ធាតុអាកាស នឹងចុះត្រជាក់ម្តងទៀត ខណៈជួរភ្នំដងរែកចុះដល់១៤អង្សាសេ

ជាតិ

ធាតុអាកាស នឹងចុះត្រជាក់ម្តងទៀត ខណៈជួរភ្នំដងរែកចុះដល់១៤អង្សាសេ

08, Jan 2018 , 4:03 pm

រូបភាព

ដោយ: ខន ចំប៉ា

កម្ពុជា នឹងទទួលរងអាកាសធាតុត្រជាក់ជាលើកទី៣ ចាប់ពីថ្ងៃទី១០ ខែមករានេះ ពិសេសពីថ្ងៃទី១២ដល់ថ្ងៃទី១៥ ខែមករា។ បើតាមក្រសួងធនធានទឹក និងឧតុនិយម សីតុណ្ហភាព នៅជួរភ្នំដងរែក នឹងធ្លាក់ចុះក្នុងរង្វង់១៤អង្សា ខណៈខេត្ត៦ទៀត ខេត្តមណ្ឌលគិរី រតនគិរី ស្ទឹងត្រែង ឧត្តរមានជ័យ ព្រះវិហារ និងខេត្តប៉ៃលិន សីតុណ្ហភាពអប្បបរមា នឹងធ្លាក់ដល់១៦អង្សា។

កម្ពុជា បាន និងកំពុងទទួលរងឥទ្ធិពលខ្យល់មូសុងឦសាន និងជ្រលងសម្ពាធខ្ពស់ខ្សោយពីប្រទេសចិន។ នេះបើតាមការតាមដានអាកាសធាតុរបស់ក្រសួងធនធានទឹក និងឧតុនិយម ចេញផ្សាយនៅថ្ងៃទី ៨ ខែមករា ដោយបានបន្តថា ឥទ្ធិពលនៃបាតុភូតទាំង២នេះ នឹងបង្កឲ្យកម្រិតសីតុណ្ហភាពអប្បបរមាធ្លាក់ចុះ ជាបន្តបន្ទាប់ ចាប់ពីថ្ងៃទី១០ ខែមករា(ពិសេសចាប់ពីថ្ងៃទី១២-១៥ ខែមករា) ប៉ុន្តែមិនត្រជាក់ខ្លាំង ដូចជាការចុះត្រជាក់លើកទី២ ទេ។

អត្ថបទទាក់ទង

ឆ្នាំនេះ មានអាកាសធាតុត្រជាក់ជាងគេក្នុងរយៈពេល១៥ឆ្នាំចុងក្រោយ

បើតាមការព្យាករ ចាប់ពីថ្ងៃទី១២-១៥ ខែមករា ជួរភ្នំដងរែក សីតុណ្ហភាពអប្បបរមា នឹងធ្លាក់ចុះក្នុងរង្វង់ ១៤ អង្សា ខណៈខេត្តមណ្ឌលគិរី រតនគិរី ស្ទឹងត្រែង ឧត្តរមានជ័យ ព្រះវិហារ និងខេត្តប៉ៃលិន សីតុណ្ហភាពអប្បបរមា នឹងធ្លាក់ចុះមកក្នុងរង្វង់ ១៦-១៨អង្សា។ ចំណែកបណ្តារាជធានី-ខេត្តដទៃទៀត សីតុណ្ហភាពអប្បបរមា នឹងធ្លាក់ចុះនៅក្នុងរង្វង់ពី១៩-២១អង្សា លើកលែងតែបណ្តាខេត្តជាប់សមុទ្រ ដែលសីតុណ្ហភាពអប្បបរមា នឹងស្ថិតក្នុងរង្វង់២៣-២៤អង្សា៕