជំនាន់ក្រោយផង។ លោកបានរៀបចំផែនការរួចរាល់ហើយ ហើយផែនការទាំងនោះនឹងត្រូវអនុវត្តក្រោយថ្ងៃ ២០ មករា។
ក្នុងបទសម្ភាសន៍ដដែល លោក បារ៉ាក់ អូបាម៉ា បាននិយាយកំប្លែងលេងថា លោកមិនចង់ក្លាយជាតាចាស់ដែលអង្គុយផឹកនៅបាឡើយ។ មានន័យថា លោកមិនធ្វើជាមនុស្សចាស់ដែលចំណាយពេលវេលាគ្មានប្រយោជន៍ឡើយ។ លោកមានរឿងច្រើន ដែលត្រូវធ្វើក្រោយថ្ងៃ ២០ មករា ក្នុងនោះមានទាំងការសំងំសរសេរសៀវភៅ និងធ្វើឲ្យខ្លួនឯងមានសេចក្តីស្ងប់ផ្លូវចិត្តផងដែរ។
លោកថ្លែងថា៖ «ខ្ញុំគិតថា ថ្ងៃ ២១មករា ខ្ញុំនឹងដេក និងនាំភរិយាខ្ញុំទៅកម្សាន្តវិស្សមកាល ហើយខ្ញុំនឹងចាប់ផ្តើមផ្តោតអារម្មណ៍សរសេរសៀវភៅ ដែលខ្ញុំចង់សរសេរ និងរក្សាភាពស្ងៀមស្ងាត់មួយរយៈ»។
ពាក់ព័ន្ធនឹងការរក្សាភាពស្ងៀមស្ងាត់នេះ លោក អូបាម៉ា ប្រញាប់ពន្យល់ថា វាជាការស្ងៀមស្ងាត់ក្នុងចិត្តប៉ុណ្ណោះ មិនមែនស្ងៀមស្ងាត់រឿងនយោបាយឡើយ។ អាចថា លោកនិយាយការពារទុកមុន ព្រោះលោកអាចនឹងចេញមុខ ពេលដែលលោក ដូណាល់ ត្រាំ ធ្វើរឿងមិនសមរម្យ ឬអាចប៉ះពាល់ដល់សហរដ្ឋអាមេរិកនោះ។
ក្រៅពីនេះលោកបានរៀបរាប់ពីការងារបន្ត ដែលលោកបន្តធ្វើបន្ទាប់ពីធ្វើអារម្មណ៍ឲ្យស្ងប់ ស្ងាត់មួយរយៈហើយនោះ។ លោកបន្តថា៖ «ទាក់ទងរឿងអាទិភាពផ្សេងទៀត ដែលខ្ញុំធ្វើក្រោយចេញពីតំណែង គឺខ្ញុំនឹងជួយកសាងសមត្ថភាពដឹកនាំរបស់យុវជនជំនាន់ក្រោយ ដូចជា អ្នកធ្វើការងារស្ម័គ្រចិត្ត, អ្នកកាសែត និងអ្នកនយោបាយជាដើម។ខ្ញុំព្យាយាមរិះគិតថាគួរធ្វើយ៉ាងណា ដើម្បីជួយឲ្យទ្រទ្រង់ និងបំពាក់បំប៉នសមត្ថភាពពួកគេដើម្បីឲ្យពួកគេអាចផ្លាស់ប្តូរ សង្គមបាន»៕
© រក្សាសិទ្ធិដោយ thmeythmey.com