ជាតិ
សមត្ថកិច្ចកម្ពុជាឃាត់ខ្លួនជនជាតិចិន ថៃ និងម៉ាឡេស៊ី២១៥នាក់ ![](https://image.thmeythmey.com/pictures/2017/08/03/3820171542untitled-1.jpg)
×![]()
ភ្នំពេញ៖ ជនជាតិចិន២១១នាក់ ថៃ២នាក់ និងម៉ាឡេស៊ី២នាក់ ត្រូវបានសមត្ថកិច្ចកម្ពុជាបង្ក្រាប និងឃាត់ខ្លួនពួកគេ ករណីសង្ស័យបើកល្បែងស៊ីសងតាមអនឡាញខុសច្បាប់នៅលើទឹកដីកម្ពុជា។
នេះយោងតាមគេហទំព័ររបស់អគ្គស្នងការដ្ឋាននគរបាលជាតិ ចេញផ្សាយនៅថ្ងៃទី៣ ខែសីហា។
ក្រោយសមត្ថកិច្ចចិន បានសហការណ៍ជាមួយកម្លាំងសមត្ថកិច្ចខ្មែរ នៅថ្ងៃទី២ ខែសីហា ជនបរទេស ២១៥នាក់ ក្នុងនោះស្រី៣២នាក់ ត្រូវបានឃាត់នៅព្រំដែនកម្ពុជា-ថៃ ក្នុងភូមិក្បាលស្ពាន១ សង្កាត់ក្រុងប៉ោយប៉ែត ខេត្តបន្ទាយមានជ័យ។ ក្នុងចំណោមជនបរទេសទាំង២១៥នាក់ មានជនជាតិថៃ២នាក់ ម៉ាឡេស៊ី២នាក់ និង២១១នាក់ គឺជាជនជាតិចិន។
បើតាមគេហទំព័រអគ្គស្នងការដ្ឋាននគរបាលជាតិ បានឲ្យដឹងថា ការចាប់ខ្លួនជនបរទេសទាំងនេះ គឺដោយពួកគេបើកល្បែងស៊ីសងតាមប្រព័ន្ធអ៊ីនធឺណែត និងស្នាក់នៅខុសច្បាប់កម្ពុជា។
លោក ឃុន សំបូរ អគ្គនាយករងនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃ ត្រូវបានគេហទំព័រខាងលើ ស្រង់ប្រសាសន៍ថា កម្លាំងសមត្ថកិច្ចចិនបានសហការជាមួយកម្លាំងអគ្គនាយកដ្ឋាននគរបាលអន្តោប្រវេសន៍ និងអគ្គនាយកដ្ឋានប្រៃសណីយ៍ ដោយរួមទាំងកម្លាំងនគរបាលខេត្ត/ក្រុង បានបើកយុទ្ធនាការបង្ក្រាបជនបរទេសទាំងនេះ និងបានរឹបអូសសម្ភារៈល្បែងស៊ីសងតាមអនឡាញខុសច្បាប់ជាច្រើនផងដែរ។ លោកបន្តថា ជនជាតិថៃចំនួន២នាក់ និងម៉ាឡេស៊ីចំនួន២នាក់ ត្រូវបានដោះលេង ខណៈជនជាតិចិនត្រូវបានបញ្ជូនទៅរាជធានីភ្នំពេញ ដើម្បីអនុវត្តន៍ច្បាប់។
លោក អ៊ូ បូរ៉ាត់ អគ្គនាយកដ្ឋានប្រៃសណីយ៍ ត្រូវបានគេហទំព័រខាងលើស្រង់ប្រសាសសន៍ថា ជនបរទេសទាំងនេះ មានប៉ាស្ព័រ តែគ្មានទិដ្ឋាការ និងបានស្នាក់នៅខុសច្បាប់ ព្រមទាំងបើកល្បែងស៊ីសងតាមប្រព័ន្ធអនឡាញនៅក្នុងកាស៊ីណូហ្គោលដិនក្រោន នៅក្បែរព្រំដែនកម្ពុជា.ថៃ ដែលស្ថិតក្រុងប៉ោយប៉ែត៕
Tag:
ចិន
ថៃ
ម៉ាឡេស៊ី
ច្បាប់
© រក្សាសិទ្ធិដោយ thmeythmey.com