អន្តរជាតិ
ចិនប្រកាសបង្កើតមជ្ឈមណ្ឌលកិច្ចសហប្រតិបត្តិការប្រព័ន្ធផ្សព្វផ្សាយក្រោម«គំនិតផ្តួចផ្តើមវិថីសូត្រ» (Dunhuang)៖ ចិនបានប្រកាសបង្កើតមជ្ឈមណ្ឌលកិច្ចសហប្រតិបត្តិការប្រព័ន្ធផ្សព្វផ្សាយក្រោមក្របខណ្ឌខ្សែក្រវ៉ាត់មួយវិថីមួយ (BRI) ដើម្បីពង្រឹងកិច្ចសហប្រតិបត្តិការរវាងប្រព័ន្ធផ្សព្វផ្សាយនានានៅបណ្ឌារដ្ឋសមាជិកគំនិតផ្តួចផ្តើមនេះឲ្យកាន់តែស៊ីជម្រៅ។
ប្រធានសារព័ត៌មានរដ្ឋចិន People’s Daily លោក Yang Zhenwu បានប្រកាសក្នុងពិធីបើកកិច្ចវេទិកាកិច្ចសហប្រតិបត្តិការប្រព័ន្ធផ្សព្វផ្សាយឆ្នាំ ២០១៧ នៅក្រុង Dunhuang នាថ្ងៃអង្គារទី ១៩ ខែកញ្ញាថា ស្ថាប័នលោកនឹងបង្កើតមជ្ឈមណ្ឌលកិច្ចសហប្រតិបត្តិការប្រព័ន្ធផ្សព្វផ្សាយ (Belt and Road Media Cooperation Center) ដើម្បីរួមចំណែកពង្រឹងទំនាក់ទំនងនិងកិច្ចសហប្រតិបត្តិការរវាងប្រព័ន្ធផ្សព្វផ្សាយនានាស្ថិតក្នុងប្រទេសសមាជិកគំនិតផ្តួចផ្តើមវិថីសូត្រ។
តំណាងស្ថាប័នសារព័ត៌មានជាង ២៦០ មកពីប្រទេស ១២៦ ទូទាំងពិភពលោកចូលរួមក្នុងវេទិកាកិច្ចសហប្រតិបត្តិរៀបចំឡើងដោយសារព័ត៌មានចិន People’s Daily នៅក្រុង Dunhuang ពីថ្ងៃ ១៩ ដល់ថ្ងៃ ២០ ខែកញ្ញានេះ។ សារព័ត៌មានថ្មីៗក៏ស្ថិតក្នុងចំណោមសារព័ត៌មានច្រើនជាង ២៦០ ដែលចូលរួមក្នុងវេទិកាកិច្ចប្រជុំដ៏ធំប្រចាំឆ្នាំនេះដែរ។
ក្នុងនាមជាតំណាងស្ថាប័នផ្តួចផ្តើមវេទិកានេះ លោក Yang បានលើកឡើងថា ប្រព័ន្ធផ្សព្វផ្សាយពិតជាមានតួនាទីសំខាន់ក្នុងការលើកស្ទួយកិច្ចសហប្រតិបត្តិការ និងការស្វែងយល់ពីគ្នាទៅវិញទៅមករវាងប្រទេសសមាជិកគំនិតផ្តួចផ្តើមខ្សែក្រវ៉ាត់មួយវិថីមួយ។
លោកបានបន្ថែមទៀតថា មជ្ឈមណ្ឌលកិច្ចសហប្រតិបត្តិការប្រព័ន្ធផ្សព្វផ្សាយដែលស្ថាប័នលោកនឹងបង្កើតឡើងនោះនឹងធ្វើការងារជិតស្និទ្ធជាមួយប្រព័ន្ធផ្សព្វផ្សាយផ្សេងទៀតក្នុងប្រទេសជាសមាជិកគំនិតផ្តួចផ្តើមវិថីសូត្រនេះលើការអភិវឌ្ឍបច្ចេកវិទ្យាដូចជាការបង្កើតប្រព័ន្ធគ្រប់គ្រងទិន្នន័យរួមគ្នា រួមទាំងប្រមូលផ្សព្វផ្សាយ និងចែករម្លែកព័ត៌មានជាដើម។ វានឹងរួមចំណែកសម្រួលដល់ការធ្វើពាណិជ្ជកម្ម, ការអភិវឌ្ឍហេដ្ឋារចនាសម្ព័ន្ធ និងធានាប្រយោជន៍ផ្សេងទៀត។
ក្រៅពីនេះ ប្រធានស្ថាប័នសារព័ត៌មាននៃបក្សកុម្មុយនីស្តចិនរូបនេះបានលើកគំនិតយោបល់និងផែនការមួយចំនួនដែលស្ថាប័នលោកនឹងធ្វើនៅពេលខាងមុខ។ សារព័ត៌មាន People’s Daily នឹងជំរុញការបង្កើតមជ្ឈមណ្ឌលស្រាវជ្រាវ និងមជ្ឈមណ្ឌលវប្បធម៌ ដើម្បីបង្កើតផែនការ និងផ្តល់មតិយោបល់ដែលមានទស្សនវិស័យវែងឆ្ងាយ និងប្រកបដោយការស្ថាបនាផងដែរ។
សូមបញ្ជាក់ថា គំនិតផ្តួចផ្តើមខ្សែក្រវ៉ាត់មួយវិថីមួយ (OBOR) ឬវិថីសូត្រ ខ្សែក្រវ៉ាត់សេដ្ឋកិច្ច និង គំនិតផ្តួចផ្តើមផ្លូវសូត្រសមុទ្រសតវត្សរ៍ទី ២១ (The Silk Road Economic Belt and the 21st Century Maritime Road Initiative) ត្រូវបានដាក់ចេញនៅក្នុងឆ្នាំ ២០១៣ ដោយប្រមុខរដ្ឋចិនលោក ស៊ី ជិនពីង ។
គំនិតផ្តួចផ្តើមនេះមានគោលដៅធ្វើយ៉ាងណាកសាងចំណងសេដ្ឋកិច្ច និងសហប្រតិបត្តិការតាមរយៈការសាងសង់ហេដ្ឋារចនាសម្ព័ន្ធដែលតភ្ជាប់ពីអាស៊ីទៅអឺរ៉ុប ឆ្លងទៅដល់អាហ្វ្រិកដោយវាផ្អែកលើផ្លូវពាណិជ្ជកម្មសម័យបុរាណ។ មកដល់ពេលបច្ចុប្បន្ននេះ គំនិតផ្តួចផ្តើមនេះមានការចូលរួមពីបណ្តាប្រទេសនានាទាំងពិភពលោកច្រើនជាង ៦0 មានទាំងអាស៊ី, អាហ្វ្រិកនិងអឺរ៉ុបផងដែរ។ ដើម្បីគាំទ្រហិរញ្ញវត្ថុដល់គម្រោងហេដ្ឋារចនាសម្ព័ន្ធដ៏ធំនេះ ធនាគារវិនិយោគហេដ្ឋារចនាសម្ព័ន្ធអាស៊ី (AIIB)ក៏ត្រូវបានបង្កើតឡើងផងដែរនៅចុងឆ្នាំ២០១៥ ៕
Tag:
ចិន
Dunhuang
BRI
Gansu
People’s Daily
© រក្សាសិទ្ធិដោយ thmeythmey.com