អន្តរជាតិ
មហាយក្សចិនបង្កើនថវិកាការពារជាតិ ដើម្បីពង្រឹងអំណាចយោធា ![](https://image.thmeythmey.com/pictures/2018/03/05/china.jpg)
×![]()
រដ្ឋាភិបាលចិន នឹងបង្កើនការចំណាយលើវិស័យការពារជាតិ ឲ្យបាន៨,១ភាគរយ នៃការចំណាយសរុបសម្រាប់ឆ្នាំ២០១៨ ។ នៅឆ្នាំ២០១៧ ចិនបានចំណាយ ៧ភាគរយនៃថវិកាទាំងអស់ លើវិស័យការពារជាតិរបស់ខ្លួន។ ការបង្កើនទឹកប្រាក់សម្រាប់យោធា នឹងជួយជំរុញការកែទម្រង់កងទ័ពរបស់លោកប្រធានាធិបតី ស៊ី ជិនភីង ទោះជាមានទំហំតូចនៅឡើយ បើប្រៀបធៀបនឹងការចំណាយលើវិស័យផ្សេងទៀត ឬក៏ការចំណាយលើយោធារបស់អាមេរិកក្ដី។
សភាប្រជាជនចិន នីតិកាលទី១៣ បានចាប់ផ្ដើមសម័យប្រជុំលើកដំបូងរបស់ខ្លួននៅព្រឹកថ្ងៃទី៥ ខែមីនា នៅក្នុងរដ្ឋធានីប៉េកាំង។ នាយករដ្ឋមន្ត្រីចិន លី ខឹឈាំង បានថ្លែងរាយការណ៍ ពីគោលយោបាយសំខាន់សម្រាប់រយៈពេលខាងមុខ និងរៀបរាប់ពីការចំណាយថវិកាជាតិសម្រាប់ឆ្នាំ២០១៨ ។ ក្នុងនោះ រដ្ឋាភិបាលចិន បានសម្រេចចិត្តបង្កើនថវិកាសម្រាប់វិស័យយោធា ដើម្បីពង្រឹងសមត្ថភាពការពារជាតិរបស់ខ្លួន។
ទីភ្នាក់ងារព័ត៌មានរដ្ឋចិន Xinhua ផ្សាយថា ថវិកាសម្រាប់វិស័យការពារជាតិក្នុងឆ្នាំ២០១៨ នឹងត្រូវបង្កើនដល់១៧៥ពាន់លានដុល្លារ ស្មើនឹង៨,១ភាគរយនៃការចំណាយសរុប។ ប្រៀបធៀបឆ្នាំ២០១៧ ចិនចំណាយលើវិស័យនេះចំនួន១៦៤ពាន់លានដុល្លារ ស្មើនឹង៧ភាគរយនៃថវិកាជាតិប៉ុណ្ណោះ។ គិតចាប់តាំងពីឆ្នាំ២០១៣ មក នេះជាឆ្នាំទី៣ ហើយដែលការចំណាយលើផ្នែកយោធារបស់ចិនមានតួលេខមួយខ្ទង់។
លោក Zhang Yesui អ្នកនាំពាក្យកិច្ចប្រជុំសភាចិន បាននិយាយនៅថ្ងៃទី៤ ខែមីនា ថា ការចំណាយលើវិស័យការពារមានទំហំតូច ក្នុងផលិតផលជាតិសរុប (GDP) ក៏ដូចជាការចំណាយសរុបរបស់ប្រទេសធំៗផ្សេងទៀតដែរ។ ក្នុងឆ្នាំ២០១៧ ចិនជាប្រទេសចាយលើកងទ័ពធំលំដាប់ទីពីរ បន្ទាប់ពីអាមេរិក។ ប៉ុន្តែបើមើលពីទំហំវិញ ការចំណាយរបស់ចិន តិចជាងការចំណាយរបស់អាមេរិក ដល់ទៅ បួនដងឯណោះ។ អាមេរិកចំណាយដល់ទៅជា៦០០ពាន់លានដុល្លារក្នុងឆ្នាំ២០១៧ ។
តាមពិតទៅ ការចំណាយផ្នែកវិស័យការពារជាតិរបស់ចិន ត្រូវបានពិចារណាល្អិតល្អន់ ជាមួយកំណើនសេដ្ឋកិច្ចជាតិ។ កំណើនសេដ្ឋកិច្ចនៅរយៈពេលប៉ុន្មានឆ្នាំមកនេះ បានជួយឲ្យរដ្ឋាភិបាលក្រុងប៉េកាំង មានលទ្ធភាពចាយលុយច្រើន ដើម្បីពង្រឹងសមត្ថភាពយោធារបស់ខ្លួន។ ជាមួយនឹងការបង្កើនទឹកប្រាក់សម្រាប់យោធា ក្រុងប៉េកាំងបានកំណត់គោលដៅសម្រាប់កំណើនសេដ្ឋកិច្ចឆ្នាំ២០១៨ នៅអត្រា៦,៥ភាគរយ ខណៈឆ្នាំ២០១៧ មាន៦,៩ភាគរយ។
ជុំវិញការបង្កើនទឹកប្រាក់វិស័យយោធានេះ អ្នកនាំពាក្យខាងលើបញ្ជាក់ថា ថវិកាភាគច្រើន នឹងបំពេញការខ្វះខាតរបស់យោធាដែលមានក្នុងឆ្នាំកន្លងទៅ។ លោកបន្តថា សម្ភារយោធានឹងត្រូវបានកែប្រែថ្មី ហើយការរស់នៅរបស់កងទ័ពគ្រប់ប្រភេទ ក៏ដូចជាលក្ខខណ្ឌរស់នៅ និងហ្វឹកហាត់របស់កងទ័ពនៅមូលដ្ឋាន ក៏នឹងត្រូវបានពង្រឹងដែរ៕
Tag:
ចិន
វិស័យការពារជាតិ
លី ខឹឈាំង
© រក្សាសិទ្ធិដោយ thmeythmey.com