ជាតិ
សេដ្ឋកិច្ច
AMRO ថា កម្ពុជារក្សាកំណើនសេដ្ឋកិច្ចរឹងមាំក្នុងឆ្នាំ២០១៧ ទោះអត្រាអតិផរណាកើនឡើង ![លោកស្រី Junhong Chang នាយិកាស្ថាប័នស្រាវជ្រាវម៉ាក្រូសេដ្ឋកិច្ច (AMRO) ជួបសវនាការជាមួយរដ្ឋមន្ត្រីសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន (រូបភាព AMRO)](https://image.thmeythmey.com/pictures/2017/07/04/armo.jpg)
លោកស្រី Junhong Chang នាយិកាស្ថាប័នស្រាវជ្រាវម៉ាក្រូសេដ្ឋកិច្ច (AMRO) ជួបសវនាការជាមួយរដ្ឋមន្ត្រីសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន (រូបភាព AMRO)
×![]()
«កំណើនសេដ្ឋកិច្ចកម្ពុជា» នឹងរក្សាលំនឹងរបស់ខ្លួនសម្រាប់ឆ្នាំ២០១៧ នៅកម្រិត៦,៩ភាគរយ ទោះជាអត្រាអតិផរណានឹងកើនឡើងដោយសារតែការកើនឡើងតម្លៃចំណីអាហារ និងប្រេងសាំង។
ស្ថាប័នស្រាវជ្រាវម៉ាក្រូសេដ្ឋកិច្ចអាស៊ានបូកបី (AMRO) ដែលមានមូលដ្ឋាននៅសិង្ហបុរី បានចេញផ្សាយរបាយការណ៍វាយតម្លៃបឋមស្ដីពីស្ថានភាពសេដ្ឋកិច្ចរបស់កម្ពុជា បន្ទាប់ប្រតិភូ AMRO បញ្ចប់ទស្សនកិច្ចនៅកម្ពុជាកាលពីដំណាច់ខែមិថុនា។ ប្រតិភូ AMRO បានជួបជាមួយរដ្ឋមន្ត្រីសេដ្ឋកិច្ចកម្ពុជា និងមន្ត្រីជាន់ខ្ពស់ធនាគារជាតិ ដើម្បីពិភាក្សាអំពីកំណើនសេដ្ឋកិច្ចរយៈពេលខ្លី ស្ថិរភាពហិរញ្ញវត្ថុ គោលនយោបាយអភិវឌ្ឍ ក៏ដូចជាការប្រឹងប្រែងក្នុងការជំរុញពិពិធកម្មវិស័យឧស្សាហកម្ម។
យោងតាមសេចក្តីប្រកាសព័ត៌មានរបស់ AMRO ដែលចេញផ្សាយថ្ងៃទី៣ ខែកក្កដា លោក Seung Hyun Hong អ្នកឯកទេសជាន់ខ្ពស់របស់AMRO ដែលស្ថិតនៅក្នុងប្រតិភូមកទស្សនកិច្ចកម្ពុជាដែរនោះ បាននិយាយថា កម្ពុជានឹងរក្សាកំណើនរឹងមាំរបស់ខ្លួនជាមួយអត្រា ៦,៩ភាគរយក្នុងឆ្នាំ២០១៧ ខណៈអត្រាអតិផរណានឹងកើនដល់ ៤ភាគរយ។ អ្នកជំនាញដដែល ត្រូវបានស្រង់សំដីដែលបញ្ជាក់បន្តថា៖ «ក្រៅពីវិស័យកាត់ដេរ សំណង់ និងទេសចរណ៍ ដែលបានរក្សាកំណើនរបស់ខ្លួន កត្តាផ្សេងទៀតដែលជួយដល់កំណើនសេដ្ឋកិច្ចកម្ពុជា គឺការកើនឡើងប្រាក់ឈ្នួលកម្មករ និងស្ថិរភាពអចលនទ្រព្យ»។
ទោះជាកំណើនសេដ្ឋកិច្ចនឹងបន្តភាពរឹងមាំក្ដី កម្ពុជានៅប្រឈមមុខបញ្ហាច្រើនដែលអាចទាញកំណើននេះឲ្យធ្លាក់ចុះវិញបាន។ សេចក្តីប្រកាសព័ត៌មានរបស់ AMRO សរសេរថា ការកើនឡើងប្រាក់ខែគោលកម្មករជារឿងល្អ តែអាចប៉ះពាល់ដល់ការសមត្ថភាពប្រកួតប្រជែងរបស់កម្ពុជា ដែលតម្រូវឲ្យរដ្ឋាភិបាលត្រូវដោះស្រាយបន្ទាន់តាមរយៈការបង្កើនគុណភាពការងារ ការបង្កលក្ខណៈងាយស្រួលក្នុងការធ្វើពាណិជ្ជកម្ម កាត់បន្ថយតម្លៃអគ្គីសនី និងថ្លៃដឹកជញ្ជូន។
ជាមួយគ្នានោះ AMRO ក៏ស្នើឲ្យមានការរៀបចំគោលនយោបាយគ្រប់ជ្រុងជ្រោយមួយដើម្បីគ្រប់គ្រងគ្រោះថ្នាក់នៅក្នុងប្រព័ន្ធហិរញ្ញវត្ថុ ក៏ដូចជាជំរុញស្ថិរភាពហិរញ្ញវត្ថុ ព្រោះការអនុវត្តគោលនយោបាយរូបិយវត្ថុប្រឈមការលំបាកដោយសារដុល្លារូបនីយកម្មក្នុងស្រុក។ ទន្ទឹមគ្នានោះដែរ បើតាមអនុសាសន៍របស់ស្ថាប័នស្រាវជ្រាវម៉ាក្រូសេដ្ឋកិច្ចនេះដដែល ការជំរុញសមត្ថភាពវិស័យសាធារណៈ និងការបែងចែកថវិកាជាតិឲ្យមានតុល្យភាព ក៏ជាកត្តាសំខាន់សម្រាប់កំណើនសេដ្ឋកិច្ចផងដែរ ហើយ រដ្ឋាភិបាលត្រូវបន្តគាំទ្រការវិនិយោគវិស័យហេដ្ឋារចនាសម្ព័ន្ធ ព្រមទាំងការកែទម្រង់សំដៅជំរុញផលិតភាព និងកំណើន។
សម្រាប់រយៈពេលមធ្យមទៅមុខ AMRO យល់ថា រដ្ឋាភិបាលក៏ត្រូវស្វែងរកប្រភពហិរញ្ញវត្ថុផ្សេងទៀត ដើម្បីទប់ទល់ការចំណាយលើការវិនិយោគ ខណៈរដ្ឋាភិបាលបានផ្ដល់អាទិភាពលើវិស័យផ្សេងទៀតដែរនោះ។ រដ្ឋាភិបាលអាចស្វែងរកប្រភពទុនបាន តាមរយៈការពង្រីកទីផ្សារហិរញ្ញវត្ថុក្នុងស្រុក និងបន្តចាប់ដៃគូជាមួយវិស័យឯកជនផងដែរ។ នេះជាការផ្តល់យោបល់របស់ស្ថាប័នស្រាវជ្រាវម៉ាក្រូសេដ្ឋកិច្ចអាស៊ានបូកបី (AMRO)៕
Tag:
កម្ពុជា
សិង្ហបុរី
AMRO
© រក្សាសិទ្ធិដោយ thmeythmey.com