ជាតិ
សេដ្ឋកិច្ច
ចូលឆ្នាំចិន៖ ភ្ញៀវទេសចរទៅលេងខេត្តសៀមរាប ទំនងពិបាករកកន្លែងស្នាក់នៅ ![](https://image.thmeythmey.com/pictures/2018/02/03/photo_2017-06-07_14-26-25.jpg)
×![]()
សៀមរាប៖ ពិធីបុណ្យចូលឆ្នាំចិន គឺមានរយៈពេល៣ថ្ងៃ ចាប់ពីថ្ងៃទី១៦-១៨ ខែកុម្ភៈ ឆ្នាំ២០១៨។ នៅតាមសណ្ឋាគារ និងផ្ទះសំណាក់នានាក្នុងក្រុងសៀមរាប ត្រូវបានកក់ពេញស្ទើរគ្មានសល់។ នេះបើតាមការអះអាងរបស់អ្នកធ្វើការក្នុងវិស័យនេះ។
ប្រធានគ្រប់គ្រងទូទៅ នៅសណ្ឋាគារ សុខា សៀមរាប លោក ហង្ស វណ្ណៈ បានឱ្យដឹងថា បន្ទប់ស្នាក់នៅក្នុងសណ្ឋាគារលោក ត្រូវបានក្រុមហ៊ុន និងទីភ្នាក់ងារទេសចរណ៍ កក់ពេញអស់ហើយ ក្នុងអំឡុងមុន និងចូលឆ្នាំចិននេះ។ លោកបន្ថែមថា សណ្ឋាគារ សុខ សៀមរាប បានបើកឱ្យកក់ក្នុងរយៈពេលមុន ចាប់ពី២ខែ ហើយខ្លះទៀត បានកក់មុន៣ខែក៏មាន។
សណ្ឋាគារ សុខា សៀមរាប ស្ថិតក្នុងលំដាប់ផ្កាយប្រាំ និងមាន ៧៧៦ បន្ទប់ និងសុខា ផាលេស លំដាប់ផ្កាយបួន មាន ៤៦៦បន្ទប់។ តាមការបញ្ជាក់របស់លោក ហង្ស វណ្ណៈ បន្ទប់ជាងមួយពាន់របស់សណ្ឋាគារ សុខា ស្ថិតនៅតំបន់ផ្លូវ៦០ម៉ែត្រ គឺពេញទាំងអស់ គិតមកដល់ថ្ងៃទី១ កុម្ភៈ។ លោកបន្ថែមថា ភ្ញៀវសណ្ឋាគារលោកមានចម្រុះ មានចិន ជប៉ុន និងខ្មែរ តែភាគរយខ្ពស់ គឺភ្ញៀវចិន។ ប៉ុន្តែតាមការលើកឡើងរបស់ប្រធានគ្រប់គ្រងទូទៅ ទីផ្សារសំខាន់របស់សណ្ឋាគារ គឺភ្ញៀវមកចូលរួមការប្រជុំ ដោយសារសណ្ឋាគារនេះមានសាលប្រជុំដ៏ធំ និងអាចផ្ទុកមនុស្សបានចំនួន ៣៦០០ នាក់។ តាមការលើកឡើងរបស់លោក វណ្ណៈ ទីផ្សារសាលប្រជុំ ក្នុងមួយខែៗ សណ្ឋាគារ សុខា ទទួលរៀបចំពី១៥ ទៅ២០កម្មវិធី ទាំងតូច និងធំ និងទាំងថ្នាក់ជាតិ និងអន្តរជាតិ។
ងាកទៅមើលសណ្ឋាគារ ហ៊ីលឡក់ (Hillocks Hotel & Spa) នោះវិញ ជំនួយការប្រធានផ្នែកលក់ និងទីផ្សារ កញ្ញា តែ គីមលៀង បានឱ្យដឹងថា បន្ទប់សណ្ឋាគារចំនួន ៣៨បន្ទប់របស់ខ្លួន ក៏ត្រូវបានគេកក់អស់ហើយដែរ។ តម្លៃលក់សម្រាប់សណ្ឋាគារដែលសម្បូរភ្ញៀវអឺរ៉ុបក្នុងឱកាសបុណ្យចូលឆ្នាំចិននេះ គឺចាប់ពីជាង ៩០ដុល្លារឡើងទៅ។
ចំណែកសណ្ឋាគារ បុរីអង្គរ វិញ អ្នកគ្រប់គ្រងទូទៅ លោក ចាន់ សុភា ថ្លែងថា ចន្លោះពីថ្ងៃទី១៦ ដល់ទី ២០ ខែកុម្ភៈ គឺទទួលបានកក់ពេញទាំងអស់។ លោកបន្ថែមថា ទីផ្សារនៅឆ្នាំនេះ ហាក់ល្អប្រសើរជាងមុនៗ៕
© រក្សាសិទ្ធិដោយ thmeythmey.com