ជាតិ
មេធាវី ប្រើស្ទើរគ្រប់នីតិវិធីដើម្បីជួយឯ.ឧ កឹម សុខា ទោះបរាជ័យម្តងហើយម្តងទៀតក្តី ![](https://image.thmeythmey.com/pictures/2017/10/03/credit.jpg)
×![]()
ភ្នំពេញ៖ លទ្ធផលជោគជ័យ ឬបរាជ័យ មិនមែនជារឿង ដែលមេធាវី ការពារក្តីឲ្យឯកឧត្តម កឹម សុខា ត្រូវផ្តោតអារម្មណ៍នោះទេ។ អ្វីដែលក្រុមមេធាវី ត្រូវយកចិត្តទុកដាក់ គឺការប្រើសមត្ថភាពផ្នែកច្បាប់ ដើម្បីទប់ទល់ជាមួយតុលាការ ក្នុងការការពារឯកឧត្តម កឹម សុខា ដែលជាកូនក្តី។ ចំណែក អ្នកវិភាគ បានចាត់ទុកថាជារឿងនយោបាយ ដូច្នេះក្រុមមេធាវី ស្ទើរតែមិនមានផ្លូវ ដែលអាចទទួលបានជោគជ័យ ក្នុងសំណុំរឿង របស់ឯកឧត្តម កឹម សុខា។ ប៉ុន្តែ អ្នកនាំពាក្យបក្សកាន់អំណាច តបវិញថា ទោះបុគ្គលនោះ ជាអ្ននយោបាយ ឬមានឋានៈជាអ្វីដ៏ដោយ ឲ្យតែធ្វើខុសច្បាប់ តុលាការ នឹងចាត់វិធានការ។
ក្រុមមេធាវីទាំងប្រាំបីរូប ប្រឹងប្រែងយ៉ាងសស្រាក់សស្រាំ ដើម្បីជួយកូនក្តីរបស់ខ្លួន គឺឯកឧត្តម កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារត្រពាំងផ្លុង ក្រោមការចោទប្រកាន់របស់សមត្ថកិច្ចនិងតុលាការ ថាជាប់ពាក់ព័ន្ធនឹងអំពើក្បត់ជាតិ។ ឲ្យតែមើលឃើញច្រកណាមួយផ្នែកនីតិវិធី ដែលអាចនាំផលប្រយោជន៍ដល់ឯកឧត្តម កឹម សុខា ក្រុមមេធាវី នឹងចាប់ផ្តើមធ្វើភ្លាម។
រាប់តាំងពីតុលាការជាន់ទាប រហូតដល់តុលាការកំពូល សុទ្ធតែទទួលបានសំណើនិងសំណុំរឿង ពីក្រុមមេធាវីរបស់ឯកឧត្តម កឹម សុខា។ បំណងតែមួយគត់របស់ក្រុមមេធាវី ដែលបញ្ជូនសំណើទៅកាន់តុលាការគ្រប់លំដាប់ថ្នាក់ គឺដើម្បីឲ្យឯកឧត្តម កឹម សុខា បានចាកចេញពីពន្ធនាគារ ឬយ៉ាងហោចណាស់ ទទួលបានប្រយោជន៍ណាមួយក្នុងប្រព័ន្ធយុត្តិធម៌។
ពីមួយសប្តាហ៍ទៅមួយសប្តាហ៍ ក្រុមមេធាវី បានជួបគ្នាជាញឹកញាប់ ដើម្បីពិភាក្សាក្នុងការស្វែងរកមធ្យោបាយផ្លូវច្បាប់ ដែលអាចជួយឯកឧត្តម កឹម សុខា។ នេះជាការអះអាះរបស់លោក សំ សុគង់ មេធាវីមួយរូប ក្នុងចំណោមមេធាវីទាំងប្រាំបីរូប ដែលរួមគ្នាការពារក្តីឲ្យឯឧត្តម កឹម សុខា។
បើតាមលោក សំ សុគង់ ក្រុមមេធាវី បានធ្វើដំណើរពីរាជធានីភ្នំពេញ ទៅកាន់ពន្ធនាគារត្រពាំងផ្លុងក្នុងខេត្តត្បូងឃ្មុំ យ៉ាងតិចចំនួនបីដង ក្នុងមួយសប្តាហ៍ ដើម្បីពិភាក្សា ក៏ដូចជាផ្តល់យោបល់ផ្លូវច្បាប់ដល់ឯកឧត្តម កឹម សុខា។ លោក សំ សុគង់ សង្កត់ធ្ងន់ថា ពេលជួបគ្នា ក្រុមមេធាវី ក៏មានឱកាសបានជម្រាបពីស្ថានការណ៍បច្ចប្បន្ន ដល់ឯកឧត្តម កឹម សុខា ដែរ ជាពិសេសពាក់ព័ន្ធនឹងការវិវត្តនូវរឿងក្តី។
រីឯលោក ហែម សុជាតិ មេធាវីមួយរូបទៀត ដែលទទួលបានសិទ្ធិក្នុងការការពាររឿងក្តីរបស់ឯកឧត្តម កឹម សុខា ដែរនោះ ក៏មិនយល់ខុសពីលោក សំ សុគង់ ប៉ុន្មានដែរ។ សម្រាប់លោក ហែម សុជាតិ ក្រុមមេធាវី គ្មានអ្វីផ្សេងត្រូវពឹងផ្អែកនោះទេ ក្រៅតែពីការប្រើសមត្ថភាពតាមផ្លូវច្បាប់ ដើម្បីការពារសិទ្ធិឲ្យឯកឧត្តម កឹម សុខា។ លោកសង្កត់ធ្ងន់ថា ក្នុងការការពារក្តី ក្រុមមេធាវី មិនទាន់គិតដល់រឿងចាញ់-ឈ្នះ នោះទេ។
«ក្នុងនាមជាមេធាវី ត្រូវប្រឹងប្រែងធ្វើអ្វីតាមនីតិវិធី។ ទោះជារឿងនេះ មើលទៅ ដូចជាមានលក្ខណនយោបាយច្រើនក្តី តែយើង នៅតែតស៊ូតាមផ្លូវច្បាប់។ ឲ្យតែនីតិវិធី នៅមាន នៅបើកចំហ ដែលអាចឲ្យយើង អាចធ្វើបាន យើង នៅតែតស៊ូ។ យើង ខ្លាចតែនីតិវិធីអស់ ឬមិនអាចធ្វើបន្តទៀតបាន ទើបយើងឈប់»។ នេះគោលជំហររបស់ក្រុមមេធាវី ដែលលោក ហែម សុជាតិ បានលើកឡើង។
យ៉ាងណា ក្នុងសំណុំរឿងរបស់ឯកឧត្តម កឹម សុខា លោកមេធាវីរូបនេះ នៅតែសង្ឃឹមលើភាពល្អប្រសើរផ្នែកនយោបាយ ជាជាងការប្រើយន្តការច្បាប់។ លោក យល់ថា ប្រសិនបើកម្តៅនយោបាយ អាចថមថយ នោះការតស៊ូតាមផ្លូវច្បាប់ ក្នុងសំណុំរឿងរបស់ឯកឧត្តម កឹម សុខា អាចនឹងមានសង្ឃឹមច្រើន។
ការតស៊ូរបស់ក្រុមមេធាវី ដើម្បីស្វែងរកយុត្តិធម៌ជូនឯកឧត្តម កឹម សុខា អាចទទួលបានផលវិជ្ជមានតិចតួចបំផុត ចំពោះការមើលឃើញរបស់លោក មាស នី ដែលជាអ្នកវិភាគនយោបាយមួយរូបនៅកម្ពុជា។ រាប់ចាប់តាំងពីមន្ត្រី សកម្មជន អ្នកនយោបាយ តំណាងរាស្ត្រ រហូតដល់ឯកឧត្តម សម រង្ស៊ី អតីតប្រធានគណបក្សសង្គ្រោះជាតិ ដែលតែងតែបរាជ័យក្នុងការតស៊ូផ្លូវច្បាប់ ក្នុងប្រព័ន្ធតុលាការ បានក្លាយជាបទពិសោធសម្រាប់អ្នកវិភាគរូបនេះ ហើយបានសន្និដ្ឋានទុកជាមុនថា ករណីរបស់ឯកឧត្តម កឹម សុខា ក៏ទំនងជាមិនខុសពីគ្នាប៉ុន្មានដែរ។
អ្វីដែល ធ្វើឲ្យលោក មាស នី មើលឃើញថា យុត្តិធម៌ រឹតតែមិនងាយកើតឡើងនោះ គឺនៅត្រង់ថា បញ្ហារបស់ឯកឧត្តម កឹម សុខា ជារឿងនយោបាយ។ លោក សង្កត់ធ្ងន់ថា ឯកឧត្តម កឹម សុខា អាចនឹងទទួលបានយុត្តិធម៌ លុះត្រាតែតុលាការ ប្រើស្តង់ដាតែមួយ ក្នុងការកាត់ក្តី។
អ្នកវិភាគរូបនេះ បញ្ជាក់ដូច្នេះថា៖«បើមិនប្រើស្តង់ដាពីរ អាចនឹងទទួលបានយុត្តិធម៌។ តែពិបាក ត្រង់ច្បាប់យើង គឺអាស្រ័យលើអ្នកថា។ ដល់ពេលអ៊ីចឹង វា ចេះតែមានបញ្ហារហូត»។
«កុំយករឿងរបស់អ្នកនយោបាយ មកធ្វើជារឿងនយោបាយ។ អ្នកណាក៏ដោយ ទោះជារដ្ឋមន្ត្រីក្រសួងយុត្តិធម៌ ចៅក្រម ឬតុលាការ ក៏ស្ថិតក្រោមការអនុវត្តច្បាប់ដែរ ឲ្យតែធ្វើខុសច្បាប់។ ច្បាប់ គឺតែមួយ»។ នេះជាការឆ្លើយតបរបស់លោក សុខ ឥសាន អ្នកនាំពាក្យគណបក្សប្រជាជនកម្ពុជា ទៅកាន់អ្នកវិភាគនយោបាយ។
លោក សុន ឥសាន នៅតែនិយាយថា ឯកឧត្តម កឹម សុខា រួមទាំងអតីតមេដឹកនាំ និងអ្នកនយោបាយគណបក្សសង្គ្រោះជាតិ កាលពីកន្លងមក ពិតជាបានធ្វើខុសនឹងច្បាប់។ លោក ថ្លែងការពារសមត្ថកិច្ចនិងតុលាការថា ចំណាត់ការទាំងអស់ គឺធ្វើឡើងតាមច្បាប់។ លោក និយាយបែបនេះថា៖«គាត់ ជាអ្នកធ្វើខុសច្បាប់។ បើមិនខុស គេមិនចាប់ទេ។ គេ ធ្វើ គឺធ្វើតាមច្បាប់ មិនមែនធ្វើលេងៗទេ»។
ក្រោយឯកឧត្តម កឹម សុខា ត្រូវបានចាប់ខ្លួន ហើយបញ្ជូនទៅឃុំក្នុងពន្ធនាគារ ក្រុមមេធាវី ក៏ចាប់ផ្តើមសុំជំទាស់។ សំណើសុំជំទាស់របស់ក្រុមមេធាវី គឺធ្វើឡើងនៅឯសាលាឧទ្ធរណ៍។ ប៉ុន្តែ សាលាឧទ្ធរណ៍ បានច្រានចោលសំណើខាងលើ តាមរយៈការបើកសវនាការ កាលពីថ្ងៃទី២៦ ខែកញ្ញា ឆ្នាំ២0១៧ ដោយគ្មានវត្តមានរបស់ឯកឧត្តម កឹម សុខា ហើយក្រុមមេធាវី ក៏បានធ្វើពហិកា មិនចូលរួមដែរ។ ក្នុងន័យនេះ សាលាឧទ្ធរណ៍ យល់ថា ការចាប់និងការឃុំខ្លួនឯកឧត្តម កឹម សុខា ដែលសាលាដំបូងរាជធានីភ្នំពេញ បានសម្រេច គឺត្រឹមត្រូវតាមនីតីវិធី។ ដូច្នេះ សាលាឧទ្ធរណ៍ ក៏បន្តឲ្យឯកឧត្តម កឹម សុខា ជាប់ឃុំដដែល។
ការសម្រេចរបស់សាលាឧទ្ធរណ៍ គឺជារឿងអយុត្តិធម៌ សម្រាប់ឯកឧត្តម កឹម សុខា។ ក្រុមមេធាវីយល់ឃើញដូច្នេះ ហើយក៏បានដាក់បណ្តឹងសាទុក្ខទៅកាន់តុលាការកំពូល ដើម្បីបន្តសុំជំទាស់នឹងសាលាឧទ្ធរណ៍ ដែលយល់ស្របតាមសាលាដំបូង ក្នុងការឃុំខ្លួនឯកឧត្តម កឹម សុខា។ តុលាការកំពូល មិនទាន់បានផ្តល់ដំណឹងទៅកាន់ក្រុមមេធាវីវិញនោះទេ ថានឹងបើកសវនាការនៅពេលណា ចំពោះបណ្តឹងសាទុក្ខនេះ។
ក្រៅពីសុំជំទាស់នឹងការឃុំខ្លួន ក្រុមមេធាវី ក៏បានដាក់សំណើមួយទៀត ទៅកាន់ចៅក្រមស៊ើបសួរនៃសាលាដំបូង។ សំណើនោះ គឺដើម្បីសុំឲ្យលើកលែងការចោទប្រកាន់ ហើយដោះលែងឯកឧត្តម កឹម សុខា តែម្តង។ ប៉ុន្តែ រហូតមកដល់ពេលនេះ ចៅក្រមស៊ើបសួរ មិនទាន់ឆ្លើយតបទៅកាន់ក្រុមមេធាវីឡើយ។
ដោយសារតែការដាក់សំណើសុំឲ្យលើកលែងការចោទប្រកាន់ មានរយៈពេលយូរ តែចៅក្រមស៊ើបសួរនៅតែរក្សាភាពស្ងៀមស្ងាត់ ក្រុមមេធាវី គ្រោងប្តឹងទៅកាន់សាលាឧទ្ធរណ៍។ តាមនីតិវិធី ប្រសិនបើសាលាដំបូង មិនព្រមឆ្លើយតប ក្រុមមេធាវី អាចបន្តដាក់សំណើទៅកាន់សាលាឧទ្ធរណ៍ ដើម្បីសុំឲ្យសម្រេចជំនួស។
លើសពីនេះ ក្រុមមេធាវី ក៏មានគម្រោងដាក់សំណើមួយផ្សេងទៀត ទៅកាន់ព្រះរាជអាជ្ញានៃសាលាដំបូងផងដែរ។ នោះ គឺសំណើសុំឲ្យបញ្ជូនឯកឧត្តម កឹម សុខា ពីពន្ធនាគារត្រពាំងផ្លុង ក្នុងខេត្តត្បូងឃ្មុំ ទៅឃុំនៅពន្ធនាគាររាជភ្នំពេញ (PJ) វិញ។ ការធ្វើបែបនេះ អាចជួយសម្រួលដល់ក្រុមមេធាវី ងាយស្រួលក្នុងការទៅជួបឯកឧត្តម កឹម សុខា ដើម្បីពិភាក្សាផ្លូវច្បាប់ ហើយក៏អាចជួយសម្រួលដល់នីតិវិធីរបស់តុលាការផងដែរ។ នេះជាការយល់ឃើញរបស់ក្រុមមេធាវី។
ចំណែកឯ ក្រុមតំណាងរាស្ត្រគណបក្សសង្គ្រោះជាតិឯណោះវិញ ក៏នៅមិនស្ងៀមដែរ។ ពួកគេ នៅតែបន្តទាមទារឲ្យដោះលែងឯកឧត្តម កឹម សុខា ដោយឥតលក្ខខណ្ឌ។ ផ្ទាំងរូបឯកឧត្តម កឹម សុខា ត្រូវបានលើកឡើងនៅមុខទីស្នាក់ការគណបក្សសង្គ្រោះជាតិ នៅទូទាំងប្រទេស។ ពាក្យថា «ដោះលែងលោកប្រធានកឹម សុខា ដោយឥតលក្ខខណ្ឌ» ត្រូវបានសរសេរលើផ្ទាំងរូបទាំងនោះ។
ម្យ៉ាងទៀត ក្រុមតំណាងរាស្ត្រគណបក្សសង្គ្រោះជាតិ នៅតែបន្តនាំគា្នទៅកាន់ពន្ធនាគារត្រពាំងផ្លុងជារៀងរាល់ថ្ងៃចន្ទ ដើម្បីសុំចូលជួបឯកឧត្តម កឹម សុខា។ ប៉ុន្តែ សមត្ថកិច្ច នៅតែមិនអនុញ្ញាតឲ្យពួកគេ ចូលជួបឯកឧត្តម កឹម សុខា ដដែល។
រយៈពេលមួយខែ នៃការតស៊ូរបស់មេធាវី រួមទាំងក្រុមតំណាងរាស្ត្រ ដោយមានអ្នកគាំទ្រមួយចំនួន ចូលរួមផងនោះ នៅមិនទាន់ទទួលបានជោគជ័យអ្វីឡើយ។ ក្រោយជាប់ពន្ធនាគាររយៈពេលមួយខែ ឯកឧត្តម កឹម សុខា បានចេញសារលិខិត នៅថ្ងៃទី២ ខែតុលា ឆ្នាំ២0១៧។
ក្នុងសារលិខិតនោះ ឯកឧត្តម កឹម សុខា បានអះអាងថា ឯកឧត្តម ពុំបានធ្វើខុសច្បាប់ ដូចការចោទប្រកាន់របស់តុលាការនោះទេ។ ឯកឧត្តម កឹម សុខា បានហៅការចាប់ខ្លួនឯកឧត្តម ទាំងពាក់កណ្តាលអធ្រាត្រ ហើយនៅមានអភ័យឯកសិទ្ធិសភា ថាជាការរំលោភរដ្ឋធម្មនុញ្ញ យ៉ាងធ្ងន់ធ្ងរ។
ពីក្នុងពន្ធនាគារ ឯកឧត្តម កឹម សុខា នៅតែជំរុញទឹកចិត្តប្រជាពលរដ្ឋ ឲ្យតស៊ូស្វែងរកយុត្តិធម៌ សម្រាប់សង្គមទាំងមូល។ តាមរយៈសារលិខិត ឯកឧត្តម កឹម សុខា បានបង្ហាញជំហររបស់ខ្លួនយ៉ាងដូច្នេះថា៖«ទោះរូបកាយខ្ញុំ ត្រូវជាប់ឃុំ តែគ្មានរណាម្នាក់ អាចឃុំឧត្តមគតិខ្ញុំបានឡើយ»៕
© រក្សាសិទ្ធិដោយ thmeythmey.com