អន្តរជាតិ
សមាជិកសភាសិង្ហបុរី៖«៥០ឆ្នាំមុនភាសាអង់គ្លេស ឥឡូវរៀនភាសាចិនជាយុទ្ធសាស្ត្រថ្មីសម្រាប់សិង្ហបុរី» ![រូបភាព Channel News Asia](https://image.thmeythmey.com/pictures/2018/03/05/as.jpg)
រូបភាព Channel News Asia
×![]()
ថ្លែងក្នុងសភានាថ្ងៃសៅរ៍ទី ៣ មីនា សមាជិកសភាសិង្ហបុរីលោក Low Thia Khiang បានផ្តល់យោបល់ថា ការផ្លាស់ប្តូរនៃទម្ងន់សេដ្ឋកិច្ចសាកល ក៏ដូចជាបដិវត្តន៍ឧស្សាហកម្មលើកទីបួនជាបញ្ហាប្រឈមថ្មីសម្រាប់សិង្ហបុរីដែលជាបុរីរដ្ឋតូចមួយនោះ។ លោកជឿជាក់ ការសិក្សាភាសាចិនជារឿងចាំបាច់សម្រាប់ប្រជាជនសិង្ហបុរី ដូចភាសាអង់គ្លេសដែលសិង្ហបុរីប្រើប្រាស់ក្នុងរយៈពេល ៥០ឆ្នាំមកនេះដែរ។
លោក Low Thia Khiang ជាសមាជិកសភាបក្សពលករជាបក្សប្រឆាំងសិង្ហបុរី ផ្តល់សុន្ទរកថា ពាក់ព័ន្ធគោលនយោបាយការបរទេសរបស់សិង្ហបុរី និងបញ្ហាប្រឈមស្របពេលដែលពិភពលោកពោរពេញដោយភាពមិនច្បាស់លាស់។
អ្វីដែលគួរឲ្យកត់សម្គាល់នោះ លោក បានបង្ហាញការគាំទ្រចំពោះការសិក្សាភាសាចិនជាយុទ្ធសាស្ត្ររបស់សិង្ហបុរី ស្របពេលដែលពិភពលោកស្គាល់បដិវត្តន៍ឧស្សាហកម្មទីបួន ហើយទម្ងន់សេដ្ឋកិច្ចពិភពលោកងាកមករកតំបន់អាស៊ីពេលដែលមហាយក្សចិនរះត្រដែតក្លាយជាមហាអំណាចសេដ្ឋកិច្ចលេខមួយនៅប៉ុន្មានឆ្នាំខាងមុខនោះ។
លោក Thia Khiang បានកត់សម្គាល់ថា សមត្ថភាពរបស់ប្រជាជនសិង្ហបុរីក្នុងការនិយាយភាសាអង់គ្លេសក្នុងរយៈពេល ៥០ ឆ្នាំកន្លងមកបានរួមចំណែកយ៉ាងសំខាន់ក្នុងការពង្រឹងទំនាក់ទំនងរវាងសិង្ហបុរីជាមួយលោកខាងលិច និងទាញប្រយោជន៍បានច្រើនផង។ ប៉ុន្តែបច្ចុប្បន្ន បញ្ហាប្រឈមថ្មីកើតឡើង ហើយចរន្តសេដ្ឋកិច្ច និងតុល្យភាពអំណាចក៏ប្រែប្រួលនៅលើពិភពលោកនេះ។
ថ្លែងទៅកាន់សភាក្នុងពេលជជែកដេញដោលរឿងថវិកាជាតិឆ្នាំ ២០១៨ លោក Thia Khiang បានអះអាងដូច្នេះ៖ «វាមានទំនាក់ទំនងពិសេសរវាងជនជាតិសិង្ហបុរីមានដើមកំណើតចិន និងជនជាតិចិននៅប្រទេសចិន ដោយពួកគេមានបុព្វបុរស និងភាសាដូចគ្នា។ ប៉ុន្តែយើងមើលឃើញថា ទំនាក់ទំនងនេះប្រែប្រួលដោយសារចិនអភិវឌ្ឍរហ័សខ្លាំង»។
«ខ្ញុំឯកភាពជាមួយលោក Lee Yi Shyan ដែលជាសមាជិកគណបក្សសកម្មភាពប្រជាជនដែលលើកឡើងថា ការសិក្សាភាសាចិន (Mandarin) គួរជាផ្នែកមួយនៃគោលនយោបាយរួមរបស់យើងក្នុងការធានាពីតួនាទីចម្បងរបស់សិង្ហបុរី ហើយវាក៏ជួយឲ្យយើងភ្ជាប់ទំនាក់ទំនងជាមួយប្រជាជនចិន ១,៣ពាន់លាននាក់ដែរ»។
បន្ទាប់ពីលោក Thia Khiang ថ្លែងសុន្ទរកថារួច នាយករដ្ឋមន្ត្រីសិង្ហបុរីលោក លី សៀនឡុង បានចេញមុខសរសើរអ្នកនយោបាយបក្សប្រឆាំងនេះផងដែរ។ លោក លី មានប្រសាសន៍ថា សមាជិកសភាបក្សប្រឆាំងបានផ្តល់សុន្ទរកថាដែលល្អប្រសើរ និងមានន័យ ដោយលោកសំដៅលើសុន្ទរកថារបស់លោក Low Thia Kiang។ លោកបន្ថែមថា សុន្ទរកថានោះបានបង្ហាញឲ្យឃើញពីការផ្លាស់ប្តូរនៃទិដ្ឋយុទ្ធសាស្ត្រតំបន់ និងចោទសួរពីបញ្ហាប្រឈមចំពោះបញ្ហាកិច្ចការបរទេសរបស់សិង្ហបុរីផង៕
Tag:
ចិន
សិង្ហបុរី
Low Thia Khiang
© រក្សាសិទ្ធិដោយ thmeythmey.com