ជាតិ
គ្រូបង្រៀនកម្ពុជាម្នាក់ ទទួលពានរង្វាន់ឆ្នើមឆ្នាំ២០១៧ របស់ព្រះអង្គម្ចាស់ក្សត្រិយ៍ សិរិនថន រូបពីហ្វេសប៊ុកស្ថានទូតថៃប្រចាំកម្ពុជា
× ភ្នំពេញ៖ គ្រូបង្រៀនកម្ពុជាម្នាក់ ត្រូវបានជ្រើសរើសជាប់ពានរង្វាន់ឆ្នើមឆ្នាំ២០១៧ របស់ព្រះអង្គម្ចាស់ក្សត្រិយ៍ថៃ សិរិនថន ដែលមានចំនួនទឹកប្រាក់ចំនួន ១ម៉ឺនដុល្លារ។ ពានរង្វាន់មូលនិធិនេះ នឹងត្រូវប្រគល់ជូនគ្រូបង្រៀនឆ្នើម នៅថ្ងៃទី១១ តុលាខាងមុខនេះ នៅទីក្រុងបាងកក ប្រទេសថៃ។
លោក Krissanapong Kirtikara ប្រធានមូលនិធិពានរង្វាន់ព្រះអង្គម្ចាស់ចក្រី សិរិនថន នៃប្រទេសថៃ បានបញ្ជាក់ថា ការជ្រើសរើសគ្រូបង្រៀនឆ្នើម ដែលសក្តិសមទទួលបានពានរង្វាន់នេះ ធ្វើឡើងចំពោះលោកគ្រូ ឬអ្នកគ្រូបង្រៀន ដែលមានស្នាដៃជំរុញដល់ការផ្លាស់ប្ដូររបស់សិស្ស ក្នុងការយកចិត្តទុកដាក់សម្រាប់ការសិក្សាពួកគេ។
ថ្លែងក្នុងសន្និសីទសារព័ត៌មាន ស្ដីពីការទទួលបានពានរង្វាន់មូលនិធិព្រះអង្គម្ចាស់ចក្រីសិរិនថន កាលថ្ងៃទី០៣ ខែសីហា នៅស្ថានទូតថៃប្រចាំកម្ពុជា លោក Krissanapong Kirtikara បានបន្ថែមដូច្នេះថា៖«ការជ្រើសរើសយកគ្រូល្អនេះ ត្រូវបានធ្វើឡើងដោយការសម្រិតសម្រាំង តាមរយៈក្រសួងអប់រំក្នុងប្រទេសនីមួយៗ ដោយពិនិត្យទៅលើស្នាដៃ ទេពកោសល្យ និងគំនិតច្នៃ ប្រឌិតក្នុងការបង្រៀន ដើម្បីឱ្យសិស្សទទួលបាននូវចំណេះជំនាញ និងការផ្ដល់នូវទំនុកចិត្ដពីសំណាក់មាតាបិតា សិស្សផងដែរ»។
ក្រោយពីជ្រើសរើសគ្រូឆ្នើមក្នុងការបង្រៀននៅក្នុងប្រទេសកម្ពុជារួចហើយ ក្រុមមូលនិធិពានរង្វាន់ព្រះអង្គម្ចាស់ចក្រីសិរិនថន នឹងបន្តចុះត្រួតពិនិត្យលើវិធីសាស្ដ្រក្នុងការបង្រៀន ការគ្រប់គ្រងនៅក្នុងសាលា រៀន និងតាមដានការបង្រៀនសិស្សផងដែរ។ នេះបើតាមលោក Kirtikara។
គ្រូបង្រៀនថ្នាក់ទី៦ នៃសាលាបឋមសិក្សាគំរូ នៃខេត្ដកំពង់ឆ្នាំង អ្នកគ្រូ ឌី សោភ័ណ្ឌ ដែលជាអ្នកទទួលបានពានរង្វាន់ពីមូលនិធិព្រះអង្គម្ចាស់ចក្រីសិរិនថនឆ្នាំ២០១៧នេះ បាននិយាយថា ការបង្រៀនសិស្សកន្លងមក គឺអ្នកគ្រូ បានយកទឹកចិត្ដ និងបេះដូងពិតប្រាកដ ដាក់ក្នុងការបង្រៀនធ្វើយ៉ាងណាឲ្យសិស្សមាន ចំណេះដឹង និងមានឥរិយាបទល្អ ។ អ្នកគ្រូ សោភ័ណ្ឌ បន្ថែមថា ខ្លួនមិនដែលគិតដល់ការបង្រៀនសិស្ស ដើម្បីទទួលយករង្វាន់ ឬការកោតសរសើរលើស្នាដៃអ្វីនោះទេ ។
«ក្នុងនាមជាគ្រូបង្រៀនត្រូវធ្វើយ៉ាងម៉េច ដើម្បីឲ្យសិស្សឆាប់ទទួលបាននូវចំណេះដឹង ការច្នៃប្រឌិតខ្ពស់ និងការ ស្វែងរកវិធីសាស្ដ្រថ្មីៗ ដើម្បីឲ្យសិស្សកម្រិតខ្សោយ មធ្យម និងកម្រិតខ្ពស់ អាចចាប់បានការបង្រៀនរបស់យើងត្រូវខិតខំការសិក្សាស្រាវជ្រាវស្វែងរកវិធីសាស្ដ្រថ្មីៗក្នុងការបង្រៀន ដើម្បីឱ្យសិស្សងាយយល់ និងចាំបាន ដែលអាចធ្វើឲ្យសិស្សធ្លាក់មធ្យមភាគក្នុងថ្នាក់មានកម្រិតតិចតួចបំផុត»។ នេះជាការលើកឡើងរបស់អ្នកគ្រូ ឌី សោភ័ណ្ឌ។
ព្រះអង្គម្ចាស់ចក្រី សិរិនថន បានបង្កើតមូលនិធិផ្ដល់រង្វាន់សម្រាប់គ្រូបង្រៀនឆ្នើម កាលពីឆ្នាំ២០១៥ ដើម្បីផ្ដល់ជូនដល់គ្រូបង្រៀនចំនួន១១ប្រទេស ក្នុងតំបន់អាស៊ាន ។ ជ័យលាភីគ្រូបង្រៀនឆ្នើមនេះ មានទឹកប្រាក់ចំនួន១ម៉ឺនដុល្លារ និងពានរង្វាន់មាស ។ កាលពីឆ្នាំ២០១៥ អ្នកគ្រូ តូច បណ្ដូល ជាគ្រូបង្រៀនសាលាបឋមសិក្សាវត្ដបូ ក្នុងខេត្ដសៀមរាប ត្រូវបានមូលនិធិធ្វើការជ្រើសរើសយកសម្រាប់ប្រគល់ពាន់រង្វាន់ ជាគ្រូបង្រៀនល្អផងដែរ ៕
ប្រភពពីAKP
Tag:
គ្រូបង្រៀន
ព្រះមហាក្សត្រថៃ
© រក្សាសិទ្ធិដោយ thmeythmey.com