ជាតិ
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន។ រូបថត AKP
×![]()
ភ្នំពេញ៖ ក្រសួងព័ត៌មាន គ្រោងប្រើប្រាស់បណ្ណថ្មីតាមបែបបច្ចេកវិទ្យាទំនើបសម្រាប់អ្នកសារព័ត៌មាន ដើម្បីងាយស្រួលគ្រប់គ្រង និងប្រមូលទិន្នន័យទាំងក្នុងក្របខណ្ឌរដ្ឋ និងអង្គភាពព័ត៌មានឯកជន។ នេះបើតាមទីភ្នាក់ងារសារព័ត៌មានជាតិកម្ពុជា។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន បានលើកឡើងថា ការប្រើប្រាស់បណ្ណព័ត៌មានគំរូថ្មីនេះ នឹងផ្ដល់ភាពងាយស្រួលដល់អ្នកសារព័ត៌មានក្នុងការចូលទៅយកព័ត៌មានក្នុងស្ថាប័ននានា។ លោក ផុស សុវណ្ណ បន្ថែមថា បណ្ណថ្មីនេះនឹងធានាសន្តិសុខកម្រិតខ្ពស់ និងអាចសម្គាល់អត្តសញ្ញាណរបស់អ្នកសារព័ត៌មាន មកពីអង្គភាពណាបានពិតប្រាកដ។
អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានរូបនេះ បញ្ជាក់ថាលក្ខណៈពិសេសរបស់បណ្ណថ្មីនេះ គឺមានChip ភ្ជាប់QR Code ដែលអាចឲ្យមន្ត្រីសមត្ថកិច្ចត្រួតពិនិត្យបានភ្លាមៗ ក្នុងករណីសង្ស័យថា មានអ្នកកាន់បណ្ណ ពិតប្រាកដ ឬក្លែងបន្លំ។
ជាមួយគ្នានេះ ក្រសួងព័ត៌មាន ចង់ឲ្យបណ្ណថ្មីបែបបច្ចេកវិទ្យានេះ អាចភ្ជាប់កិច្ចសហប្រតិបត្តិការជាមួយអង្គភាពផ្សេងៗដូចជា ហាងកាហ្វេ ឬភោជនីយដ្ឋាន ដែលអាចបញ្ចុះតម្លៃផ្សេងៗដល់អ្នកសារព័ត៌មាន។ លោក ផុស សុវណ្ណ បន្តថា ការប្រើប្រាស់បណ្ណថ្មីនេះ កាន់តែមានប្រយោជន៍ សម្រាប់កិច្ចសហប្រតិបត្តិការក្រៅប្រទេសដូចជា ប្រទេសឥណ្ឌា ចិន វៀតណាម និងប្រទេសមួយចំនួនទៀត ដែលក្រសួងព័ត៌មានធ្លាប់ចុះអនុស្សរណៈយោគយល់គ្នា។ នេះបើតាមទីភ្នាក់ងារសារព័ត៌មានជាតិកម្ពុជាដដែល៕
Tag:
អ្នកសារព័ត៌មាន
ផុស សុវណ្ណ
បណ្ណព័ត៌មាន
បច្ចេកវិទ្យាទំនើប
© រក្សាសិទ្ធិដោយ thmeythmey.com
