អន្តរជាតិ
ជប៉ុនបន្ថែមចំនួនប្រឹក្សាយោធានៅម៉ាឡេស៊ី និងវៀតណាមដើម្បីពង្រឹងសមត្ថភាពទប់ទល់ចិន ![](https://image.thmeythmey.com/pictures/2018/03/14/jpn04_1212__c904154_131212_409.jpg)
×![]()
រដ្ឋាភិបាលជប៉ុនចាប់ផ្តើមបង្កើតវត្តមានយោធា និងការទូតខ្លួនប្រចាំតំបន់អាស៊ីអាគ្នេយ៍ ដោយបង្កើនចំនួនទីប្រឹក្សាយោធាដែលប្រចាំការនៅស្ថានទូតខ្លួនប្រចាំប្រទេសម៉ាឡេស៊ី និងវៀតណាមដែលជារដ្ឋភាគីនៃជម្លោះសមុទ្រចិនខាងត្បូង។ គោលនយោបាយថ្មីរបស់ជប៉ុននេះ ទំនងជាដើម្បីទប់ទល់សកម្មភាពបន្តបង្ករឿង និងការបង្កើនឥទ្ធិពលរបស់មហាយក្សចិនក្នុងតំបន់។
អ្នកនាំពាក្យក្រសួងការបរទេសជប៉ុនបានទទួលស្គាល់ថា ជប៉ុនសម្រេចបង្កើនចំនួនអនុព័ន្ធយោធារបស់ស្ថានទូតខ្លួនប្រចាំនៅម៉ាឡេស៊ី និង វៀតណាម។ ប៉ុន្តែអ្នកនាំពាក្យនោះមិនបានបកស្រាយឡើយពីមូលហេតុដែលជប៉ុនសម្រេចបង្កើនចំនួនមន្ត្រីយោធានៅតាមស្ថានទូតខ្លួននៅប្រទេសអាស៊ានទាំងនេះឡើយ។
សារព័ត៌មាន South China Morning Post ក្រសួងការបរទេសជប៉ុនបានអះអាងថាអនុព័ន្ធយោធាអចិន្ត្រៃយ៍ថ្មីនេះមិនមាន ទំនួលខុសត្រូវ ចំពោះការធានាសន្តិសុខនៅតាមស្ថានទូតជប៉ុននៅអាស៊ានឡើយ។ ប៉ុន្តែប្រព័ន្ធផ្សព្វផ្សាយជប៉ុនផ្សាយថា អនុព័ន្ធយោធាថ្មីនេះនឹងមានតួនាទីជំរុញការផ្លាស់ប្តូរបទពិសោធន៍ ប្រមូល និងវិភាគទិន្នន័យចារកម្ម និងលើកកម្ពស់កិច្ចសហប្រតិបត្តិការយោធារវាងជប៉ុននិងប្រទេសក្នុងតំបន់ផងដែរ។
ក្នុងសៀវភៅស ស្តីពីសន្តិសុខ និងការពារជាតិរបស់ជប៉ុនដែលទើបចេញផ្សាយកាលពីថ្មីៗនេះ ជប៉ុនបានប្តេជ្ញាពង្រឹងសមត្ថភាពចារកម្ម ដើម្បីធានាថា ក្រសួងការពារជាតិជប៉ុនមានលទ្ធភាពទប់ស្កាត់ ឬអាចចាប់បានសញ្ញាគ្រោះថ្នាក់នានាសម្រាប់សន្តិសុខជប៉ុនបានរហ័ស។ ដូច្នេះហើយ ការបង្កើនចំនួនអនុព័ន្ធយោធានៅម៉ាឡេស៊ី និងវៀតណាម ទំនងជាផ្នែមួយនៃការពង្រឹងសមត្ថភាពយោធានេះ។
ប៉ុន្តែទោះជាបែបណាក៏ដោយ វៀតណាម និងម៉ាឡេស៊ីសុទ្ធតែជាភាគីជម្លោះសមុទ្រចិនខាងត្បូងជាមួយមហាយក្សចិន។ ការបង្កើនចំនួនមន្ត្រីអនុព័ន្ធយោធានេះ ទំនងជាផ្នែកមួយនៃការបង្កើនសមត្ថភាពរបស់ជប៉ុន ប្រឆាំងឥទ្ធិពលរបស់ចិននៅក្នុងតំបន់ និងទប់ទល់ជាមួយចិនដែលកំពុងបន្តវាតទីនៅក្នុងសមុទ្រចិនខាងត្បូងនោះ។ ជប៉ុន ក៏ដូចជាបណ្តាប្រទេសជាភាគីជម្លោះសមុទ្រចិនខាងត្បូងនៅអាស៊ានដែរ ជាពិសេសវៀតណាម ព្រួយបារម្ភខ្លាំងពីសកម្មភាពរបស់ចិន និងការធ្វើយោធូបនីយកម្មតំបន់ជម្លោះផង។
បច្ចុប្បន្ននេះ ជប៉ុនកំពុងបន្តជួយគាំទ្រសម្ព័ន្ធមិត្តខ្លួននៅក្នុងតំបន់ដូចជាផ្តល់នាវាល្បាត និងយន្តហោះល្បាត។ ជប៉ុននឹងផ្តល់យន្តហោះសម្រាប់ការហ្វឹកហ្វឺន TC-90 បីគ្រឿងដល់ហ្វីលីពីន ដើម្បីជួយឲ្យប្រទេសនេះពង្រឹងសមត្ថភាពរបស់ខ្លួនក្នុងការត្រួតពិនិត្យមើលសកម្មភាពរបស់ចិននៅក្នុងតំបន់ជម្លោះ៕
Tag:
ចិន
ជប៉ុន
សមុទ្រចិនខាងត្បូង
ម៉ាឡេស៊ី
វៀតណាម
© រក្សាសិទ្ធិដោយ thmeythmey.com