ជាតិ
សម្ដេច ហ៊ុន សែន ស្តីបន្ទោសអាជ្ញាធរខេត្តព្រះសីហនុ ដែលបណ្ដោយឲ្យឈ្មួញកាប់ឈើនៅលើកោះ ![](https://image.thmeythmey.com/pictures/2018/04/23/23420181736capture.jpg)
×![]()
ភ្នំពេញ៖ បញ្ហាព្រៃឈើនៅលើកោះមួយចំនួន នៃទឹកដីខេត្តព្រះសីហនុ កំពុងរងការបំផ្លាញពីសំណាក់ឈ្មួញខុសច្បាប់ ដែលអាជ្ញាធរត្រូវមានវិធានការទប់ស្កាត់ជាបន្ទាន់។ នេះជាការមើលឃើញរបស់សម្ដេចនាយករដ្ឋមន្ត្រី ហ៊ុន សែន។
ថ្លែងក្នុងពិធីសម្ពោធសណ្ឋាគាររលំដាប់ផ្កាយ ៥ « The Royal Sands Koh Rong » សម្ដេច ហ៊ុន សែន បានបន្ថែមថា បញ្ហាកាប់បំផ្លាញព្រៃឈើនេះ បណ្ដាលមកពីអាជ្ញាធរ ខ្វះការយកចិត្តទុកដាក់លើការគ្រប់គ្រង ដែលបណ្ដោយឲ្យឈ្មួញបន្តលួចកាប់ព្រៃឈើ ហើយនាំឲ្យប៉ះពាល់ដល់ទីតាំងទេសចរណ៍ដ៏សំខាន់នេះ។
ប្រមុខរដ្ឋាភិបាល បានបញ្ជាក់ដូច្នេះថា៖«បញ្ហាព្រៃឈើត្រូវការពារឲ្យបាន។ រដ្ឋបាលព្រៃឈើ ក្រែងយើងមានដែរ នៅក្នុងសង្កាត់នេះ ឯកឧត្តម យន្ត មីន ។ ហើយបើមានចេះតែបណ្ដោយឲ្យគេ កាប់(ឈើ)រហូត។ នៅទីនេះ ការគ្រប់គ្រងព្រៃឈើធូររលុងណាស់»។
សូមស្ដាប់សំឡេងសម្ដេច៖
ជាមួយគ្នានេះសម្ដេច ហ៊ុន សែន ក៏បានបញ្ជាឲ្យអាជ្ញាធរ ទប់ស្កាត់បញ្ហាព្រៃឈើនេះជាបន្ទាន់ ដើម្បីការពារបរិស្ថាន និងតំបន់ទេសចរណ៍ធម្មជាតិផង។ ក្រៅពីនេះសម្ដេចនាយករដ្ឋមន្ត្រី ហ៊ុន សែន បានព្រមានដកមន្ត្រីរដ្ឋាភិបាលណា ដែលគេចវេះពីទំនួលខុសត្រូវ លើបញ្ហារបស់ប្រជាពលរដ្ឋ។ សម្ដេច ថា រដ្ឋមន្ត្រីដែលអសកម្ម និងខ្វះការទទួលខុសត្រូវចំពោះមុខពលរដ្ឋ នឹងគ្មានវត្តមាននៅក្នុងអាណត្តិក្រោយឡើយ៕
© រក្សាសិទ្ធិដោយ thmeythmey.com