ភ្នំពេញ៖ ការចំអក រិះគន់ចំពោះលោក ប៉ាន សូរស័ក្តិ រដ្ឋមន្ត្រីពាណិជ្ជកម្មជុំវិញពាក្យ «ប្រេងសាំងអ្នកមាន និងសាំងអ្នកក្រ»នៅលើបណ្តាញសង្គមហ្វេសប៊ុក បានតម្រូវឲ្យក្រសួងពាណិជ្ជកម្មរៀបចំសន្និសីទកាសែតដើម្បីស្រាយបំភ្លឺ។ សន្និសីទកាសែតដែលប្រព្រឹត្តិទៅនៅក្រសួងពាណិជ្ជកម្មនាព្រឹកថ្ងៃទី១១ខែឧសភានេះ ត្រូវបានដឹកនាំដោយលោក ស៊ាង ថៃ ជាអ្នកនាំពាក្យនៃក្រសួងនេះ។
អ្នកនាំពាក្យក្រសួងពាណិជ្ជកម្មបានថ្លែងសោកស្តាយចំពោះមតិរិះគន់របស់សាធារណជនខ្លះដែលបានយល់ច្រឡំអំពីខ្លឹមសារនៃប្រសាសន៍របស់លោករដ្ឋមន្ត្រីក្រសួងពាណិជ្ជកម្ម។ លោក ស៊ាង ថៃ អ្នកនាំពាក្យក្រសួងពាណិជ្ជកម្មបានពន្យល់នៅក្នុងសន្និសីទកាសែតថា រដ្ឋមន្ត្រីរបស់លោកបាននិយាយផ្តោតទៅលើការជួយសម្រួលជីវភាពពលរដ្ឋដែលមានចំណូលទាបតែប៉ុណ្ណោះ។
លោក ស៊ាង ថៃ បានថ្លែងដូច្នេះថា៖«ខ្ញុំមានការសោកស្ដាយចំពោះការបង្ហោះព័ត៌មានមិនពិតនៅលើបណ្ដាញសង្គម ហើយអ្នកចែករំលែកបន្ត មានទាំងអ្នកបញ្ចេញយោងបល់(Comment) ផ្ដល់យុត្តិធម៌ដល់លោករដ្ឋមន្ត្រី តែក៏មានអ្នកបន្ថែមបន្ថយរបោយ ដែលធ្វើឲ្យរឿងកាន់តែធំ»។
មានសារព័ត៌មានមួយចំនួនបានដាក់ចំណងជើងច្បាស់ៗដែលធ្វើឲ្យសាធារណជនជឿថា លោករដ្ឋមន្ត្រីក្រសួងពាណិជ្ជកម្មមានប្រសាសន៍ថា «ប្រភេទប្រេងសាំងធម្មតា សម្រាប់អ្នកក្រ ហើយប្រភេទសាំងស៊ុពែរ សម្រាប់អ្នកមាន»។ អ្នកទទួលព័ត៌មានយ៉ាងនេះនៅលើបណ្តាញសង្គម ក៏បានកាត់តរូបភាពផ្សេងៗ ដើម្បីចំអកនិងរិះគន់លោករដ្ឋមន្ត្រីយ៉ាងខ្លាំង។
តាមពិតក្នុងពេលកន្លងមក នៅពេលផ្តល់បទសម្ភាសដល់អ្នកកាសែតដែលសួរអំពីអន្តរគមន៍របស់រដ្ឋាភិបាលទៅលើការកើនឡើងតម្លៃប្រេងនៅលើទីផ្សារ លោករដ្ឋមន្ត្រីបានពន្យល់យ៉ាងដូច្នេះ៖«បងប្អូនប្រជាជនភាគច្រើន ប្រើម៉ូតូ ឬយានយន្តតូច ពួកគាត់ប្រើសាំងធម្មតា។ សាំងធម្មតានេះ យើងកុងត្រូល តែយើងមើលតាមទីផ្សារ។ សាំងស៊ុពែរ គេសម្រាប់រថយន្តឡង់គ្រីស័រសម្រាប់អ្នកមាន ដូច្នេះយើងជួយអ្នកមានធ្វើអ្វី? យើងជួយអ្នកក្រ ដើម្បីលើកតម្កើងជីវភាព»។
សូមស្តាប់ប្រសាសន៍របស់លោក ប៉ាន សូរស័ក្តិ ក្នុងបទសម្ភាសជាមួយអ្នកកាសែទក្នុងពេលកន្លងមក៖
គោលបំណងនៃការរៀបចំសន្និសីទកាសែត ក៏ដើម្បីពន្យល់ប្រាប់សាធារណជនអំពីការឡើងថ្លៃតម្លៃប្រេងផងដែរ។ តម្លៃប្រេងនៅកម្ពុជា ត្រូវបានកំណត់ក្នុងរូបមន្តប្រកាសអន្តរក្រសួង ដែលតម្លៃប្រេងត្រូវបានចេញផ្សាយរៀងរាល់ ១០ថ្ងៃម្ដង។ នេះជាការរៀបរាប់របស់លោក ស៊ាង ថៃ អ្នកនាំពាក្យក្រសួងពាណិជ្ជកម្ម ដែលបន្តទៀតថា៖«ដោយសារថ្លៃ ប្រេងនៅទីផ្សារអន្តរជាតិក្នុងរយៈពេលចុងក្រោយនេះបានឡើងថ្លៃ ថ្លៃប្រេងនៅកម្ពុជា ដែលជាប្រទេសនាំចូលប្រេងពីក្រៅ ក៏ត្រូវឡើងថ្លៃទៅតាមទំនោរនោះដែរ»។
ទោះយ៉ាងណាក៏ដោយ បើតាមការបញ្ជាក់របស់មន្ត្រីជាន់ខ្ពស់នៃក្រសួងពាណិជ្ជកម្មដដែល រាល់ស្ថានីយប្រេងមិនអាចលក់ប្រេងលើសតម្លៃ ដែលត្រូវបានគណនា និងចេញផ្សាយដោយក្រសួងនោះទេ ដែលនេះជាការអន្តរាគមន៍មួយរបស់រដ្ឋាភិបាលក្នុងរបបទីផ្សារសេរី។ លោក ស៊ាង ថៃ បន្ថែមយ៉ាងដូច្នេះ៖«ក្រសួងបានចាត់ទុកការអន្តរាគមន៍នេះថាជាការជួយជីវភាពប្រជាជន ពីការលក់ប្រេងក្នុងតម្លៃតាមអំពើចិត្តរបស់ពួកឈ្មួញ»។
ពេលមុន ការកំណត់តម្លៃប្រេងត្រូវធ្វើឡើងសម្រាប់ប្រេងទាំង៣ប្រភេទ គឺប្រេងសាំងស៊ុបពែរ សាំងធម្មតា និងប្រេងម៉ាស៊ូត។ តែក្រោយមកប្រេងសាំងស៊ុបពែរ ត្រូវបានដកចេញវិញពីការកំណត់នោះ។ មន្ត្រីជាន់ខ្ពស់ក្រសួងពាណិជ្ជកម្ម បានអះអាងថា រដ្ឋាភិបាលចង់បន្ធូរបន្ថយដល់ផ្នែកឯកជន ដោយទុកប្រេងស៊ុបពែរឲ្យឯកជនលក់ដេញថ្លៃនៅលើទីផ្សារ។
ប្រេងសាំងស៊ុបពែរមានបរិមាណប្រើប្រាស់ប្រមាណ ១៥ភាគរយនៃការប្រើប្រាស់សាំងសរុបនៅកម្ពុជា។ នេះជាតួលេខលើកឡើងក្នុងសន្និសីតដោយមន្ត្រីក្រសួងពាណិជ្ជកម្ម៕