ជាតិ
អ្នកជំនាញ៖ សង្គមស៊ីវិលមានតួនាទីសំខាន់ក្នុងភាពជោគជ័យនៃកិច្ចសហប្រតិបត្តិការមេគង្គ-ឡានឆាង
× ភ្នំពេញ៖ អ្នកជំនាញមើលឃើញថា សង្គមស៊ីវិលគួរតែមានតួនាទីសំខាន់ក្នុងកិច្ចសហប្រតិបត្តិការអនុតំបន់ មេគង្គ-ឡានឆាង (Mekong-Lancang Cooperation) ដើម្បីធានាបាននូវភាពជោគជ័យនៃវេទិកាពហុភាគីនេះ។ ប្រទេសសមាជិកយន្តការកិច្ចសហប្រតិបត្តិការតំបន់នេះក៏ត្រូវពង្រឹងការសហការ និងការសម្របសម្រួលគ្នាឲ្យជិតស្និទ្ធក្រោមក្របខណ្ឌដែលមានស្រាប់ដើម្បីដោះស្រាយបញ្ហារួម និង ធ្វើយ៉ាងណាតម្កល់ប្រយោជន៍ប្រជាជនជាធំផងដែរ។
ក្នុងវេទិកាសាធារណៈស្តីពីកិច្ចសហប្រតិបត្តិការមេគង្គ-ឡានឆាង ដែលរៀបចំឡើងដោយវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ (CISS) នៅមជ្ឈមណ្ឌលកិច្ចសហប្រតិបត្តិការកម្ពុជាកូរ៉េ នៅថ្ងៃព្រហស្បតិ៍ទី ៤ ខែមករា អ្នកជំនាញកម្ពុជា និងចិនយល់ឃើញថា កិច្ចសហប្រតិបត្តិការតំបន់ដែលមានអាយុប្រហែលពីរឆ្នាំនេះនឹងនាំមកនូវផលប្រយោជន៍ច្រើនសម្រាប់ប្រទេសមេគង្គនៅពេលអនាគត។
ថ្លែងបើកវេទិកា លោកបណ្ឌិត សុក ស៊ីផាន់ណា ជាទីប្រឹក្សារាជដ្ឋាភិបាល បានរម្លឹកថា កិច្ចសហប្រតិបត្តិការមេគង្គ-ឡានឆាងត្រូវបានបង្កើតឡើងដោយហេតុផលនយោបាយ ប៉ុន្តែវាផ្តល់នឹងប្រយោជន៍ដល់ភាគីពាក់ព័ន្ធ។ អ្នកជំនាញរូបនេះកត់សម្គាល់ថា ការប្រតិបត្តិព្រះពុទ្ធសាសនាដែលជាចំណុចរួមនៃប្រទេសមេគង្គទាំងប្រាំមួយនេះក៏ជាផ្នែកមួយនៃការរៀបចំកិច្ចសហប្រតិបត្តិការរួមនេះដែរ។
លោកបណ្ឌិត សុក ស៊ីផាន់ណា បន្ថែមថា វាជារឿងចាំបាច់ដែលប្រទេសសមាជិកត្រូវធានាឲ្យបាននូវនិរន្តរភាពនៃកិច្ចសហប្រតិបត្តិការអនុតំបន់មួយនេះដើម្បីធ្វើឲ្យគោលដៅដែលបានកំណត់រួមគ្នានេះក្លាយជាការពិត និងធានាបានថា វាអាចផ្តល់ប្រយោជន៍ដល់ប្រជាជនពិតប្រាកដ។
ចំណែក លោកបណ្ឌិត Song Junying នាយករងនៃនាយកដ្ឋានសិក្សាអាស៊ីប៉ាស៊ីហ្វិកនៃវិទ្យាស្ថានចិនសម្រាប់ការសិក្សាអន្តរជាតិ បានថ្លែងថា កិច្ចសហប្រតិបត្តិការមេគង្គ-ឡានឆាងជាវេទិកាថ្នាក់តំបន់មួយដ៏សំខាន់សម្រាប់ប្រទេសជាប់ដងទន្លេមេគង្គដែលជួយដោះស្រាយបញ្ហារួមគ្នាទាំងនយោបាយ សេដ្ឋកិច្ច សន្តិសុខ និងបញ្ហាផ្សេងទៀត។
ពាក់ព័ន្ធនឹងគំនិតផ្តួចផ្តើមកិច្ចសហប្រតិបត្តិការអនុតំបន់នេះ លោកបណ្ឌិតបានផ្តល់អនុសាសន៍ផងដែរថា ដើម្បីឲ្យយន្តការនេះអភិវឌ្ឍរហ័ស វាចាំបាច់ត្រូវមានការសម្របសម្រួលគ្នាកាន់តែជិតស្និទ្ធ រវាងភាគីពាក់ព័ន្ធផ្តោតលើវិស័យអាទិភាពទាំងប្រាំដែលត្រូវបានកំណត់រួម និងការកសាងទំនុកចិត្តរវាងគ្នា ក៏ដូចជាជំនឿចិត្តលើគម្រោងដែលកំពុងធ្វើរួមគ្នានេះ។ អ្វីដែលសំខាន់នោះ លោកបណ្ឌិតជនជាតិចិននេះចង់ឃើញសង្គមស៊ីវិលមានតួនាទីកាន់តែសំខាន់ និងសកម្មក្នុងគំនិតផ្តួចផ្តើមមេគង្គឡានឆាងនេះផងថែមទៀតផង។
វិស័យអាទិភាពចំនួនប្រាំមានដូចជាការផ្សាភ្ជាប់, កិច្ចសហប្រតិបត្តិការជំរុញសមត្ថភាពផលិត, កិច្ចសហប្រតិបត្តិសេដ្ឋកិច្ចឆ្លងដែន, កិច្ចសហប្រតិបត្តិការនៃការគ្រប់គ្រងទឹក និងកសិកម្ម និងកិច្ចសហប្រតិបត្តិការក្នុងការកាត់បន្ថយភាពក្រីក្រ។
ចំណែកលោកបណ្ឌិត ឈាង វណ្ណារិទ្ធ អ្នកស្រាវជ្រាវនៅវិទ្យាស្ថាន ISEAS និងជាសហស្ថាបនិកវិទ្យាស្ថាន CISS ឯណោះវិញបានកោតសរសើរពីអភិវឌ្ឍនៃកិច្ចសហប្រតិបត្តិការមេគង្គ-ឡានឆាងនេះ ដោយលោកកត់សម្គាល់ថា វាប្រៀបដូចជាក្មេងតែលូតលាស់លឿន។ ក្នុងនាមជាអ្នកស្រាវជ្រាវតំបន់មួយរូប លោកក៏គាំទ្រការចូលរួមរបស់សង្គមស៊ីវិល ក្នុងកិច្ចសហប្រតិបត្តិការនេះផងដែរ ហើយប្រទេសសមាជិកក៏ត្រូវតម្កល់ប្រយោជន៍ប្រជាជនជាធំ។
លោកបានបញ្ជាក់ដូច្នេះ៖ «វាជាការអភិវឌ្ឍមួយយ៉ាងរហ័សគួរកោតសរសើរ។ សម្រាប់ប្រទេសជាសមាជិក ប្រយោជន៍ស្នូលគឺប្រយោជន៍សេដ្ឋកិច្ច។ ដូច្នេះហើយ វាជារឿងសំខាន់ដែលត្រូវមានការភ្ជាប់ទំនាក់ទំនងរវាងសង្គមស៊ីវិល ដើម្បីធានាបានថាប្រជាជនទាំងអាចទាញបានប្រយោជន៍ពីយន្តការនេះ»។
សូមបញ្ជាក់ថា កិច្ចសហប្រតិបត្តិការថ្នាក់អនុតំបន់ មេគង្គ-ឡានឆាង ត្រូវបានបង្កើតឡើងនៅក្នុងឆ្នាំ ២០១៥ ក្រោមគំនិតផ្តួចផ្តើមរបស់ចិន ហើយវេទិកានេះផ្តោតសំខាន់លើសរសរស្តម្ភបីក្នុងនោះមាននយោបាយ-សន្តិសុខ, សេដ្ឋកិច្ច និងការអភិវឌ្ឍ រួមជាមួយសង្គម និងទំនាក់ទំនងប្រជាជនទៅប្រជាជន។ កម្ពុជាក៏នឹងធ្វើជាម្ចាស់ផ្ទះនៃជំនួបកំពូលមេដឹកនាំនៃកិច្ចសហប្រតិបត្តិការមេគង្គ-ឡានឆាងលើកទីពីរនៅថ្ងៃ ១០ មករាខាងមុខដែរ ហើយគេរំពឹងថា ផែនការសកម្មភាពរយៈពេលប្រាំឆ្នាំស្តីពីគម្រោងអភិវឌ្ឍរួម និងសេចក្តីថ្លែងការណ៍រួមទីក្រុងភ្នំពេញនឹងត្រូវអនុម័តឡើងដែរ៕
Tag:
មេគង្គ-ឡានឆាង
សុក ស៊ីផាន់ណា
ឈាង វណ្ណារិទ្ធ
Song Junying
© រក្សាសិទ្ធិដោយ thmeythmey.com