ជាតិ
ខែធ្នូ មានមនុស្សស្លាប់ជាង៥០០នាក់ ដោយសារគ្រោះថ្នាក់ចរាចរណ៍ គ្រោះថ្នាក់សង្គម និងបទល្មើសផ្សេងៗ ![](https://image.thmeythmey.com/pictures/2018/01/08/police.jpg)
×![]()
ភ្នំពេញ៖ យ៉ាងហោចណាស់ មនុស្ស៥៣២នាក់ បានបាត់បង់ជីវិត ដោយសារតែបញ្ហា៣ប្រភេទ រួមមាន គ្រោះថ្នាក់ចរាចរណ៍ គ្រោះថ្នាក់សង្គម និងបទល្មើសនានា ដែលបានកើតឡើងក្នុងខែធ្នូ ឆ្នាំ២០១៧ កន្លងមក។
គ្រោះថ្នាក់ចរាចរណ៍ កើតឡើងចំនួន២៩៧លើក ដោយមានមនុស្សស្លាប់ចំនួន១៦៣នាក់ និងរបួស៤៣២នាក់ ដែលគ្រោះថ្នាក់ចរាចរណ៍ទាំងនេះ ភាគច្រើនបណ្តាលមកពីអ្នកបើកបរ មិនគោរពច្បាប់។ នេះបើតាមរបាយការណ៍ស្តីពីបញ្ហានិងគ្រោះថ្នាក់ផ្សេងៗ ដែលផ្សាយដោយអគ្គស្នងការនគរបាលជាតិ នៅថ្ងៃទី៨ ខែមករា។
ក្រៅពីគ្រោះថ្នាក់ចរាចរណ៍ ក៏មានគ្រោះថ្នាក់ និងបទល្មើសផ្សេងៗទៀតដែលបានបង្ហាញនៅក្នុងរបាយការណ៍ដដែលដែរ។
គ្រោះថ្នាក់សង្គម(សំដៅលើគ្រោះធម្មជាតិ និងសកម្មភាពផ្សេងៗរបស់មនុស្ស ជាដើម) បានកើតឡើងចំនួន៥៤៧លើក ដែលបង្កឲ្យបាត់បង់ជីវិតមនុស្ស៣៥0នាក់។
ដោយឡែកបទល្មើសព្រហ្មទណ្ឌ (បទឧក្រិដ្ឋ និងបទមជ្ឈិម) កើតឡើងចំនួន២៤៦លើក បានបណ្តាលឲ្យមនុស្សស្លាប់ចំនួន១៩នាក់ និងរបួស៥៥នាក់។ បទល្មើសទាំងនោះ មានដូចជា លួច ឆក់ រំលោភសេពសន្ថវៈ រំលោភសម្លាប់ ជះទឹកអាស៊ីត មនុស្សឃាតដោយអចេតនា ហិង្សាដោយចេតនា និងប្រើប្រាស់អាវុធខុសច្បាប់ ជាដើម។
ក្រៅពីនេះ នៅមានគ្រោះថ្នាក់ និងបញ្ហាផ្សេងៗទៀត ដែលបានកើតឡើង ដូចជា អគ្គិភ័យ គ្រឿងញៀន និងការជួញដូរមនុស្ស ជាដើម។ ប៉ុន្តែបញ្ហាទាំងនេះ មិនបណ្តាលឲ្យបាត់បង់ជីវិតមនុស្សឡើយ។ រីឯបញ្ហាអគ្គិភ័យកើតឡើង៤២លើក ដោយឆេះតូបចំនួន៥ខ្នង និងឆេះផ្ទះ៥0ខ្នង ហើយបណ្តាលឲ្យមនុស្ស៣នាក់ រងរបួស។
ចំណែកឯ គ្រឿងញៀន ត្រូវសមត្ថកិច្ចបង្ក្រាប បាន៦១៨ករណី និងឃាត់ជនល្មើស ១២១0នាក់ ហើយចាប់យកគ្រឿងញៀន ៤៨៩១គីឡូក្រាម។ សម្រាប់ បទល្មើសជួញដូរមនុស្សនិងអាជីវកម្មផ្លូវភេទ ត្រូវសមត្ថកិច្ច បង្ក្រាបបាន១0ករណី និងឃាត់ជនល្មើស១២នាក់ ហើយរំដោះជនរងគ្រោះ ៣៧នាក់៕
Tag:
មនុស្សស្លាប់
គ្រោះថ្នាក់ចរាចរណ៍
គ្រោះថ្នាក់សង្គម
© រក្សាសិទ្ធិដោយ thmeythmey.com