ជាតិ
តុលាការកំពូល នៅតែមិនឲ្យលោក នី ចរិយា រស់នៅក្រៅពន្ធនាគារ លោក សំ សុគង់ មេធាវីរបស់លោក នី ចរិយា បានផ្តល់បទសម្ភាសដល់ក្រុមអ្នកសារព័ត៌មាន ក្រោយស្តាប់ការប្រកាសសាលដីការបស់តុលាការកំពូល នៅព្រឹកថ្ងៃទី៣១ ខែមីនា ឆ្នាំ២០១៧។
× ភ្នំពេញ៖ តុលាការកំពូល មិនធ្វើតាមសំណើរបស់លោក នី ចរិយា ដែលសុំរស់នៅក្រៅពន្ធនាគារ ជាបណ្តោះអាសន្ន។ មេធាវី យល់ថា ការសម្រេចរបស់តុលាការកំពូល មិនមានយុត្តិធម៌ សម្រាប់លោក នី ចរិយា។
តុលាការកំពូល បានប្រកាសដីកា នៅព្រឹកថ្ងៃទី៣១ ខែមីនា ឆ្នាំ២០១៧នេះ ដោយកំណត់ឲ្យលោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) រស់នៅក្នុងពន្ធនាគារដដែល។ តុលាការកំពូល នៅតែលើកហេតុផលថា សំណុំរឿងរបស់លោក នី ចរិយា គឺពាក់ព័ន្ធនឹងបទឧក្រិដ្ឋ ដូច្នេះ មិនអាចឲ្យរស់នៅក្រៅពន្ធនាគារបានឡើយ។
លោក នី ចរិយា រួមទាំងលោក មេធាវី សំ សុគង់ បានចូលរួមសវនាការ ដើម្បីស្តាប់ការប្រកាសសាលដីការបស់តុលាការកំពូល នៅព្រឹកថ្ងៃសុក្រនេះ។
ក្រោយចាកចេញពីបន្ទប់សវនាការ លោកមេធាវី សំ សុគង់ បានប្រាប់ក្រុមអ្នកសារព័ត៌មានថា លោក សោកស្តាយ ដែលតុលាការកំពូល មិនព្រមផ្តល់សេរីដល់លោក នី ចរិយា។ លោក សំ សុគង់ អះអាងថា លោក មិនអាចទទួលយកបានទេ ចំពោះហេតុផលរបស់តុលាការកំពូល ដែលមិនឲ្យលោក នី ចរិយា នៅក្រៅឃុំ។
លោក និយាយដូច្នេះថា៖«ខ្ញុំយល់ឃើញថា ការសម្រេចរបស់តុលាការកំពូលនៅថ្ងៃនេះ គឺជាការសម្រេចមួយដែលមេធាវី មិនអាចទទួលយកបាន។ ការសម្រេចនេះ មិនបានផ្តល់យុត្តិធម៌ដល់កូនក្តីរបស់ខ្ញុំឡើយ»។
នេះ មិនមែនជាលើកទីមួយទេ ដែលតុលាការកំពូល បដិសេធសំណើសុំនៅក្រៅឃុំរបស់លោក នី ចរិយា ដែលកំពុងជាប់ពន្ធនាគារ ដោយសារតែរឿងអាស្រូវរបស់ស្រីមុំ។ កន្លងមកតុលាការកំពូល ក៏ធ្លាប់បដិសេធសំណើសុំនៅក្រៅឃុំរបស់លោក នី ចរិយា ដែរ។
ដោយឡែក មន្ត្រីអាដហុកបួនរូបទៀត ដែលកំពុងជាប់ពន្ធនាគារដោយសារតែរឿងអាស្រូវរបស់ស្រីមុំ ដែរនោះ ក៏បរាជ័យក្នុងការសុំនៅក្រៅឃុំជាច្រើនលើកដែរ។ តុលាការកំពូល ទើបតែបដិសេធសំណើសុំនៅក្រៅឃុំរបស់មន្ត្រីអាដហុក កាលពីប៉ុន្មានថ្ងៃមុន។
សូមបញ្ជាក់ថា លោក នី ចរិយា បានរងពីបទចោទ «សមគំនិតក្នុងអំពើសូកប៉ាន់សាក្សី»។ ចំណែកឯ មន្ត្រីអាដហុកបួនរូបទៀត ដែលរួមមាន លោក នី សុខា លោក ណៃ វង់ដា លោក យី សុខសាន្ត និងលោកស្រី លឹម មុន្នី បានរងពីបទចោទ «សូកប៉ាន់សាក្សី»។ អ្នកទាំង៥នេះ ត្រូវបានឃុំខ្លួន កាលពីដើមខែឧសភា ឆ្នាំ២០១៦៕
© រក្សាសិទ្ធិដោយ thmeythmey.com