កម្ពុជាមិនពាក់ព័ន្ធនឹងនាវាផ្ទុកកាំភ្លើងបាញ់រ៉ុកកែតដែលបើកចេញពីកូរ៉េខាងជើងទេ

ជាតិ

កម្ពុជាមិនពាក់ព័ន្ធនឹងនាវាផ្ទុកកាំភ្លើងបាញ់រ៉ុកកែតដែលបើកចេញពីកូរ៉េខាងជើងទេ

03, Oct 2017 , 3:13 pm

រូបភាព

ដោយ: ខន ចំប៉ា

ក្រសួងការបរទេសកម្ពុជា បានអះអាងថាកម្ពុជា គ្មានពាក់ព័ន្ធអ្វី នឹងនាវាបំពាក់ទង់ជាតិកម្ពុជាមួយគ្រឿងដែលបានដឹកកាំភ្លើងបាញ់រ៉ុកកែតជាង៣ម៉ឺនដើម ចេញពីកូរ៉េខាងជើងនោះឡើយ។ ការអះអាងនេះ គឺដើម្បីឆ្លើយតបទៅនឹងការផ្សាយរបស់កាសែត The Washington Post ។

តាម The Washington Post គយអេហ្ស៊ីប បានរកឃើញកាំភ្លើងបាញ់រ៉ុកកែតជាង៣ម៉ឺនដើម ដែលលាក់ក្នុងនាវាដឹកទំនិញឈ្មោះ Jie Shun បំពាក់ទង់ជាតិកម្ពុជា ហើយនាវានេះ បានធ្វើដំណើរចេញពីកូរ៉េខាងជើង។

ពាក់ព័ន្ធនឹងករណីនេះ ក្រសួងការបរទេសកម្ពុជាបានគូសបញ្ជាក់ថា កម្ពុជា បានបិទបញ្ឈប់ការចុះបញ្ជីនាវា ចាប់ពីថ្ងៃទី១៧ ខែសីហា ឆ្នាំ២០១៥ ។ ប៉ុន្តែដើម្បីសម្រួលដល់ម្ចាស់នាវា ដែលមានវិញ្ញាបនបត្រចុះបញ្ជីជាមួយទង់ជាតិកម្ពុជានៅមានសុពលភាព កម្ពុជា អនុញ្ញាតឲ្យនាវាទាំងនោះ ធ្វើប្រតិបត្តិការក្រោមទង់ជាតិកម្ពុជា រហូតដល់ចុងខែសីហា ឆ្នា២០១៦ ហើយនាវាទាំងឡាយណា ដែលប្រតិបត្តិការក្រោមទង់ជាតិកម្ពុជា ក្រោយថ្ងៃនេះ គឺខុសច្បាប់ និងអាចត្រូវដាក់ទោសដោយច្បាប់ និងបទបញ្ញត្តិអន្តរជាតិ។

ជាមួយគ្នានេះដែរ ក្រសួងការបរទេសកម្ពុជា ក៏បានជូនដំណឹងដល់សាធារណរដ្ឋកូរ៉េនៅភ្នំពេញ តាមរយៈកំណត់ទូត ថានាវាចំនួន៣គ្រឿងរបស់ក្រុមហ៊ុនកូរ៉េខាងជើងមួយបំពាក់ទង់ជាតិកម្ពុជា ត្រូវបាន ISROC លុបចេញពីបញ្ជី។

យ៉ាងណាក៏ដោយបើតាម The Washington Post ដដែល ក្រោយចំណាយពេលស៊ើបអង្កេត ប្រមាណ១ខែ រឿងគួរភ្ញាក់ផ្អើលនោះ គឺអ្នកដែលទិញកាំភ្លើងបាញ់រ៉ុកកែតទាំងនេះ គឺអេហ្ស៊ីបខ្លួនឯង៕