កីឡាជាតិ
ជាតិ
បឹងកេតបារម្ភបញ្ហារបួសកីឡាករសំខាន់ រីឯទ័ពបារម្ភលើកីឡាករបរទេសបឹងកេត ![](https://image.thmeythmey.com/pictures/2017/12/30/photo_2017-12-30_10-03-54.jpg)
×![]()
បញ្ហារបួសរបស់អ្នកចាំទី ស៊ូ យ៉ាទី និងខ្សែប្រយុទ្ធនីហ្សេរីយ៉ា Samuel Gbenga Ajayi ដែលជាកីឡាករសំខាន់បានក្លាយជាក្តីកង្វល់សម្រាប់បឹងកេតក្នុងការប្រជែងដណ្តើមជើងឯកក្របខណ្ឌលីគកំពូលជាមួយក្រសួងការពារជាតិ(ទ័ព)នាម៉ោង៦ល្ងាចថ្ងៃសៅរ៍ ទី៣០ ខែធ្នូ ឆ្នាំ២០១៧ នៅពហុកីឡដ្ឋានជាតិ។ ទោះបីគ្រូបង្វឹកក្រុមទ័ពអះអាងពីការត្រៀមខ្លួនបានល្អ និងមិនមានបញ្ហាក្នុងក្រុមក៏ដោយ តែលោកមិនហ៊ានមើលរំលងសមត្ថភាព និងកីឡាករបរទេសបឹងកេតនោះឡើយ។
វត្តមានរបស់អ្នកចាំទីដៃទី១ ស៊ូ យ៉ាទី និងខ្សែប្រយុទ្ធនីហ្សេរីយ៉ា Samuel Gbenga Ajayi ដែលកំពុងញាំញីដោយរបួសស្ថិតក្នុងភាពស្រពេចស្រពិលនៅឡើយ។ បញ្ហានេះ បានក្លាយជាក្តីកង្វល់សម្រាប់បឹងកេតក្នុងការតទល់ប្រជែងដណ្តើមជើងឯកពានរង្វាន់ក្របខណ្ឌមិត្តហ្វូនខេមបូឌានលីគឆ្នាំ២០១៧ ជាមួយក្រសួងការពារជាតិ។ ការប្រកួតវគ្គផ្តាច់ព្រ័ត្រនឹងប្រព្រឹត្តទៅនៅម៉ោង៦ល្ងានថ្ងៃសៅរ៍ ទី៣០ ខែធ្នូ ឆ្នាំ២០១៧ នាពហុកីឡដ្ឋានជាតិ។
«យើងមានកីឡាករសំខាន់ៗចំនួនពីររូបដែលយើងគិតថា គាត់មិនប្រាកដ១០០ភាគរយក្នុងការជួយក្រុមបឹងកេត គឺអ្នកចាំទី ស៊ូ យ៉ាទី និងខ្សែប្រយុទ្ធ Gbenga។ ពោលគឺពួកគាត់ស្ថិតក្នុង៥០លើ៥០ភាគរយដែលអាចបង្ហាញខ្លួនក្នុងជំនួបចុងក្រោយនេះ»។ នេះជាការបញ្ជាក់របស់លោក ហៅ សុជាតិ ហើយលោកបានបន្ថែមថា៖«វាជាបញ្ហាធំដែរសម្រាប់ការអវត្តមាន Gbenga ព្រោះវាធ្វើឲ្យតំបន់ប្រយុទ្ធយើងអាចធ្លាក់គុណភាព តែបើមានរូបគេវានឹងធ្វើឲ្យតំបន់ប្រយុទ្ធយើងកាន់តែមុតស្រួច និងគ្រោះថ្នាក់»។
បញ្ហារបួសកីឡាករសំខាន់ និងជ័យជម្នះពីរប្រកួតចុងក្រោយរបស់ក្រុមក្រសួងការពារជាតិធ្វើឲ្យលោក ហៅ សុជាតិ គ្រូបង្វឹកបឹងកេតហាក់មានក្តីសង្ឃឹមតិចក្នុងការរក្សាតំណែងជើងឯកនៅឆ្នាំនេះ។ គ្រូបង្វឹករូបនេះ បានចាត់ទុកកីឡាករកូរ៉េខាងជើងទាំង៣រូបរបស់ក្រុមទ័ពជាកីឡាករដែលអាចបង្កគ្រោះថ្នាក់ដល់ក្រុមបឹងកេត។
«ខ្ញុំមិនប្រាកដថាអាចរក្សាតំណែងជើងឯកបាននោះទេ ព្រោះបច្ចុប្បន្នកីឡាករសំខាន់របស់យើងពីររូបដូចជាអ្នកចាំទី ស៊ូ យ៉ាទី និង Gbenga កំពុងមានបញ្ហា។ ហើយបើក្រឡេកទៅមើលខាងទ័ព គឺគាត់រៀបចំបានល្អសម្រាប់ពីរប្រកួតចុងក្រោយនេះ តែបើសម្រាប់ខ្ញុំក្តីសង្ឃឹមនៅតែមាន។ ខ្ញុំគិតថាទ័ពជាក្រុមដែលកំពុងឡើងជើង ព្រោះពីរប្រកួតចុងក្រោយគេឈ្នះ តែយើងចាញ់ ដូច្នេះទ័ពគេអាចរៀបចំបានល្អជាងយើង»។ នេះជាការបញ្ជាក់របស់លោក ហៅ សុជាតិ។
ទន្ទឹមនឹងនេះគ្រូបង្វឹកក្រុមក្រសួងការពារជាតិ លោក ទេព ឡុងរចនា បានបញ្ជាក់ថា ក្រុមលោកពុំមានបញ្ហាកីឡាកររងរបួសនោះឡើយ ជាពិសេសគឺបានត្រៀមខ្លួនរួចជាស្រេចក្នុងការតទល់ជាមួយក្រុមបឹងកេតនៅល្ងាចនេះ។ តែយ៉ាងណាគ្រូបង្វឹករូបនេះ មិនបានមើលរំលងសមត្ថភាពក្រុមការពារតំណែងជើងឯកមួយនេះឡើយ ជាពិសេសកីឡាករបរទេសតែម្តង។
«សម្រាប់ក្រុមខ្ញុំមិនមានកីឡាកររងរបួសនោះទេ គឺនៅពេញជើងទាំងអស់។ ហើយខ្ញុំរំពឹងថាកូនក្រុមនឹងធ្វើបានល្អនៅថ្ងៃនេះ។ ទន្ទឹមនឹងនេះយើងក៏មានក្តីកង្វល់ផងដែរ ព្រោះកីឡាករស្បែកខ្មៅទាំងបី និងកីឡាករប្រេស៊ីលរបស់បឹងកេតគឺសម្រេចទីបានល្អ និងមានការសហការគ្នាបានល្អទៀតផង»។ នេះជាការបញ្ជាក់របស់លោក ទេព ឡុងរចនា។
ក្រុមជើងឯកពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ នឹងទទួលបានកៅអីឡើងទៅលេងវគ្គចែកពូល Group Stage នៃពានរង្វាន់ AFC Cup ប្រចាំឆ្នាំ២០១៨ ដោយស្វ័យប្រវត្តិទាំងមិនបាច់ឆ្លងវគ្គជម្រុះ Play off៕
Tag:
Cambodian League 2017
ហៅ សុជាតិ
ស៊ូ យ៉ាទី
© រក្សាសិទ្ធិដោយ thmeythmey.com