សមិទ្ធផលក្រោយសមាហរណកម្មអាស៊ានឆ្នាំ២០១៥ ក្នុងសសរស្តម្ភទាំងបី

អន្តរជាតិ

សមិទ្ធផលក្រោយសមាហរណកម្មអាស៊ានឆ្នាំ២០១៥ ក្នុងសសរស្តម្ភទាំងបី

17, Jan 2017 , 8:39 am

រូបភាព

ដោយ: ថ្មីៗ

រយៈពេលមួយឆ្នាំហើយ ដែលសមាគមប្រជាជាតិអាស៊ីអាគ្នេយ៍ ដែលហៅកាត់ថាអាស៊ាន បានអនុវត្តផែនការមេរបស់ខ្លួនដែលមានឈ្មោះថា «សមាហរណកម្មអាស៊ាន»។ ស្របជាមួយនឹងឱកាសពិសេសនៃខួបមួយឆ្នាំនៃសមារណកម្មអាស៊ាន ក៏ដូចជាខួបរម្លឹក៥០ឆ្នាំនៃការបង្កើតនិម្មាបនកម្មក្នុងតំបន់មួយនេះ អាស៊ាន បានចេញរបាយការណ៍សង្ខេបពិសេសមួយ ដោយបាននិយាយពីសមិទ្ធផលរបស់ខ្លួនដែលបានសម្រេចក្នុងរយៈពេលមួយឆ្នាំកន្លងទៅលើវិស័យទាំងបីដែលជាសសរស្តម្ភរបស់អាស៊ាន។

លេខាធិការដ្ឋានអាស៊ាន នៅថ្ងៃទី១៣ មករា កន្លងទៅ បានចេញផ្សាយរបាយការណ៍មួយនៅលើគេហទំព័ររបស់ខ្លួន ដោយបានលើកឡើងពីសមិទ្ធផលចម្បងៗដែលអាស៊ាន បានសម្រេចក្នុងរយៈពេលមួយឆ្នាំនៅក្នុងសសរស្តម្ភទាំងបីរបស់អាស៊ាន។ តាមរយៈរបាយការណ៍ពិសេសដែលមានចំណងជើងថា«អាស៊ានឆ្នាំ២០១៦» បានលើកឡើងទាំងទំនាក់ទំនងជាមួយនឹងបណ្តាមហាអំណាចដែលរួមទាំងអាមេរិក រុស្ស៊ី និងចិនជាដើម។ ទំហំវិនិយោគ និងការព្យាការណ៍សេដ្ឋកិច្ចនាពេលអនាគត ក៏មានបញ្ចូលនៅក្នុងរបាយការណ៍នោះដែរ។

ខាងក្រោមនេះ គឺជាអត្ថបទសង្ខេបចេញពីរបាយការណ៍ពិសេសរបស់អាស៊ានក្នុងសហគមន៍ទាំងបី៖

១. សមិទ្ធផលនៃសហគមន៍សន្តិសុខ-នយោបាយ
តាមរយៈសហគមន៍សន្តិសុខ-នយោបាយ អាស៊ាន បានបន្តកិច្ចការដ៏សំខាន់ក្នុងរក្សាសន្តិភាព និងស្ថិរភាព ដែលជាកត្តាមូលដ្ឋានដ៏សំខាន់សម្រាប់ការបើកចំហភាពវិបុលភាពសេដ្ឋកិច្ច និងការអភិវឌ្ឍសង្គម-វប្បធម៌នៅក្នុងតំបន់។ តាមរយៈយន្តការសន្ទនា ពិគ្រោះយោបល់ និងការផ្សារភ្ជាប់ អាស៊ាន បានធ្វើឲ្យតំបន់មានស្ថានភាពល្អ។ ជាពិសេសនោះ លិខិតូករណ៍ក្នុងតំបន់ ដែលរួមមានទាំងសន្ធិសញ្ញាស្តីពីមិត្តភាពនិងកិច្ចសហប្រតិបត្តិការ (TAC) និងសេចក្តីថ្លែងការណ៍ស្តីពីភាគីក្រមប្រតិបត្តិសមុទ្រចិនខាងត្បូង (DoC) ត្រូវបានទទួលស្គាល់យ៉ាងទូលំទូលាយ ដែលប្រៀបដូចនឹងក្រមប្រតិបត្តិនៅក្នុងទំនាក់ទំនងពីរដ្ឋទៅរដ្ឋ។

បន្ថែមពីនេះ ក្នុងរយៈពេលមួយឆ្នាំនេះដែរ អាស៊ាន បានសម្រេចបាននូវកិច្ចព្រមព្រៀងដើម្បីឆ្លើយតបទៅនឹងបញ្ហាប្រឈមដែលមិនមែនជាបញ្ហាសន្តិសុខប្រពៃណី ដែលរួមមាន បម្រែបម្រួលអាកាសធាតុ គ្រោះមហន្តរាយធម្មជាតិ និងបទល្មើសឆ្លងប្រទេសជាដើមនោះ។ សមិទ្ធផល ចម្បងដែលកើតចេញឆន្ទៈនយោបាយរបស់មេដឹកនាំអាស៊ាន និងដៃគូសន្ទនារបស់ខ្លួននោះគឺ កិច្ចប្រជុំជាមួយនឹងចិន រុស្ស៊ី និងអាមេរិក នៅឆ្នាំ២០១៦។ តាមរយៈកិច្ចប្រជុំដាច់ដោយឡែកធំទាំងនោះ បានបើកផ្លូវសម្រាប់អាស៊ាន និងរដ្ឋសមាជិកអាស៊ាន ទទួលបានឱកាសកាន់តែច្រើនក្នុងការបង្កើតនូវគំនិតផ្តួចផ្តើមជាមួយនឹងប្រទេសមហាអំណាច ក៏ដូចជាទំនាក់ទំនងសេដ្ឋកិច្ច និងការពារជាតិផងដែរ។

២. សមិទ្ធផលនៃសហគមន៍សេដ្ឋកិច្ច
តាមរបាយការណ៍ពិសេសដដែលនោះ នៅឆ្នាំ២០១៥ អាស៊ាន សម្រេចបានបានផលិតផលក្នុងស្រុករួមរហូតដល់២.៤ ទ្រីលានដុល្លារ ដែលចំនួននេះ បានធ្វើឲ្យអាស៊ាន ឈរនៅលំដាប់«ទីប្រាំមួយនៅឆាកអន្តរជាតិ និងលំដាប់ទីបីនៅអាស៊ី»។ ហើយនៅឆ្នាំ២០១៧នេះ កំណើនសេដ្ឋកិច្ចក្នុងតំបន់ ត្រូវបានរំពឹងថា នឹងនៅកម្រិត ៤.៦ ភាគរយផងដែរ។ អ្វីគួរកត់សម្គាល់នោះ នៅឆ្នាំ២០១៥ អាស៊ាន ក៏បានទាក់ទាញវិនិយោគដោយផ្ទាល់ ក្នុងទំហំ ១២១ ពាន់លានដុល្លារ ដែលចំនួនវិនិយោគនេះ ក៏បានចូលរួមចំណែកក្នុងការបង្កើតឱកាសការងារ ក៏ដូចជាចំណូល និងកំណើនសេដ្ឋកិច្ចផងដែរ។

៣. សមិទ្ធផលនៃសហគមន៍សង្គម-វប្បធម៌
នៅក្នុងសសរស្តម្ភចុងក្រោយនេះ អាស៊ាន បានប្រឹងប្រែងក្នុងការធ្វើពិពិធកម្មដើម្បីកសាងសហគមន៍ រវាងប្រជាជន-ប្រជាជន និងកិច្ចការផ្តោតសំខាន់លើប្រជាជនតែម្តង ក៏ដូចជាគំនិតផ្តួចផ្តើមមួយចំនួនផ្សេងទៀតពាក់ព័ន្ធនឹងការអភិវឌ្ឍធនធានមនុស្ស និងវិស័យសុខាភិបាល។ ហើយនៅឆ្នាំ២០១៦កន្លងទៅ អាស៊ាន ក៏បានលើកកម្ពស់ និងពង្រឹងការបំពេញបន្ថែមចំណុចមួយចំនួនរវាងរបៀបវារៈឆ្នាំ២០៣០របស់អង្គការសហប្រជាជាតិសម្រាប់ការអភិវឌ្ឍប្រកបដោយចីរភាព ជាមួយនឹងទស្សនវិស័យសហគមន៍អាស៊ានឆ្នាំ២០២៥ផងដែរ។

សូមជម្រាបផងដែរថា សមាគមប្រជាជាតិអាស៊ីអាគ្នេយ៍ បានបង្កើតឡើងជាផ្លូវការនៅថ្ងៃទី០៨ ខែសីហា ឆ្នាំ១៩៦៧។ បច្ចុប្បន្នអង្គការអន្តររដ្ឋាភិបាលមួយនេះ មានសមាជិកសរុប១០ប្រទេស រួមមាន ព្រុយណេ កម្ពុជា ឥណ្ឌូណេស៊ី ឡាវ មីយ៉ាន់ម៉ា ម៉ាឡេស៊ី ហ្វីលីពីន សិង្ហបុរី ថៃ និងវៀតណាម។ កាលពីថ្ងៃទី៣១ ធ្នូ ឆ្នាំ២០១៥កន្លងទៅ អាស៊ាន បានប្រកាសដំណើរការជាផ្លូវការនូវដោយប្រែក្លាយអាស៊ានឲ្យទៅជាសហគមន៍តែមួយ ពោលគឺ ដំណើរសមាហរណកម្ម ដោយឈរលើសសរស្តម្ភទាំងបី រួមមាន សហគមន៍សន្តិសុខ-នយោបាយ សហគមន៍សេដ្ឋកិច្ច និងសហគមន៍សង្គម-វប្បធម៌។ ដំណើរការសមាហរណកម្មនេះ ក្នុងគោលដៅដើម្បីប្រែក្លាយតំបន់អាស៊ាន ដែលចម្រុះដោយជាតិសាសន៍ និងប្រព័ន្ធនយោបាយផ្សេងៗគ្នានោះ ឲ្យទៅជាតំបន់ដែលមានការអភិវឌ្ឍសេដ្ឋកិច្ច សុខដុមរមនីយកម្ម និងសន្តិសុខ និងសន្តិភាព៕