ជាតិ
សិស្សនិទ្ទេស A ក្នុងខេត្តកោះកុង នឹងទទួលបានថវិកា ៤លានរៀល ពីអភិបាលខេត្ត ![](https://image.thmeythmey.com/pictures/2017/08/05/bacii.jpg)
×![]()
ភ្នំពេញ៖ សម័យប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៧នេះ នឹងប្រព្រឹត្តទៅនៅថ្ងៃទី ២១ សីហាខាងមុខនេះ។ លោកស្រី មិថុនា ភូថង អភិបាល នៃគណៈអភិបាលខេត្តកោះកុង បានប្រកាសផ្ដល់ថវិកាដល់សិស្សានុសិស្សដែលទទួលបានលទ្ធផលនិទ្ទេស A ប្រចាំខេត្តកោះកុង ក្នុងម្នាក់ ៤លានរៀល ដើម្បីលើកទឹកចិត្តសិស្សានុសិស្សប្រចាំខេត្តនេះ។
សិស្សថ្នាក់ទី១២ នៅខេត្តកោះកុង ដែលទទួលបានលទ្ធផលនិទ្ទេស A ក្នុងសម័យប្រឡង ២១ សីហានេះ នឹងទទួលបានថវិកាលើកទឹកចិត្ត ចំនួន ៤លានរៀល ក្នុងម្នាក់ ពីអភិបាលខេត្តកោះកុង លោកស្រី មិថុនា ភូថង។
ក្នុងសេចក្ដីជូនដំណឹងរបស់រដ្ឋបាលខេត្តកោះកុង នៅថ្ងៃទី ៤ សីហា លោកស្រី មិថុនា ភូថង បានលើកឡើងថា៖ «សូមលើកទឹកចិត្ត ដល់សិស្សានុសិស្ស ឲ្យខិតខំប្រឹងប្រែងយកចិត្តទុកដាក់ក្នុងការប្រឡង ដោយយកចំណេះដឹងសមត្ថភាពផ្ទាល់ខ្លួន ជាមូលដ្ឋាន ដោយមិនត្រូវពឹងផ្អែកលើ ការលួចចម្លង ពីសំណៅឯកសារផ្សេងៗ»។ តាមរយៈការខិតខំប្រឹងប្រែងរបស់សិស្សានុសិស្ស លោកស្រី មិថុនា ភូថង សន្យាថា នឹង ផ្ដល់ថវិកាលើកទឹកចិត្ត ដល់សិស្សានុសិស្សដែលប្រឡងជាប់និទ្ទេស A ក្នុងម្នាក់ ចំនួន ៤លានរៀល។
អភិបាលខេត្តរូបនេះ ក៏អំពាវនាវដល់អាណាព្យាបាលសិស្សទាំងអស់ ឲ្យណែនាំកូនចៅ ឲ្យគោរពបទបញ្ជាផ្ទៃក្នុង និងគោលការណ៍ណែនាំនានាសម្រាប់ការប្រឡង។ លោកស្រី មិថុនា ភូថង បន្ថែមថា មិនត្រូវចាញ់បោកជនខិលខូចមួយចំនួនពាក់ព័ន្ធនឹងការរត់ការក្នុងការប្រឡងជាដាច់ខាត។ នេះបើតាមសេចក្ដីជូនដដែល។
សូមបញ្ជាក់ថា សម័យប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) សម្រាប់ឆ្នាំសិក្សា២០១៦-២០១៧ នឹងប្រព្រឹត្តទៅ នៅថ្ងៃទី ២១-២២ ខែសីហា។ ការប្រឡងនេះ មានបេក្ខជនចំនួន ១០៣ ១១២ នាក់ ទាំងថ្នាក់វិទ្យាសាស្ត្រ និងវិទ្យាសាស្ត្រសង្គម ដោយចែកចេញជា ១៧៨ មណ្ឌល និងបន្ទប់ប្រឡងចំនួន ៤១៥៥ បន្ទប់ នៅទូទាំង ២៥រាជធានី-ខេត្ត៕
Tag:
បាក់ឌុប
កោះកុង
និទ្ទេស A
© រក្សាសិទ្ធិដោយ thmeythmey.com