ជាតិ
ក្រសួងព័ត៌មាន គ្រោងបង្កើតមជ្ឈមណ្ឌលពាណិជ្ជកម្ម ផ្ដល់ការងារដល់មន្ដ្រីរាជការចូលនិវត្ដន៍ ![](https://image.thmeythmey.com/pictures/2017/01/26/khev_kanharith.jpg)
×![]()
ភ្នំពេញ៖ ក្រសួងព័ត៌មាន គ្រោងបង្កើតមជ្ឈមណ្ឌលពាណិជ្ជកម្មមួយ សម្រាប់បង្កើតការងារដល់មន្ត្រីចូលនិវត្តន៍ ដើម្បីជួយបង្កើនប្រាក់ចំណូល និងសម្រួលដល់ជីវភាពពួកគេ។
រដ្ឋមន្ដ្រីក្រសួងព័ត៌មានលោក ខៀវ កាញារីទ្ធ បាននិយាយថា ក្រសួងកំពុងសិក្សាលើគម្រោងបង្កើតមជ្ឈមណ្ឌលពាណិជ្ជកម្មនេះឲ្យបានច្បាស់លាស់សិន មុននឹងដាក់ជូនរាជរដ្ឋាភិបាលពិនិត្យសម្រេច។ បើតាមលោក ខៀវ កាញារីទ្ធិ មជ្ឈមណ្ឌលពាណិជ្ជកម្មនេះ នឹងអាចផ្ដល់ការងារដល់ប្រជាពលរដ្ឋជាង ២ពាន់នាក់ ។ ជាពិសេសមន្ដ្រីរាជការចូលនិវត្ដន៍ ក៏អាចបន្ដការងារនៅទីនោះបានដែរ។
ថ្លែងក្នុងពិធីសំណេះសំណាលជាមួយនិវត្ដជនក្រសួងព័ត៌មាន កាលពីថ្ងៃទី២៥ មករា រដ្ឋមន្ត្រីក្រសួងព័ត៌មានរូបនេះ បានបញ្ជាក់ដូច្នេះថា៖«ក្រសួងព័ត៌មានកំពុងតែគិតគូរទាំងមន្ដ្រីរាជការ និងមន្ដ្រីរាជការចូលនិវត្ដន៍ ដើម្បីបង្កើតការងារធ្វើ និងជួយបង្កើនប្រាក់ចំណូលបន្ថែមក្រៅពីប្រាក់ខែមន្ដ្រីរាជការ បើទោះបី ជាមន្ដ្រីមួយចំនួនចូលនិវត្ដន៍ក្ដី ប៉ុន្ដែអាចបន្ដធ្វើការងារ និងអាចជួបជុំគ្នាបានទៀត។ ប្រសិនបើរាជរដ្ឋាភិបាលអនុញ្ញាតឲ្យបង្កើតមជ្ឈមណ្ឌលពាណិជ្ជកម្មនេះ យើងនឹងចាប់ផ្ដើមសាងសង់ពីឆ្នាំ២០១៧នេះទៅ ដែលគ្រោងនឹងបញ្ចប់នៅ ឆ្នាំ២០២០ខាងមុខ»។
លោក ខៀវ កាញារីទ្ធ បានឲ្យដឹងថា មជ្ឈមណ្ឌលពាណិជ្ជកម្មដែលគ្រោងបង្កើតឡើងនេះ នឹងមានរៀបចំជាកន្លែងបណ្ដុះបណ្ដាលវិជ្ជាជីវៈ,មជ្ឈមណ្ឌលព័ត៌មាន ,សារមន្ទីរ និងកន្លែងពិព័រណ៍ជាដើម ដែលត្រូវចំណាយថវិកាជាង៣០០លានដុល្លារ៕
ប្រភពពី AKP
Tag:
ក្រសួងព័ត៌មាន
មន្ត្រីចូលនិវត្តន៍
ខៀវ កាញារីទ្ធ
© រក្សាសិទ្ធិដោយ thmeythmey.com