អន្តរជាតិ
រៀងរាល់៤ថ្ងៃម្តងក្នុងឆ្នាំ២០១៦ មានអ្នកកាសែតម្នាក់ត្រូវបានសម្លាប់
× អង្គការយូនេស្កូ បានរកឃើញថា អ្នកកាសែតចំនួន១០១នាក់ត្រូវបានសម្លាប់នៅក្នុងឆ្នាំ២០១៦ ដោយចំនួននេះ មានន័យថា អ្នកកាសែតម្នាក់ត្រូវបានសម្លាប់នៅរៀងរាល់៤ថ្ងៃម្តង។ នេះបើតាមការផ្សាយរបស់គេហទំព័រអង្គការសហប្រជាជាតិ (UN) កាលពីថ្ងៃទី១៧ ខែមករា។
«អាជីពជាអ្នកកាសែតមិនមានសុវត្ថិភាពនោះឡើយ ហើយបណ្ណសារព័ត៌មាន និងសម្ភារនានាដែលបម្រើផ្នែកសារព័ត៌មាន ជាញឹកញាប់ ត្រូវបានប្រើប្រាស់សម្រាប់ហេតុផលមួយចំនួនប៉ុណ្ណោះ»។ នេះបើតាមការលើកឡើងរបស់លោក Frank La Rue ជំនួយការអគ្គនាយកយូនេស្កូ ទទួលបន្ទុកផ្នែកទំនាក់ទំនង និងព័ត៌មាន។
ភ្នាក់ងារអង្គការសហប្រជាជាតិមួយនេះ បានរៀបចំផែនការមេក្នុងការធានាសុវត្ថិភាព និងនិទណ្ឌភាពសម្រាប់អ្នកកាសែតនាពេលបំពេញបេសកកម្មទាំងក្នុងស្ថានភាពមានជម្លោះ និងគ្មានជម្លោះ។
តួលេខបានបង្ហាញថា អ្នកកាសែតដែលបានបាត់ជីវិតភាគច្រើន គឺនាអំឡុងពេលបំពេញបេសកកម្មក្នុងតំបន់ជម្លោះប្រដាប់អាវុធ នៅប្រទេសស៊ីរី អ៊ីរ៉ាក់ និងយ៉េមែន រួមទាំងនៅតំបន់អាមេរិកឡាទីន និងការ៉ាអ៊ីប។
ជាមួយគ្នានេះផងដែរ អ្នកកាសែតមួយចំនួនបានរងគ្រោះដោយអំពើហិង្សាលើរាងកាយ និងការគំរាមកំហែងតាមអនឡាញ ជាមួយនឹងសម្តីស្អប់ខ្ពើម និងបៀតបៀនផ្លូវភេទជាដើម។ លោក La Rue បានលើកឡើងថា នៅពេលដែលឧក្រិដ្ឋកម្មរាល់ទម្រង់លើអ្នកកសែត មិនត្រូវបានកាត់ទោសទេនោះ បណ្តាញផ្សព្វផ្សាយនៅតែរងការបៀតបៀន និងវាយប្រហារដដែល។
យូនេស្កូ បានស្នើឲ្យអាជ្ញាធរយកចិត្តទុកដាក់ឲ្យបានខ្លាំងបំផុតលើអ្នកសារព័ត៌មាន និងដាក់ទោសដល់អ្នកប្រព្រឹត្តខុសឲ្យបានត្រឹមត្រូវ៕
© រក្សាសិទ្ធិដោយ thmeythmey.com