នាយករដ្ឋមន្ត្រីចិន នឹងសម្ពោធគម្រោង«ដំណើរនៃក្តីស្រលាញ់ពីបេះដូង»នៅកម្ពុជា

ជាតិ

នាយករដ្ឋមន្ត្រីចិន នឹងសម្ពោធគម្រោង«ដំណើរនៃក្តីស្រលាញ់ពីបេះដូង»នៅកម្ពុជា

08, Jan 2018 , 2:24 pm

រូបភាព

រូបថត AFP

ដោយ: ថ្មីៗ

ភ្នំពេញ៖ នាយករដ្ឋមន្ត្រីចិន លោក លី ខឹឈាំង នឹងបំពេញទស្សនកិច្ចផ្លូវការនៅកម្ពុជា នៅថ្ងៃទី១១ មករា បន្ទាប់ពីបញ្ចប់កិច្ចប្រជុំកំពូលលើកទី២ នៃកិច្ចសហប្រតិបត្តិការមេគង្គ-ឡានឆាង នៅថ្ងៃទី១០ មករា ឆ្នាំ២០១៨។

ក្នុងដំណើរទស្សនកិច្ចផ្លូវការនេះ នាយករដ្ឋមន្ត្រីចិន លោក លី ខឹឈាំង និងនាយករដ្ឋមន្ត្រី ហ៊ុន សែន នឹងចុះហត្ថលេខាមួយចំនួន ហើយក៏មានការប្រកាសជាផ្លូវការអំពីគម្រោង«ដំណើរនៃក្តីស្រលាញ់ពីបេះដូង» នៅកម្ពុជា ជំនួយឥតសំណងសម្រាប់គម្រោងសាងសង់មន្ទីរពេទ្យមិត្តភាពកម្ពុជា-ចិន ព្រះកុសុមៈ និងមន្ទីរពេទ្យខេត្តត្បូងឃ្មុំ និងគម្រោងប្លង់ស្ថាបត្យកម្ម អាកាសយានដ្ឋានអន្តរជាតិសៀមរាបអង្គរ។

នេះក៏ជាដំណើរទស្សនកិច្ចលើកទី១របស់លោក លី ខឹឈាំង មកកម្ពុជា ក្រោយលោកចូលកាន់តំណែងនាយករដ្ឋមន្ត្រីកាលពីឆ្នាំ ២០១៣ ។ លោក លី ខឹឈាំង គឺជាមន្ត្រីកំពូលទី២ របស់មហាយក្សចិន បន្ទាប់ពីលោក ស៊ី ជិនភីង។ ទស្សនកិច្ចផ្លូវការរបស់លោក លី ខឹឈាំង ប្រព្រឹត្តទៅក្នុងពេលចាប់ផ្ដើមខួបលើកទី៦០ នៃការបរង្កើតទំនាក់ទំនងការទូតនៃកម្ពុជា និងសាធារណៈរដ្ឋប្រជាមានិតចិន នឹងពង្រឹងនូវភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយនៃប្រទេសទាំងពីរ៕