ជាតិ
សភាតំបន់អាស៊ី សម្រេចផ្តល់ជំនួយមនុស្សធម៌ដល់ប្រទេសស៊ីរី យេមែន និងមីយ៉ាន់ម៉ា ![](https://image.thmeythmey.com/pictures/2017/10/03/fronst.jpg)
×![]()
ភ្នំពេញ៖ ក្នុងកិច្ចពិភាក្សាកាលពីនៅថ្ងៃទី៣ ខែតុលានេះ សភាតំបន់អាស៊ី(APA) បានសម្រេចផ្តល់ជំនួយមនុស្សធម៌ដល់ប្រទេសចំនួន៣ ដែលកំពុងរងវិនាសកម្មនៃសង្គ្រាម។ ក្រៅពីនេះសភាតំបន់អាស៊ី មានលទ្ធផលលើសេចក្តីព្រាងសេចក្តីសម្រេចជាច្រើនផងដែរ។
សភាតំបន់អាស៊ី(Asian Parliamentary Assembly) ដែលមានសមាជិក៤២ប្រទេសក្នុងតំបន់អាស៊ី បានសម្រេចផ្តល់ជំនួយមនុស្សធម៌ដល់ប្រទេសចំនួន៣រួមមាន៖ ស៊ីរី យេមេន និងមីយ៉ាន់ម៉ា ដែល កំពុងរងនូវវិនាសកម្មដោយសង្គ្រាម។ ប៉ុន្តែមិនមានការបញ្ជាក់ពីទំហំជំនួយមនុស្សធម៌នេះនៅឡើយទេ។ ការសម្រេចនេះ គឺធ្វើឡើងក្នុងកិច្ចពិភាក្សាមួយនៅភ្នំពេញ ដែលមានប្រទេសសមាជិក២៦ប្រទេសក្នុងចំណោម៤២ប្រទេសចូលរួម នៅថ្ងៃទី៣ ខែតុលានេះ។
ក្រៅពីសម្រេចផ្តល់ជំនួយដល់ប្រទេសទាំង៣ខាងលើ សភាតំបន់អាស៊ី ដែលដឹកនាំកិច្ចប្រជុំដោយរដ្ឋសភាកម្ពុជា ទទួលបានលទ្ធផលផ្លែផ្កានូវសេចក្តីព្រាងសេចក្តីសម្រេចមួយចំនួនទៀត ដូចជា៖ សេចក្តីព្រាងសេចក្តីសម្រេចស្តីពី៖សភាតំបន់អាស៊ីគាំទ្រដោយឥតងាយរេដល់ប្រជាជនប៉ាឡេស្ទីន, សភា និងរដ្ឋាភិបាលរួមគ្នា ដើម្បីវិបុលភាពនៅអាស៊ី, សមាហរណកម្មថាមពលអាស៊ី, បញ្ហាបរិស្ថាន, អនាម័យ និងទឹកស្អាតនៅតំបន់អាស៊ី, ការប្រឹងប្រែងលើកំណើនសេដ្ឋកិច្ចនៅតំបន់អាស៊ី, វិធានការណ៍ក្នុងការលើកកម្ពស់វប្បធម៌ និងការពារបេតិកភណ្ឌវប្បធម៌នៅតំបន់អាស៊ី, សមាហរណកម្មអាស៊ីតាមរយៈព័ត៌មានវិទ្យា និងបច្ចេកវិទ្យាទូរគមនាគមន៍, ការប្រឆាំងអំពើពុករលួយ និងគ្រឿងញៀន និងកិច្ចសហប្រតិបត្តិការប្រយុទ្ធប្រឆាំងនឹងការជួញដូរវត្ថុបុរាណនៅអាស៊ីជាដើម។
![](https://image.thmeythmey.com/pictures/2017/10/03/thumb2/photo_2017-10-03_16-34-58.jpg)
ប្រទេសសមាជិកសភាតំបន់អាស៊ីទាំង២៦ក្នុងចំណោម៤២ប្រទេស ដែលបានដឹកនាំគណៈប្រតិភូមកចូលរួមប្រជុំពិភាក្សានៅរាជធានីភ្នំពេញ រួមមាន៖ ប្រទេសអាហ្គានីស្ថាន, ប៉ារ៉ែន, បង់ក្លាដេស, ប៊ូតាន, ចិន, ស៊ីព្រូស, ឥណ្ឌា, ឥណ្ឌូនេស៊ី, អ៊ីរ៉ង់,អ៊ីរ៉ាក់, ហ្សកដង់, គុយវ៉ែត,ឡាវ, ម៉ាឡេស៊ី, នេប៉ាល់, កូរ៉េខាងជើង, ប៉ាគីស្ថាន, ប៉ាឡេស្ទីន, រុស្ស៊ី, សោឌីអារ៉ាប់បី, ស៊ីរ៉ី, ថៃ, តួកគី, អារ៉ាប់រួម, វៀតណាម, និងកម្ពុជា។
សូមបញ្ជាក់ថា សភាតំបន់អាស៊ីដែលមានឈ្មោះពេញថា «Asian Parliamentary Assembly» បានបង្កើតនៅឆ្នាំ១៩៩៩ មានឈ្មោះដើមជា សមាគមសភាអាស៊ីដើម្បីសន្តិភាព ហៅកាត់ថា «AAPP»។ «AAPP» បានប្តូរមកជា «APA» នៅឆ្នាំ២០០៦ ហើយបច្ចុប្បន្ននេះ APA មានសមាជិក ៤២ប្រទេស៕
Tag:
APA
ស៊ីរី
យេម៉ែន
មីយ៉ាន់ម៉ា
© រក្សាសិទ្ធិដោយ thmeythmey.com