ជាតិ
សហភាពអឺរ៉ុបបន្តផ្តល់អាហារូបករណ៍ដល់និស្សិតកម្ពុជាប្រមាណ៥០នាក់ក្នុង១ឆ្នាំ ![](https://image.thmeythmey.com/pictures/2017/07/18/student.jpg)
×![]()
សិស្ស និស្សិត និងមន្ត្រីរាជកម្ពុជានឹងទទួលបានអាហារូបករណ៍ពីសហភាពអឺរ៉ុប ទៅសិក្សានៅក្រៅប្រទេស សិក្សាយកជំនាញវិជ្ជាជីវៈនៅ ប្រទេសណាមួយនៃសហភាពអឺរ៉ុបដោយមិនបាច់បង់ថ្លៃ ក្រោមជំនួយ ឧបត្ថម្ភពី សហភាពអឺរ៉ុប។
ភារៈធារីស្តីទីគណៈប្រតិភូសហភាពអឺរុបប្រចាំប្រទេសកម្ពុជា លោក ស្រី ហ្សឺណូវ៉េវ៉ា ហ៊ឺណានដេស អ៊ុយរីស(Genoveva Hernandez Uriz) បានប្រកាសថា សហភាពអឺរ៉ុប នៅតែបន្តផ្តល់អាហារូបករណ៍ជួយដល់សិស្ស និស្សិត និងមន្ត្រីរាជការពីប្រទេសកម្ពុជា ប្រមាណ៥០នាក់ក្នុង១ឆ្នាំ នឹងនៅតែទទួលបានឱកាសទៅសិក្សាយកជំនាញវិជ្ជាជីវៈនៅ ប្រទេសណាមួយនៃសហភាពអឺរ៉ុបដោយមិនបាច់បង់ថ្លៃ ក្រោមជំនួយឧបត្ថម្ភពីសហភាពអឺរ៉ុប។
លោកស្រី ហ្ស៊ឺណូវ៉េវ៉ា បានថ្លែងបែបនេះនៅមជ្ឈមណ្ឌលសហប្រតិបត្តិការកម្ពុជា-ជប៉ុន ក្នុងកម្មវិធីប្រារព្ធខួបទី៣០ឆ្នាំនៃសហភាពអឺរុបសម្រាប់ការលើកកម្ពស់និស្សិតសកល វិទ្យាល័យ ហៅកាត់ថា Erasmus របស់ខ្លួននៅកម្ពុជា និងខួប២០ឆ្នាំនៃកិច្ចព្រមព្រៀងសហប្រតិបត្តិការជាមួយកម្ពុជា កាលពីថ្ងៃទី១៧ ខែកក្កដា ឆ្នាំ២០១៧។
ចាប់ពីឆ្នាំ១៩៩៥មករហូតមកដល់ពេលនេះ មាន និស្សិត និងមន្ត្រីរាជការពីប្រទេសកម្ពុជាជាង៦០០នាក់ បានទទួលសិក្សាកម្រិតជំនាញជាន់ខ្ពស់នៅបណ្ដាប្រទេសក្នុងសហភាពអឺរ៉ុប។ លោកស្រីបានបញ្ជាក់ដូច្នេះ៖<<សហភាពអឺរ៉ុបតែងតែផ្តល់ការគាំទ្រ និងចូលរួមអភិវឌ្ឍន៍ធនធានមនុស្សរបស់កម្ពុជាក្នុងចំណោមគម្រោងជំនួយឧបត្ថម្ភជាថវិកានៃកម្មវិធីសិក្សាសកល ប្រមាណ ១.៧០០លានអឺរ៉ូក្នុង១ឆ្នាំ>>។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានលើកឡើងថា ការទៅសិក្សានៅសហភាពអឺរ៉ុបមិនត្រឹមតែទទួលបាននូវចំណេះដឹងថ្មីៗប៉ុណ្ណោះទេ ប៉ុន្តែនឹងជំរុញឱ្យយុវជនកម្ពុជា អភិវឌ្ឍន៍សមត្ថភាពជំនាញវិជ្ជាជីវៈរបស់ខ្លួនបន្ថែមទៀតពិសេសលើមុខវិជ្ជាដែលជាតម្រូវការនៃទីផ្សារនៅក្នុង ប្រទេសកម្ពុជានាពេលបច្ចុប្បន្ននេះ៕
Tag:
និស្សិតកម្ពុជា
សហភាពអឺរ៉ុប
អាហារូបករណ៍
© រក្សាសិទ្ធិដោយ thmeythmey.com