ជាតិ
JICA បង្កើតវិទ្យាស្ថានគរុកោសល្យនៅកម្ពុជា ដើម្បីជួយពង្រឹងសមត្ថភាពគ្រូបង្រៀន
×![]()
ភ្នំពេញ៖ គម្រោងកសាងមូលដ្ឋានគ្រឹះសម្រាប់វិទ្យាស្ថានគរុកោសល្យ (E-TEC) ដើម្បីពង្រឹងសមត្ថភាពគ្រូបង្រៀននៅកម្ពុជា ជាផ្នែកមួយនៃគម្រោងរបស់ទីភ្នាក់ងារសហប្រតិបត្តិការអន្តរជាតិរបស់ជប៉ុន(JICA)។ លោក កូហ្ស៊ី តាកាហាស៊ី ប្រធានគម្រោង E-TEC បានថ្លែងថា គម្រោងនេះ ផ្តោតសំខាន់លើការបណ្តុះបណ្តាលដល់គរុនិស្សិតកម្រិតបឋម និងអនុវិទ្យាល័យ។
ទីភ្នាក់ងារសហប្រតិបត្តិការអន្តរជាតិជប៉ុន(JICA) បានបង្កើតគម្រោងកសាងមូលដ្ឋានគ្រឹះសម្រាប់វិទ្យាស្ថានគរុកោសល្យ(E-TEC) ដើម្បីបង្រៀនគរុកោសល្យដល់និស្សិតខ្មែរចំនួន៤ឆ្នាំ។ នេះជាគម្រោងលើកដំបូងបង្អស់របស់JICA ដែលចាប់យកខេត្តគោលដៅចំនួនពីរ គឺភ្នំពេញ និងខេត្តបាត់ដំបង ដើម្បីសាកល្បងគម្រោងផ្លាស់ប្តូរពីការបង្រៀន១២+២(រៀនគរុកោសល្យរយៈពេល២ឆ្នាំ) ទៅជាការបង្រៀន១២+៤ (រៀនគរុកោសល្យរយៈពេល៤ ឆ្នាំ)វិញ។
ប្រធានគម្រោង E-TEC លោក កូហ្ស៊ី តាកាហាស៊ី បានថ្លែងប្រាប់ក្រុមអ្នកសារព័ត៌មាននៅស្ថានទូតជប៉ុនប្រចាំកម្ពុជា ថា គម្រោងនេះ ចាប់ផ្តើមពីខែមករាឆ្នាំ ២០១៧ រហូតដល់ខែធ្នូឆ្នាំ២០២២ ដែលស្ថិតនៅខេត្តបាត់ដំបង និងរាជធានីភ្នំពេញ។ លោកពន្យល់ថា គម្រោងរយៈពេល៦ឆ្នាំនេះ មានគោលដៅប្តូរពីការរៀនគ្រូរយៈពេល២ឆ្នាំ ដោយប្តូរឲ្យគរុនិស្សិតរៀនរយៈពេល៤ឆ្នាំ ដែលមានសញ្ញាបត្រស្មើនឹងបរិញ្ញាបត្រ។
លោកបញ្ជាក់យ៉ាងដូច្នេះថា៖«ការរៀនគ្រូរយៈពេល ២ ឆ្នាំ គឺមិនគ្រប់គ្រាន់នោះទេ។ ប្រទេសនៅក្នុងតំបន់ គេបានដើរមុនកម្ពុជា ដោយគេឲ្យគរុនិស្សិតរៀនចំនួន៤ឆ្នាំ ព្រោះ វាការពង្រឹងចំណេះដឹង និងសមត្ថកិច្ចគ្រូ។ កន្លងមក JICA ធ្វើការក្នុងវិស័យអប់រំច្រើន និងបានធ្វើការស្ទង់មតិមួយ ដោយរកឃើញថា សមត្ថភាពគ្រូកម្ពុជានៅមានកម្រិត។ ដូច្នេះ បានជា JICA ងាកទៅផ្តោតលើគម្រោងការផ្តល់ចំណេះដឹង និងពង្រឹងសមត្ថភាពគ្រូកម្រិតបឋម និងមធ្យមសិក្សាវិញ»។
លោក កូហ្ស៊ី តាកាហាស៊ី រំពឹងថា គម្រោងនេះ នឹងជួយបណ្តុះបណ្តាលគរុនិស្សិតកម្ពុជាជាង៧០០នាក់ក្នុងមួយឆ្នាំ ដោយក្នុងនោះ នៅឆ្នាំ ២០១៨ JICA នឹងសាងសង់វិទ្យាស្ថានគរុកោសល្យមួយនៅខេត្តបាត់ដំបង និងមួយកន្លែងទៀតនៅភ្នំពេញ ព្រមទាំងផ្តល់សាស្ត្រាចារ្យមកពីប្រទេសជប៉ុន៨នាក់ផងដែរ។ លើសពីនេះ មាននិស្សិតខ្មែរប្រមាណ ១០នាក់ កំពុងបន្តការសិក្សាថ្នាក់អនុបណ្ឌិតនៅប្រទេសជប៉ុន ដែលមានជំនាញផ្នែកគរុកោសល្យ នឹងត្រឡប់មកកម្ពុជានៅពេលពួកគេរៀនចប់ ហើយនឹងចូលរួមបង្រៀននៅវិទ្យាស្ថានទាំងពីរខាងលើនេះ។
ការបង្រៀនគរុនិស្សិតរយៈពេល៤ឆ្នាំ ឬ១២+៤នេះ បានបង្កើតឡើងដោយប្រទេសសិង្ហបុរី ដោយបានធ្វើឲ្យគ្រូមានចំណេះដឹង និងសមត្ថភាព។ នេះបើតាមការបញ្ជាក់របស់ លោក កូហ្ស៊ី តាកាហាស៊ី ដោយពន្យល់ថា JICA បានចុះកិច្ចព្រមព្រៀងជាមួយក្រសួងអប់រំ យុវជន និងកីឡា ដើម្បីបង្រៀនដោយតាមប្រព័ន្ធនេះនៅកម្ពុជា ដើម្បីជួយបង្កើនសមត្ថភាពគ្រូកម្រិតបឋមសិក្សា និងអនុវិទ្យាល័យនៅកម្ពុជា ដែលទទួលស្គាល់ដោយសញ្ញាបត្របរិញ្ញាបត្រផងដែរ៕
Tag:
JICA
ជប៉ុន
© រក្សាសិទ្ធិដោយ thmeythmey.com
