អន្តរជាតិ
ប្រធានសភាសិង្ហបុរីលាលែងតំណែងដើម្បីឈរឈ្មោះជាបេក្ខជនប្រធានាធិបតី
× នៅថ្ងៃចន្ទទី៧ខែសីហា ប្រធានសភាសិង្ហបុរី និងជាសមាជិកសភាគណបក្សសកម្មប្រជាជនអ្នកស្រី Halimah Yacob បានប្រគល់លិខិតលាលែងពីតំណែងឲ្យនាយករដ្ឋមន្ត្រី លី សៀនឡុង។ លោកស្រី Yacob នឹងឈរឈ្មោះជាបេក្ខជនក្នុងការបោះឆ្នោតជ្រើសរើសប្រធានាធិបតីថ្មីដែលនឹងធ្វើឡើងនៅខែកញ្ញា។
លោកស្រី Halimah Yacob ដែលជាប្រធានសភាស្ត្រីដំបូងគេ និងជាសមាជិកសភាគណបក្សសកម្មភាពប្រជាជនបានអះអាងថា លោកស្រីបានលាឈប់ពីតំណែងហើយ ដើម្បីឈរឈ្មោះក្នុងការបោះឆ្នោតជាប្រធានាធិបតីអាណត្តិថ្មីដែលបម្រុងទុកសម្រាប់បេក្ខជនម៉ាឡេ។ លោកស្រីបានប្រគល់លិខិតលាលែងតំណែងជូនលោក លី សៀនឡុង ដែលជានាយករដ្ឋមន្ត្រីសិង្ហបុរីនិងអគ្គលេខាបក្សគណបក្សសកម្មប្រជាជនផង។
ក្នុងលិខិតផ្ញើទៅឲ្យលោក លី លោកស្រី Yacob បញ្ជាក់ថា អ្នកស្រីមានបំណងលាលែងតំណែងជាសមាជិកគណៈកម្មាធិការប្រតិបត្តិកណ្ដាល និងជាសមាជិកក្រុមមន្ត្រីជាន់ខ្ពស់នៃគណបក្សសកម្មប្រជាជន ដែលជាបក្សកាន់អំណាចសព្វថ្ងៃ។ លោកស្រីបានប្រាប់លោក លី បន្ថែមថា ការឈរឈ្មោះសម្រាប់ការបោះឆ្នោតជាប្រធានាធិបតីអាណត្តិថ្មី បន្ទាប់ពីពិចារណាយ៉ាងល្អិតល្អន់ និងពិគ្រោះជាមួយមិត្តភក្តិ មិត្តរួមការងារ ក៏ដូចជាសមាជិកគ្រួសារផងដែរ។
សូមបញ្ជាក់ថា អំឡុងពេលពិសាអាហារពេលល្ងាចក្នុងថ្ងៃបុណ្យជាតិនៅក្លឹបហាត់ប្រាណ Marsiling Mega ប្រធានសភាបានបង្ហាញបំណងឈរឈ្មោះជាបេក្ខជនប្រធានាធិបតីថ្មី។ លោកស្រីនិយាយដូច្នេះថា៖ «ខ្ញុំទទួលស្គាល់ថា ការឈរឈ្មោះសម្រាប់ការបោះឆ្នោតប្រធានាធិបតីទាល់តែពោរពេញទៅដោយសមត្ថភាពដើម្បីបម្រើជាតិក៏ដូចជាប្រជាជនសិង្ហបុរីផងដែរ។ ដូច្នេះហើយ ខ្ញុំនឹងឈរឈ្មោះជាបេក្ខជនសម្រាប់ការបោះឆ្នោតជាប្រធានាធិបតីអាណត្តិថ្មីនេះ»។
លោកស្រី Yacob ក៏បានស្នើឲ្យលោក លី បញ្ជូនទីប្រឹក្សាមកជួយការងាររបស់សមាជិកសភាបក្សសកម្មភាពប្រជាជនមណ្ឌលរបស់លោកស្រីផងដែរ។ លោកស្រីក៏ស្នើឲ្យលោកនាយករដ្ឋមន្ត្រីរកអ្នកមកជំនួសតួនាទីដែលទំនេរឲ្យបានឆាប់បំផុតមុនពេលអ្នកស្រីលាលែងពីតំណែង ដើម្បីជួយសម្រាលបន្ទុកកិច្ចការសមាជិកដទៃទៀតរបស់គណបក្សសកម្មប្រជាជន។
នៅថ្ងៃដដែល លោក លី សៀនឡុង ក៏បានទទួលលិខិតលាលែងរបស់លោកស្រី Yacob ដែរ។ លោក លី បានអរគុណលោកស្រី Yacob ចំពោះសមិទ្ធផលក្នុងរយៈពេលប៉ុន្មានឆ្នាំមកនេះ។ លោក ក៏គាំទ្របំណងរបស់លោកស្រី Yacob ក្នុងការប្រជែងកៅអីប្រធានាធិបតីនេះ ដោយនិយាយថា ប្រសិនបើជាប់ឆ្នោត លោកស្រីនឹងបំពេញការងារដោយអស់ពីចិត្តលើតួនាទីដ៏ខ្ពង់ខ្ពស់នេះ៕
Tag:
Halimah Yacob
ការបោះឆ្នោតជាប្រធានាធិបតី
Lee Hsien Loong
© រក្សាសិទ្ធិដោយ thmeythmey.com