កីឡាជាតិ
ជាតិ
លោក វ៉ាត់ ចំរើន ប្រាប់កីឡាករដែលប្រើថ្នាំពេទ្យ រាយការណ៍មក NOCC ដើម្បីចៀសវាងការរងពិន័យ Doping
×
នៅសល់តែជាងមួយសប្តាហ៍ទៀត ប្រតិភូ និងអត្តពលិកកម្ពុជាលើ២៤ប្រភេទកីឡានឹងទៅចូលការប្រកួតកីឡាស៊ីហ្គេមលើកទី២៩នៅទីក្រុងកូឡាឡាំពួរ ប្រទេសម៉ាឡេស៊ី ដែលចាប់ផ្តើមពីថ្ងៃទី១៩ ដល់ថ្ងៃទី៣១ ខែសីហា។ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា(NOCC) ជំរុញឲ្យគ្រូបង្វឹកគ្រប់ប្រភេទកីឡា ត្រូវរាយការណ៍ជាបន្ទាន់មក NOCC បើមានកីឡាករប្រើថ្នាំពេទ្យជាប្រចាំសម្រាប់ព្យាបាលជំងឺ ដើម្បីជៀងវាងការពិន័យពីគណៈកម្មាការ Doping ម៉ាឡេស៊ី។
អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន ជំរុញឲ្យសហព័ន្ធទាំង២៤ប្រភេទកីឡាដែលត្រូវចូលរួមប្រកួតកីឡាស៊ីហ្គេលលើកទី២៩នៅទីក្រុងកូឡាឡាំពួរប្រទេសម៉ាឡេស៊ី ត្រូវផ្តល់ដំណឹងជាបន្ទាន់មកកាន់ NOCC បើមានករណីកីឡាករប្រើប្រាស់ថ្នាំពេទ្យជាប្រចាំដើម្បីព្យាបាលជំងឺ។ ការជំរុញនេះ គឺដើម្បីរាយការណ៍ទៅកាន់គណៈកម្មការត្រួតពិនិត្យសារធាតុ Doping របស់ម៉ាឡេស៊ី ដើម្បីជៀសវាងការពិន័យ ដែលធ្វើឲ្យខូចកិត្តិយសប្រទេសជាតិ។
នាពិធីជប់លៀងអបអរមុនថ្ងៃចេញដំណើរកាលពីយប់ថ្ងៃទី៤ ខែសីហា នៅសណ្ឋាគាសូហ្វីតែល លោក វ៉ាត់ ចំរើន បានជំរុញយ៉ាងដូច្នេះថា៖«បើមានកីឡាករកីឡាការិនីណាដែលប្រើប្រាស់ថ្នាំសម្រាប់ព្យាបាលជំងឺជាប្រចាំ សូមរាយការណ៍មក NOCC ជាបន្ទាន់ ព្រោះវាប៉ះពាល់ដល់រឿង Doping។ គ្រូបង្វឹក ឬអត្តពលិកត្រូវយកថ្នាំទាំងនោះមកឲ្យ NOCC ដើម្បីឲ្យ NOCC រាយការណ៍ដល់គណៈកម្មការ Doping របស់ម៉ាឡេស៊ី។ បើពុំនោះទេម្ចាស់ផ្ទះម៉ាឡេស៊ីនឹងពិន័យលើ Doping ដល់យើងហើយ»។
កន្លងមកនាយករដ្ឋមន្រ្តី ហ៊ុន សែន បានផ្តាំឲ្យកីឡាករទាំងអស់ ចៀសវាងការប្រើប្រាស់សារធាតុជំនួយកម្លាំងក្នុងការប្រកួត និងទី២ កីឡាករត្រូវប្រកួតឲ្យបានត្រឹមត្រូវតាមក្បួនខ្នាត និងលក្ខន្តិកៈនៃប្រភេទកីឡានីមួយៗ ជៀសវាងការចង់ឈ្នះដោយរំលោភបំពានលើគូប្រជែង ដែលនាំអន្តរាយដល់ខ្លួនឯង និងកិត្តិយស កេរិ៍ឈ្មោះប្រទេសជាតិ។
បន្ថែមពីនេះ លោក វ៉ាត់ ចំរើន ជំរុញឲ្យអត្តពលិកកម្ពុជាទាំងអស់ត្រូវប្រឹងប្រែងប្រកួតឲ្យអស់ពីសមត្ថភាពក្នុងស្មារតីជាអ្នកកីឡា ជាពិសេសត្រូវប្រើសមត្ថភាព បច្ចេកទេស និងចិត្តសាស្ត្រផ្ទាល់ខ្លួន បើឈ្នះត្រូវឈ្នះដោយបច្ចេកទេស និងចាញ់ត្រូវចាញ់ដោយបច្ចេកទេស។ លើសពីនេះ លោក បានផ្តាំផ្ញើឲ្យអត្តពលិកទាំងអស់ត្រូវរក្សាសុខភាព និងកម្លាំងចិត្តឲ្យបានល្អកុំតក់ស្លុតទោះបីត្រូវប្រឈមជាមួយកីឡាករមកពីប្រទេសណាក៏ដោយ។
លោកបានបន្តថា ដោយមានការឧបត្ថម្ភពីក្រុមហ៊ុនស្រាបៀរអង្គរ និងក្រុមហ៊ុនណាហ្គាវើលប្រាក់រង្វាន់លើកទឹកចិត្តសម្រាប់ម្ចាស់ជ័យលាភីពីព្រឹត្តិការណ៍ស៊ីហ្គេមបានកើនឡើងទ្វេរដង។ ក្នុងនោះមេដាយមាស២៤,០០០ដុល្លារ, ប្រាក់១៣,៥០០ដុល្លារ និងសំរឹទ្ធ៧ពាន់ដុល្លារសម្រាប់វិញ្ញាសាឯកត្តជន។ សម្រាប់វិញ្ញាសាជាក្រុម ណាហ្គាវើល និងស្រាបៀរអង្គរនឹងបន្ថែម២ពាន់ដុល្លារលើមេដាយនីមួយៗ។ ក្នុងករណីកីឡាបាល់ទាត់បើឈ្នះមួយប្រកួត និងនឹងទទួលបាន២ពាន់ដុល្លារពីក្រុមហ៊ុនស្រាបៀរអង្គរ៕
Tag:
SEA Games 2017
វ៉ាត់ ចំរើន
© រក្សាសិទ្ធិដោយ thmeythmey.com