EU ត្រៀមផ្ដល់ទឹកប្រាក់ជាង២០លានដុល្លារ សម្រាប់លើកកម្ពស់សេដ្ឋកិច្ចបៃតងនៅអាស៊ី

អន្តរជាតិ

EU ត្រៀមផ្ដល់ទឹកប្រាក់ជាង២០លានដុល្លារ សម្រាប់លើកកម្ពស់សេដ្ឋកិច្ចបៃតងនៅអាស៊ី

17, Jan 2017 , 9:39 am

រូបភាព

ដោយ: ថ្មីៗ

ភ្នំពេញ៖ សហភាពអឹរ៉ុបត្រៀមផ្ដល់ជំនួយឥតសំណងជាង២០លានដុល្លារ ក្នុងការលើកកម្ពស់សេដ្ឋកិច្ចបៃតងអាស៊ី ដើម្បីជួយជំរុញផលិតផលដែលមានកម្រិតបំពុលបរិស្ថានតិចតួច និងផលិតផលដែលប្រើប្រាស់ធនធានឲ្យកាន់តែមានប្រសិទ្ធិភាព និងនិរន្តភាព។ នេះបើតាមសេចក្ដីប្រកាសព័ត៌មានរបស់សហភាពអឺរ៉ុប ។

សហភាពអឺរ៉ុប នឹងទទួលសំណើរសម្រាប់គម្រោងថ្មីពីម្ចាស់ក្រុមហ៊ុនអាជីវកម្ម និងដៃគូអាជីវកម្មខ្នាតតូចនិងមធ្យម ដែលលើកកម្ពស់ការផលិតផល និងប្រើប្រាស់ផលិតផលមានកម្រិតបំពុលបរិស្ថានតិចតួចប្រកបដោយនិរន្តភាព តាមរយៈកម្មវិធី SWITCH-Asia II របស់ខ្លួន។ កម្មវិធី SWITCH-Asia II គឺជាគម្រោងប្រចាំតំបន់ដែលឧបត្ថមដោយសហភាពអឺរ៉ុប ក្នុងគោលបំណងលើកកម្ពស់ការផ្លាស់ប្ដូរជាប្រព័ន្ធឆ្ពោះទៅរកការផលិត និងការប្រើប្រាស់ប្រកបដោយនិរន្តភាព នៅអាស៊ី (SCP)។

តាមរយៈកម្មវិធីនេះ សហភាពអឺរ៉ុប គ្រោងនឹងផ្ដល់ថវិកា ១៩ ៦០០ ០០០ អឺរ៉ូ (ជាង២០លានដុល្លារ) ជួយទ្រទ្រង់ដល់មូលនិធិសម្រាប់សំណើរដែលមានលក្ខណៈច្នៃប្រឌិត ដែលជំរុញផលិតកម្មប្រកបដោយនិរន្តភាព (ការផលិតនូវផលិតផល ដែលមានកម្រិតការបំពុលបរិស្ថានតិចតួចបំផុត និងផលិតផលដែលប្រើប្រាស់ធនធានឲ្យកាន់តែមានប្រសិទ្ធិភាព រួមទាំងដំណើរការនិងសេវាកម្ម) និងការប្រើប្រាស់ដែលមាននិរន្តភាពនៅក្នុងតំបន់អាស៊ីរួមទាំងប្រទេសកម្ពុជា ក្នុងនោះរួមមានការទិញផលិតផល ដែលមានប្រសិទ្ធិភាពនិងកម្រិតនៃការបំពុលបរិស្ថានមានតិចតួចបំផុត និងការទទួលយករបៀបនៃការរស់នៅ និងឥរិយាបទប្រកបដោយនិរន្តភាពជាដើម៕