ជាតិ
រដ្ឋមន្ត្រីយុត្តិធម៌ ប្រាប់ប្រធានតុលាការ ឲ្យគោរពតួនាទី ដើម្បីឲ្យពលរដ្ឋ ជឿទុកចិត្ត ![](https://image.thmeythmey.com/pictures/2017/07/07/ang_vongtanara.jpg)
×![]()
ភ្នំពេញ៖ ភារកិច្ចរបស់ប្រធានសាលាដំបូង គឺជាកត្តាដ៏សំខាន់ ដែលអាចការពារកិត្តិយសនិងសេចក្តីថ្លៃថ្នូររបស់ស្ថាប័នតុលាការ។ លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានលើកឡើងដូច្នេះ ក្នុងសិក្ខាសាលាស្តីពី «តួនាទី ភារកិច្ចរបស់ប្រធានសាលាដំបូង» ដែលរៀបចំឡើងដោយឧត្តមក្រុមប្រឹក្សានៃអង្គចៅក្រម និងមានការសហការពីការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា នៅព្រឹកថ្ងៃទី៧ ខែកក្កដា ឆ្នាំ២0១៧នេះ។
លោក អង្គ វង្ស វឌ្ឍានា រដ្ឋមន្ត្រីក្រសួងយុត្តិធម៌ បានចាត់ទុកតួនាទី ភារកិច្ចរបស់ប្រធានសាលាដំបូង ថាជាកត្តាដ៏សំខាន់ ដែលនាំឲ្យសាលាដំបូង ទទួលបានការជឿទុកចិត្ត និងការគោរពពីសាធារណជន។ លើសពីនេះ លោក ថែមទាំងយល់ថា ការបំពេញតួនាទី ឲ្យបានពេញលេញ ក្នុងនាមជាប្រធានសាលាដំបូង ក៏អាចការពារកិត្តិយស និងសេចក្តីថ្លៃថ្នូររបស់ស្ថាប័នតុលាការផងដែរ។
រដ្ឋមន្ត្រីក្រសួងយុត្តិធម៌រូបនេះ បាននិយាយដូច្នេះថា៖«តួនាទី ភារកិច្ចរបស់ប្រធានសាលាដំបូង គឺជាយន្តការសំខាន់បំផុត ក្នុងការអភិវឌ្ឍសាលាដំបូង ឲ្យរីកចម្រើនទាំងខាងធនធានមនុស្ស សម្ភារ និងហេដ្ឋារចនាសម្ព័ន្ធ។ ប្រធានសាលាដំបូងម្នាក់ៗ ត្រូវខិតខំបំពេញតួនាទី ភារកិច្ចនេះ ឲ្យបានសកម្ម និងឲ្យបានពេញលេញទៅតាមបទដ្ឋានមួយច្បាស់លាស់ ទើបអាចបាននូវការអភិវឌ្ឍ ប្រកបដោយនិរន្តរភាព និងប្រសិទ្ធភាព»។
យ៉ាងណា លោក អង្គ វង្ស វឌ្ឍានា ក៏បានសរសើរប្រធានសាលាដំបូងទាំងអស់ផងដែរ ថាបានបំពេញតួនាទី នាពេលកន្លងមក ក្នុងការដឹកនាំអង្គភាពរបស់ខ្លួន ដោយឆ្លងកាត់ការលំបាកនិងឧបសគ្គនានា។ លោក បន្តថា ទោះស្ថិតក្នុងស្ថានភាព ដែលស្ថាប័នតុលាការ មានការខ្វះខាត ទាំងថវិកា មធ្យោបាយ សម្ភារ រួមទាំងធនធានមនុស្សក៏ដោយ ប៉ុន្តែ ប្រធានសាលាដំបូង នៅតែតស៊ូជម្នះរាល់ការលំបាកទាំងនោះ ដើម្បីធ្វើឲ្យស្ថាប័នតុលាការ មានស្ថិរភាព និងដំណើរការប្រកបដោយប្រសិទ្ធភាព ក្នុងការផ្តល់នូវសេវាលើវិស័យយុត្តិធម៌ ដល់សាធារណជន៕
Tag:
តុលាការ
អង្គ វង្ស វឌ្ឍានា
© រក្សាសិទ្ធិដោយ thmeythmey.com