កីឡាជាតិ
ជាតិ
ស៊ីហ្គេមនៅម៉ាឡេស៊ីអាចជាការប្រកួតចុងក្រោយរបស់ ហែមថុន វិទិនី ![កីឡាការិនីហែលទឹកជម្រើសជាតិ ហែម ថុនវិទិនី ពេលជួបសម្តេច ហ៊ុន សែន មុនចេញទៅស៊ីហ្គេមនៅម៉ាឡេស៊ីនាវិមានសន្តិភាព។ រូបភាពពីហ្វេសប៊ុកសម្តេច ហ៊ុន សែន](https://image.thmeythmey.com/pictures/2017/08/04/thiny.jpg)
កីឡាការិនីហែលទឹកជម្រើសជាតិ ហែម ថុនវិទិនី ពេលជួបសម្តេច ហ៊ុន សែន មុនចេញទៅស៊ីហ្គេមនៅម៉ាឡេស៊ីនាវិមានសន្តិភាព។ រូបភាពពីហ្វេសប៊ុកសម្តេច ហ៊ុន សែន
×![]()
កីឡាការិនីហែលទឹកជម្រើសជាតិ ហែមថុន វិទិនី ទំនងជាអាចបញ្ចប់អាជីពជាកីឡាការិនីហែលទឹកនៅឆ្នាំ២០១៨ ដូច្នេះសម្រាប់ការចូលរួមប្រកួតកីឡាស៊ីហ្គេមលើកទី២៩នៅប្រទេសម៉ាឡេស៊ីពីថ្ងៃទី១៩ ដល់ថ្ងៃទី៣១ ខែសីហា លើកនេះ អាចជាការចូលរួមលើកចុងក្រោយរបស់កីឡាការិនីវ័យ២៤ឆ្នាំរូបនេះ។ នេះបើយោងតាមការអះអាងរបស់ថ្នាក់ដឹកនាំសហព័ន្ធខ្មែរកីឡាហែលទឹក។
បើយោងតាមអគ្គលេខាធិការសហព័ន្ធខ្មែរកីឡាហែលទឹក លោក ហែម គីរី កីឡាការិនី ហែមថុន វិទិនី អាចនឹងបញ្ចប់អាជីពជាកីឡាការិនីហែលទឹកនៅឆ្នាំក្រោយនេះ ក្រោមហេតុផលមានបញ្ហាសុខភាព និងដល់ពេលនាងត្រូវបញ្ចប់អាជីពដែលបានប្រឡូកអស់ជាច្រើនឆ្នាំមកនេះ។ តែយ៉ាងណា លោក មិនបានបញ្ជាក់ពេលវេលាច្បាស់លាស់ និងបញ្ជាក់ពីអាជីពថ្មីរបស់ វិទិនី នោះទេ។
កីឡាការិនីហែលទឹកជម្រើសជាតិ ហែមថុន វិទិនី រួមជាមិត្តរួមក្រុមចំនួន៦នាក់ផ្សេងទៀត នឹងចូលរួមប្រកួតកីឡាស៊ីហ្គេមលើកទី២៩ នៅប្រទេសម៉ាឡេស៊ីចាប់ពីថ្ងៃទី១៩ ដល់ថ្ងៃទី៣១ ខែសីហា ខាងមុខនេះ។ បើដូចនឹងការអះអាងខាងលើ ដូច្នេះសម្រាប់ការចូលរួមលើកនេះរបស់ វិទិនី នឹងក្លាយជាការចូលរួមលើកចុងក្រោយសម្រាប់នាងក្នុងនាមជាកីឡាការិនីហែលទឹក។
![](https://image.thmeythmey.com/pictures/2017/08/04/thumb2/kiri.jpg)
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកក្នុងអំឡុងពេលចូលរួមកិច្ចប្រជុំមួយនៅប្រទេសហុងគ្រី
ក្នុងបទសម្ភាសជាមួយសារព័ត៌មានថ្មីៗ លោក ហែម គីរី បានលើកឡើងយ៉ាងដូច្នេះថា៖«ខ្ញុំរំពឹងថា ស៊ីហ្គេមនៅម៉ាឡេស៊ីឆ្នាំនេះ វិទិនី នឹងអាចឈានដល់វគ្គផ្តាច់ព្រ័ត្រ ហើយនាងបានតាំងចិត្តថា ចង់ចូលដល់វគ្គផ្តាច់ព្រ័ត្រម្តងទៀត ព្រោះវាជាការចូលរួមស៊ីហ្គេមលើកចុងក្រោយរបស់នាង។ នាងបានសម្រេចចិត្តថា នៅឆ្នាំក្រោយនាងនឹងចូលនិវត្តពីកីឡាហែលទឹក ដោយសារកត្តាសុខភាព និងពេលវេលារបស់នាង»។
លោកបានបន្តថា សហព័ន្ធខ្មែរកីឡាហែលទឹកកំពុងស្វែងរកកីឡាការិនីហែលទឹកដែលមានសមត្ថភាពវ័យក្មេង ដើម្បីមកជំនួសតំណែងកីឡាការិនី ហែមថុន វិទិនី ដែលគ្រោងចូលនិវត្តនៅឆ្នាំក្រោយ។ កីឡាការិនីវ័យក្មេង សុខ វរលក្ខណ៍ ដែលជាបេក្ខភាពមួយរូបក្នុងចំណោមបេក្ខភាពទាំង៧រូបដែលចូលរួមប្រកួតកីឡាស៊ីហ្គេម អាចក្លាយជាកីឡាការិនីបន្តវេនពី វិទិនី ទៅថ្ងៃអនាគត៕
Tag:
ហែលទឹក
ហែមថុន វិទិនី
ហែម គីរី
SEA Games 2017
© រក្សាសិទ្ធិដោយ thmeythmey.com