អន្តរជាតិ
លោក Geng Shuang អ្នកនាំពាក្យក្រសួងការបរទេសចិន (រូបភាព៖ CGTN)
×![]()
ដោយ: តន ចាន់រិទ្ធារ៉ា
រដ្ឋាភិបាលចិនបានទាត់ចោលការលើកឡើងថា ខ្លួនស្នើឲ្យប្រទេសដែលខ្ចីលុយយកធនធានរ៉ែដើម្បីប្ដូរយកប្រាក់កម្ចីរបស់ចិន។ ការបដិសេធនេះធ្វើឡើង ជាការឆ្លើយទៅនឹងការលើកឡើងរបស់សាស្ត្រាចារ្យជនជាតិចិនម្នាក់ក្នុងកិច្ចសម្ភាសជាមួយសារព័ត៌មាន Global Times ដែលថា ចិនសំឡឹងឃើញធនធានរ៉ែរបស់ហ្វីលីពីន ពេលដែលឲ្យហ្វីលីពីនខ្ចីលុយដើម្បីអភិវឌ្ឍប្រទេស។ ក្រោមរដ្ឋបាលលោក ប្រធានាធិបតី រ៉ូឌ្រីហ្គោ ឌូទើតេ ចិនបានផ្ដល់ហិរញ្ញវត្ថុជាច្រើនទៅឲ្យហ្វីលីពីន។
នៅក្នុងកិច្ចសម្ភាសជាមួយសារព័ត៌មាន Global Times នាពេលថ្មីៗនេះ សាស្ត្រាចារ្យ Zhuang Guotu មកពីសាកលវីទ្យាល័យ Xiamen និយាយថា ធនធានរ៉ែ ជាផ្នែកមួយនៃកិច្ចព្រមព្រៀងសងបំណុលរវាងចិន និងប្រទេសដែលខ្ចីប្រាក់របស់ចិន។ លោកបានលើកយកករណីផ្ដល់កម្ចីទៅហ្វីលីពីនពីសំណាក់ចិន ដែលតែងតែមានភ្ជាប់កិច្ចព្រមព្រៀងសងលុយវិញ ហើយចិនចង់បានធនធានរ៉ែរបស់ហ្វីលីពីនធ្វើជាថ្នូរ។
ក្នុងសន្និសីទសារព័ត៌មាននៅថ្ងៃទី៩ ខែមីនា លោក Geng Shuang អ្នកនាំពាក្យក្រសួងការបរទេសចិន បានបដិសេធការលើកឡើងរបស់លោក Zhuang Guotu និងហៅការលើកឡើងរបស់សាស្ត្រាចារ្យរូបនេះ មិនមែនជាជំហររបស់រដ្ឋាភិបាលចិនឡើយ។ បើតាមអ្នកនាំពាក្យរូបនេះ ជាផ្នែកមួយនៃកិច្ចព្រមព្រៀង ចិនពិតជាតម្រូវប្រទេសដែលខ្ចីប្រាក់របស់ខ្លួនឲ្យប្រើប្រាស់ឥណទានជាក់លាក់ណាមួយដើម្បីសងទឹកប្រាក់ដែលជំពាក់។
«ចិនមិនដែល និងមិនស្នើប្រទេសពាក់ព័ន្ធប្រើប្រាស់ធនធានធម្មជាតិរបស់ខ្លួនជាថ្នូរក្នុងកិច្ចព្រមព្រៀងខ្ចីលុយឡើយ។ ការផ្ដល់ជំនួយ និងការគាំទ្ររបស់ចិនទៅឲ្យហ្វីលីពីន ក៏គ្មានលក្ខខណ្ឌភ្ជាប់ដែរ»។ នេះជាប្រកាសរបស់លោក Geng Shuang ដែលបានបន្តថា ការសងបំណុល គឺជាការអនុវត្តនៅជុំវិញពិភពលោក។
ជាមួយគ្នានោះ អ្នកនាំពាក្យដដែលនេះ ក៏បានអះអាងដែរថា ចិនមិនយករឿងសមុទ្រចិនខាងត្បូងទៅភ្ជាប់ជាមួយទំនាក់ទំនងសេដ្ឋកិច្ច និងគម្រោងអភិវឌ្ឃន៍ឡើយ។ ការដោះស្រាយបញ្ហាសមុទ្រចិនខាងត្បូង គឺធ្វើឡើងឈរលើគោលការណ៍រក្សាទំនាក់ទំនងចិន និងហ្វីលីពីនឲ្យបានល្អប្រសើរ។ ជាមួយគ្នានេះ ចិនត្រៀមខ្លួនរួចរាល់ដើម្បីធ្វើការជាមួយហ្វីលីពីនដើម្បីដោះស្រាយការខ្វែងគំនិតតាមរយៈការជជែក និងការប្រឹក្សាយោបល់ទៅមក។
ក្នុងសន្និសីទព័ត៌មានដដែល លោក Geng Shuang បញ្ជាក់ថា ទំនាក់ទំនងរវាងចិន និងហ្វីលីពីន បានផ្លាស់ប្ដូរមុខមាត់នៅឆ្នាំ២០១៦ ហើយចិនបានជួយយ៉ាងសកម្ម ក្នុងការពង្រីកសេដ្ឋកិច្ច និងការរស់នៅរបស់ប្រជាជនហ្វីលីពីន។ ពោល គឺក្រោយការឡើងកាន់តំណែងប្រធានាធិបតីរបស់លោក រ៉ូឌ្រីហ្គោ ឌូទើតេ ដែលទំនាក់ទំនងក្រុងម៉ានីល និងក្រុងប៉េកាំងល្អខ្លាំង ទោះជាមានជម្លោះនៅសមុទ្រចិនខាងត្បូងយ៉ាងណាក្ដី៕
Tag:
ចិន
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com
