សាលារចនាថ្មី នឹងបើកការដ្ឋានសាងសង់នៅថ្ងៃទី២ ខែមេសា

ជាតិ

សាលារចនាថ្មី នឹងបើកការដ្ឋានសាងសង់នៅថ្ងៃទី២ ខែមេសា

27, Mar 2017 , 10:13 am

រូបភាព

ដោយ: ខន ចំប៉ា

សកលវិទ្យាល័យភូមិន្ទវិចិត្រសិល្បៈ ឬសាលារចនាថ្មី នឹងប្រារព្ធធ្វើនៅថ្ងៃទី២ ខែមសា ឆ្នាំ២០១៧ខាងមុខ។ រដ្ឋាភិបាល គ្រោងចំណាយទឹកប្រាក់ប្រមាណ១២លានដុល្លារ សង់សាលារចនាថ្មីនេះ នៅតំបន់ជ្រោយចង្វារ ខណៈទីតាំងសាលារចនាចាស់ដែលមានចំណាស់១០០ឆ្នាំ ត្រូវពង្រីកជាសារមន្ទីរជាតិ។

ពិធីក្រុងពាលី បញ្ចុះសីមាសុំម្ចាស់ទឹកម្ចាស់ដីសាងសង់ សកលវិទ្យាល័យភូមិន្ទវិចិត្រសិល្បៈ ឬសាលារចនាថ្មី នឹងប្រារព្ធធ្វើនៅថ្ងៃទី២ ខែមសា ឆ្នាំ២០១៧ខាងមុខ។ នេះបើយោងតាមហ្វេសប៊ុកក្រសួងវប្បធម៌ និងវិចិត្រសិល្បៈ។

ប្រមុខរដ្ឋាភិបាលកម្ពុជា បានប្រកាសពីការប្តូរទីតាំងសកលវិទ្យាល័យភូមិន្ទវិចិត្រសិល្បៈថ្មីនេះ នៅក្នុងទិវាវប្បធម៌ជាតិលើកទី១៩ កាលពីដើមខែមីនាកន្លងទៅ។ កាលណោះសម្តេច ហ៊ុន សែន បានបញ្ជាក់ថា ការសាងសង់សាលារចនាថ្មី គ្រោងចំណាយថវិកាប្រមាណ ១២លានដុល្លារ សង់នៅលើផ្ទៃដីប្រមាណ ៤ហិកតា នៅតំបន់ជ្រោយចង្វារ។ បើតាមប្រមុខរដ្ឋាភិបាលដដែល គម្រោងនេះត្រូវអនុវត្តឲ្យរួចរាល់ក្នុងរយៈពេល៣ឆ្នាំ ដើម្បីពង្រឹង និងពង្រីក គុណភាពអប់រំផ្នែកវប្បធម៌ និងវិចិត្រសិល្បៈកម្ពុជា ឲ្យកាន់តែល្អប្រសើរ។

ជុំវិញការសាងសង់នេះ កន្លងមកលោកស្រី ភឿង សកុណា បានអះអាងប្រាប់សារព័ត៌មានថ្មីៗថា សាលារចនាថ្មី នៅតែរក្សានូវរចនាប័ទ្មខ្មែរ រក្សាអត្តសញ្ញាណវប្បធម៌ និងទម្រង់បែបបត់ជារបស់ខ្មែរ ខណៈសាលារចនាចាស់ដែលមានចំណាស់១០០ឆ្នាំ ត្រូវពង្រីកជាសារមន្ទីរជាតិ។ បើតាមលោកស្រីរដ្ឋមន្ត្រីក្រសួងវប្បធម៌ និងវិចិត្រសិល្បៈ សាស្ត្រាចារ្យ នៃសកលវិទ្យាល័យយភូមិន្ទវិចិត្រសិល្បៈផ្ទាល់ ជាអ្នកគូរប្លង់សាលាថ្មីនេះ។

សាកលវិទ្យាល័យភូមិន្ទវិចិត្រសិល្បៈ ចាប់ផ្តើមសង់នៅក្នុងឆ្នាំ១៩១៧ ពោលគឺមានចំណាស់១០០ឆ្នាំហើយ។ ថ្នាក់ដឹកនាំ សាស្ត្រាចារ្យ និងនិស្សិតនៃសាកលវិទ្យាល័យភូមិន្ទវិចិត្រសិល្បៈ ក៏បានរៀបចំពិធីរំឭកខួប១០០ឆ្នាំនៃវត្តមានរបស់សាលារចនានេះ យ៉ាងអធិកអធម រយៈពេល៣ថ្ងៃ ដែលទើបតែបញ្ចប់នៅថ្ងៃទី២៦ ខែមីនា។

សាកលវិទ្យាល័យនេះ មាន៥មហាវិទ្យាល័យ គឺមហាវិទ្យាល័យបុរាណវិទ្យា មហាវិទ្យាល័យវិចិត្រសិល្បៈសូនរូប មហាវិទ្យាល័យស្ថាបត្យកម្ម និងនគរោបនីយវិទ្យា មហាវិទ្យាល័យតូរ្យតន្ត្រី និងមហាវិទ្យាល័យសិល្បៈនាដសាស្ត្រ៕