ជាតិ
ប្រកាសលក់ដីក្នុងឧទ្យានអង្គរ៖អាជ្ញាធរជាតិអប្សរាព្រមានចាត់វិធានការផ្លូវច្បាប់
×![]()
ដោយ: ថ្មីៗ
សៀមរាប៖ នៅពេលថ្មីៗកន្លងទៅនេះ មានក្រុមហ៊ុន និងបុគ្គលមួយចំនួនបានផ្សព្វផ្សាយអំពីការប្រកាសលក់ដីក្នុងរមណីយដ្ឋានអង្គរ នៅក្នុងតំបន់២។ អាជ្ញាធរជាតិអប្សរា ដែលជាស្ថាប័នគ្រប់គ្រង និងអភិរក្សរមណីយដ្ឋានអង្គរ បានប្រាប់ដល់សាធារណជនទាំងអស់ ឱ្យមានការប្រុងប្រយ័ត្នចំពោះការចាញ់បោករបស់បុគ្គលឆ្លៀតឱកាស និងបានព្រមានចាត់វិធានការផ្លូវច្បាប់ផងដែរ ចំពោះបុគ្គល ឬក្រុមហ៊ុនណា ដែលហ៊ានប្រកាសលក់ដី ក្នុងឧទ្យានរមណីយដ្ឋានអង្គរទៀត។
ក្នុងសេចក្តីជូនដំណឹងចុះថ្ងៃទី១១ ឧសភា របស់អាជ្ញាធរជាតិអប្សរា បានលើកឡើងថា រាល់ការសាងសង់ក្នុងរមណីយដ្ឋានអង្គរ គឺត្រូវមានការអនុញ្ញាតពីអាជ្ញាធរជាតិអប្សរា។ អាជ្ញាធរជាតិអប្សរាបានលើកឡើងពីច្បាប់ និងមាត្រា ដែលត្រូវបានការពារ ស្ដីពីការកំណត់ដែនឧទ្យានអង្គរ និងការហាមឃាត់គ្រប់សកម្មភាពសាងសង់នានាក្នុងតំបន់នេះ។
សេចក្តីជូនដំណឹងដដែល អាជ្ញាធរជាតិអប្សរា បានព្រមានចាត់វិធានការតាមផ្លូវច្បាប់ លើបុគ្គលណាដែលនៅតែបន្ដភូតកុហកដល់សាធារណជន ក្នុងបំណងកេងចំណេះដីធ្លីក្នុងតំបន់អង្គរ។ ក្នុងនោះដែរ អាជ្ញាធរជាតិអប្សរា បានអំពាវនាវឱ្យសាធារណជនប្រុងប្រយ័ត្ន និងត្រូវទំនាក់ទំនងមកស្ថាប័នខ្លួន មុននឹងទិញដី ឬសាងសង់នៅក្នុងតំបន់រមណីយដ្ឋានអង្គរ ហើយស្ថាប័ននេះមិនទទួលខុសត្រូវឡើយចំពោះការខាតបង់ផលប្រយោជន៍ណាមួយរបស់សាធារណជន។
គួរបញ្ជាក់ថា កាលពីពេលថ្មីៗកន្លងទៅនេះ មានក្រុមហ៊ុនលក់ដីមួយឈ្មោះថា Ear Heng Angkor បានប្រកាសពីគម្រោងដីពុះឡូតិ៍បង់រំលស់ក្នុងដីតំបន់២។ ក្រុមហ៊ុននេះបានសរសេរក្នុងទំព័រហ្វេសប៊ុកខ្លួនថា ដែលខ្លួនមានទីតាំងផ្លូវ៦០ម៉ែត្រ និងផ្លូវត្រាំនាគ នៅភូមិអញ្ចាញ សង្កាត់នគរធំ ក្រុងសៀមរាប ដែលស្ថិតនៅក្នុងតំបន់២នៃឧទ្យានអង្គរ ដែលអាចសុំច្បាប់សង់សំណង់ស្រាលបាន និងអាចកាត់ចេញពីតំបន់អប្សរានៅថ្ងៃខាងមុខ៕
© រក្សាសិទ្ធិដោយ thmeythmey.com
