អន្តរជាតិ
មហាយក្សឥណ្ឌា និងសិង្ហបុរី ប្តេជ្ញាពង្រឹងកិច្ចសហប្រតិបត្តិការការពារជាតិ និងជំរុញសេដ្ឋកិច្ច ![](https://image.thmeythmey.com/pictures/2018/06/01/narendra-modi-singapore-pib.jpg)
×![]()
មេដឹកនាំឥណ្ឌា និងសិង្ហបុរី នៅសប្តាហ៍នេះ បានឯកភាពគ្នាបន្តពង្រឹងកិច្ចសហប្រតិបត្តិការសេដ្ឋកិច្ច និងបន្តកសាងកិច្ចសហប្រតិបត្តិការយោធាឲ្យបានស៊ីជម្រៅដើម្បីធានាសន្តិសុខ និងស្ថិតភាពតំបន់ឥណ្ឌូប៉ាស៊ីហ្វិក។
ក្រោយចាកចេញពីឥណ្ឌូណេស៊ី នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី បានបន្តដំណើរមកកាន់សិង្ហបុរីទៀតនៅថ្ងៃព្រហស្បតិ៍ដើម្បីជួបពិភាក្សាជាមួយសមភាគីសិង្ហបុរីលោក លី សៀនឡុង។ ក្នុងទស្សនកិច្ចនៅរដ្ឋអាស៊ាននេះ ភាគីទាំងពីរបានឯកភាពគ្នាពង្រឹងទំនាក់ទំនងសេដ្ឋកិច្ច និងសន្តិសុខថែមទៀត។
បើតាមការចុះផ្សាយរបស់សារព័ត៌មាន Times of India លោក ម៉ូឌី និងលោក លី បានប្តេជ្ញាបន្តស្វះស្វែងពង្រឹងចំណងសេដ្ឋកិច្ចទ្វេភាគី និងកសាងកិច្ចសហប្រតិបត្តិការការពារជាតិ ខណៈដែលមេដឹកនាំទាំងពីរបានអំពាវនាវឲ្យមានការថែរក្សាសន្តិសុខ ស្ថិរភាព និងសេរីភាពដែនសមុទ្រនៅតំបន់ឥណ្ឌូប៉ាស៊ីហ្វិកផងដែរ។
អ្នកទាំងពីរក៏ធ្វើអធិបតីក្នុងការចុះអនុស្សារណៈយោគយល់គ្នាលើវិស័យចម្រុះផងដែរក្នុងនោះមានសន្តិសុខអ៊ីនធឺណិត ការហ្វឹកហ្វឺនមន្ត្រីសាធារណៈ ប្រឆាំង និងគ្រប់គ្រងគឿងញៀន រួមជាមួយកិច្ចសហប្រតិបត្តិការភស្តុភាររវាងកងទ័ពជើងទឹកប្រទេសទាំងពីរផងដែរ។
នាយករដ្ឋមន្ត្រី លី សៀនឡុង បានកត់សម្គាល់ពីការលូតលាស់រហ័សនៃកិច្ចសហប្រតិបត្តិការយោធារវាងឥណ្ឌា និងសិង្ហបុរីជាពិសេសកងទ័ពជើងទឹក។ ក្នុងពេលទស្សនកិច្ចនេះ កងទ័ពជើងទឹកទាំងពីរបានឯកភាពគ្នាចុះកិច្ចព្រមព្រៀងលើកិច្ចសហប្រតិបត្តិការភស្តុភារ ហើយនឹងត្រៀមរៀបចំខួបលើកទី ២៥ នៃការធ្វើសមយុទ្ធរួមគ្នាប្រចាំឆ្នាំដែរ។
បច្ចុប្បន្ននេះភាគីទាំងពីរជាដៃគូយុទ្ធសាស្ត្រ ហើយនាយករដ្ឋមន្ត្រីប្រទេសទាំងពីរក៏បានដាក់បញ្ជាឲ្យមន្ត្រីក្រោមឱវាទត្រួតពិនិត្យលទ្ធភាពដើម្បីឈានទៅបង្កើតកិច្ចព្រមព្រៀងសហប្រតិបត្តិការសេដ្ឋកិច្ចគ្រប់ជ្រុងជ្រោយផងដែរ ដើម្បីជំរុញការធ្វើពាណិជ្ជកម្ម និងវិនិយោគរួមគ្នា។ ពាណិជ្ជកម្មរវាងប្រទេសទាំងពីរកើនឡើងជិត ១៥ ភាគរយនៅឆ្នាំមុន ពោលគឺកើនដល់ ២៥ ពាន់លានដុល្លារ។ ទុនវិនិយោគសិង្ហបុរីនេះចូលឥណ្ឌាកើនឡើងពី ២២,៧ លានដុល្លានៅឆ្នាំ ២០១៤ ដល់ ៣៦,៣ ពាន់លានដុល្លារក្នុងឆ្នាំ ២០១៦ ផងដែរ។
ដោយឡែក ក្នុងជំនួបជាមួយសហគមន៍ប្រជាជនឥណ្ឌានៅសិង្ហបុរី លោក ម៉ូឌី បានកោតសរសើរទំនាក់ទំនងទ្វេភាគីជាមួយសិង្ហបុរីជាពិសេសផ្នែកនយោបាយនិងការទូត ហើយលោកចាត់ទុកថា ចំណងមិត្តភាពនេះជិតស្និទ្ធ និងកក់ក្តៅបំផុតផងដែរ។
«ចំណងនយោបាយរវាងឥណ្ឌា និងសិង្ហបុរីស្ថិតក្នុងចំណោមទំនាក់ទំនងដែលកក់ក្តៅ និងជិតស្និទ្ធខ្លាំងបំផុត។ វាមិនមានឡើយការប្រកួតប្រជែង ឬជម្លោះទាមទារដែនអធិបតេយ្យ។ គ្មានឡើយការថ្នាំងថ្នាក់ ឬមិនទុកចិត្តគ្នា។ វាជាដៃគូពីធម្មជាតិដែលមានទស្សនវិស័យរួមគ្នា»។ នេះជាសម្តីលោក ម៉ូឌី៕
Tag:
ឥណ្ឌា
សិង្ហបុរី
សេដ្ឋកិច្ច
អាស៊ាន
ការពារជាតិ
© រក្សាសិទ្ធិដោយ thmeythmey.com